Mirzə Xəzərin Səsi

Gənclərin 17 mart mitinqində tutulub işgəncəyə məruz qalmış musiqiçi Camal Əli xaricə qaçıb

Mirzə Xəzər — Fri, 18 May 2012 06:20:58 -0400

İngiltərənin „Qardian“ qəzeti xəbər verir ki, bu ilin mart ayında gənclərin mitinqində tutulan və həbsxanada işgəncəyə məruz qalan rok musiqiçisi Camal Əli həyatı üçün qorxduğuna görə Almaniyaya qaçmışdır. Camal Əli ingilis müxbirinə demişdir: „Ölkədən qaçmasaydım işimi bitirəcəkdilər“. Camal Əlinin sözlərinə görə, gənclərin mitinqində tutulandan sonra polis məntəqəsində onun başına torba taxıb dəyənəklə doyüblər.

„Mirzə Xəzərin Səsi“ qəzeti
18.05.2012

Almaniyanın "Tageszeitung" qəzeti: "Azərbaycan - Ailənin mülkü olan Petrokratiya (neftekratiya)"

Mirzə Xəzər — Fri, 18 May 2012 03:48:47 -0400

"Tageszeitung"da çıxan yazının xülasəsi:

Neftlə zəngin Azərbaycanprezident İlham Əliyev klanına mənsub qeyri-demokratik və korrupsiyaya qurşanmış elita tərəfindən idarə olunur. „Eurovision“ mahnı müsabiqəsi heç bir şeyi dəyişməyəcək. „Eurovision“ müsabiqəsinə külli miqdarda pul xərclənib. Avtoritar rejim bu nəhəng müsabiqədən özünü müasir, qərbpərəst bir dövlət kimi təqdim etmək üçün istifadə edir…Neft zənginliyindən xalqa heç bir şey çatmır. Kütlənin həyat səviyyəsində heç bir artım olmayıb. İşsizliklə mübarizə aparılmır.
Qəzet sonra yazır ki, Azərbaycan biri neft dövlətlərindən fərqlənmir. Azərbaycana hakim olan elita iqtisadiyyatın bütün sahələrini öz aralarında bölüblər. Bu, korrupsiyalaşmış elitanı nə iqtisadiyyatın qeyri-neft sahələrinin inkişafı maraqlandırır,nə də ki, siyasi sistemin demokratikləşməsi. Çünki siyasi hakimiyyəti əldən versələr enerji sektoru üzərindəki nəzarəti də itirəcəklər...

„Mirzə Xəzərin Səsi“ qəzeti
18.05.2012

Məlumatdan istifadə edərkən qəzetimizin mənbə kimi göstərilməsi şərtdir.

Avstriyalı jurnalistin gözü ilə Azərbaycan: „Prezident atasının adına olan aeroportdan çıxıb atasının adına olan xiyabanla şəhərə gedirdi...

Mirzə Xəzər — Thu, 17 May 2012 06:55:52 -0400

„Aeroportdan şəhərə gedirdik. Yolu bağlamışdılar. Azərbaycan prezidenti öz atasının adına olan təyyarə limanına enmişdi. O, öz atasının adına olan prospekt ilə şəhərə gedirdi. Bütün maşınlar dayanmalı idi…“ Bu, Avstriyanın „Der Standard“ qəzetinin „Avroviziya“ mahnı müsabiqəsini işıqlandırmaq üçün Bakıya gələn müxbiri Marko Şröderin Azərbaycanda ilk təəssüratıdır. Şröder yazır: „Yol boyunca hər yerdə tikinti gedirdi…20 il sonra Azərbaycanın neft ixracatı əhəmiyyətli dərəcədə azalacaq. Neft buruqlarının əksəriyyəti bağlanacaq. „Hollandiya xəstəliyi“nı yoluxan və yalnız neft üzərində qurulan iqtisadiyyat özünü dirçəldə bilməyəcək. Tikinti həyəcanının sonuna da çox qalmayıb“. Və Avstriyalı jurnalist Bakıdan reportajını bu sözlərlə bitirir:

„Bu tənəzzülün sadə azərbaycanlılara heç bir təsiri olmayacaq, çünki neft ixracatından ancaq hakim elitaya mənsub bir dəstə adam xeyir götürür. Əhalinin qalan hissəsi neft həyəcanı zamanı da kasıb olmuşdur...“

„Mirzə Xəzərin Səsi“ qəzeti
17.05.2012

Qeyd: Məlumatdan istifadə edərkən qəzetimizin mənbə göstərilməsi şərtdir.

Vicdan məhbuslarının Azərbaycan xalqına müraciəti

Mirzə Xəzər — Wed, 16 May 2012 17:34:40 -0400

Aclıq aksiyasına başlayan vicdan məhbusları Azərbaycan xalqına müraciət ünvanlayıb.

“Media forum” saytı məlumat verir ki, siyasi dustaqlar Arif Hacılı, Babək Həsənov, Əhəd Məmmədli, Məhəmməd Məcidli, Rüfət Hacıbəyli, Sahib Kərimov, Şahin Həsənli, Tural Abbaslı, Ülvi Quliyev, Vidadi İsgəndərli və Zülfüqar Eyvazlının müraciətində bildirilir ki, onlar hakimiyyətin özbaşınalıqlarına, korrupsiyaya, rüşvətxorluğa, ölkədə insan haqlarının tapdanmasına, mülki hüquqlarının pozulmasına etiraz əlaməti olaraq keçirilən mitinqdə həbs olunublar və qeyri-qanuni olaraq azadlıqdan məhrumetmə cəzası alıblar.

Vicdan məhbusları qeyd ediblər ki, onlar həyatlarını Azərbaycanın müstəqilliyinə, azadlığına, ölkədə demokratik dövlət quruculuğuna həsr etmiş insanlardır: “Bizim mübarizəmiz öz şəxsi maraqlarımız uğrunda mübarizə deyil, xalqımızın xoş, azad, firavan gələcəyi uğrunda aparılan bir mücadilədir”.

Ölkədə vətəndaşların siyasi azadlıqlarının boğulduğu, söz azadlığı sahəsində vəziyyətin pisləşdiyini qeyd edən müraciət sahibləri bildirir ki, korrupsiya, rüşvətxorluq, milli sərvətlərin talan edilməsi rəsmi dövlət siyasətinə çevrilib: “Biz ölkəmizi gözümüz görə-görə sürüklənən bu fəlakətdən xilas etməliyik. Bunun üçün xalqımız, hər bir Azərbaycan vətəndaşı öz hüquqları, azadlıq və demokratiya idealları uğrunda fəal mübarizəyə başlamalıdır. Yalnız xalqımızın birliyi, əzmkarlığı nəticəsində ölkəmizi bu dərin böhrandan xilas edə bilərik.

Bizim mübarizəmiz Azərbaycan xalqı, onun hər bir vətəndaşının xoş gələcəyi uğrunda mübarizədir. Bu mübarizədə biz geriyə çəkilməyəcəyik. Sizin də dəstəyinizlə sonda qalib gələcəyik. Tanrı Azərbaycanımızı qorusun!”

"Media forum"

“Eurovision”un biletləri məcburi satılır. Bakı bələdiyyələrinin hər birinə “Eurovision”nun seçim turlarında iştirak etmək üçün 200 bilet verilib

Mirzə Xəzər — Wed, 16 May 2012 07:53:59 -0400

“Bizim Yol” qəzetinin məlumatına görə, “Eurovision”un yarımfinalına və məşqlərinə olan biletlərin əksəriyyəti satılmayıb. Ona görə də təcili olaraq dövlət strukturları, bələdiyyələr, təhsil, səhiyyə müəssisələri hərəkətə gətirilib.

Qəzetin Nəsimi rayon Bələdiyyəsindəki mənbədən aldığı məlumata görə bütün bələdiyyələr biletlərin satılması ilə bağlı göstəriş verilib. Bakı bələdiyyələrinin hər birinə “Eurovision”nun seçim turlarında və məşqlərində iştirak etmək üçün 200 bilet verilib. Biletlərin də qiyməti 50 manatdan 160 manata qədər dəyişir. Burada könüllülük prinsipi nəzərə alınmır və biletləri satıb pullarını ödəmək məcburidir. Təbii ki, hər bələdiyyədə 200 adam işləmir. Mənbənin sözlərinə görə, qurumun sədrləri biletləri zorla işçilərinə paylayıb ki, onlar qohum-əqrabalarına, qonşularına satsınlar. Yəni bələdiyyə işçiləri qapı-qapı düşüb bilet satışına məcbur edilir.

Şərhə ehtiyac yoxdur...Rejim yenə xərcini xalqdan çıxardır...

“Mirzə Xəzərin Səsi” qəzeti
16.05.2012

Qərb özünü aldatmasın, „Eurovision“ mahnı müsabiqəsindən sonra Azərbaycanda islahat olmayacaq, köhnə hamam qalacaq, köhnə tas

Mirzə Xəzər — Wed, 16 May 2012 06:12:21 -0400

Hamamdan qabaq sevindirici xəbər. Almaniyanın „Ştern“ jurnalı coğqunluqla yazır ki, cinsi azlıqların nümayəndələri qorxmadan „Eurovision“ günlərində Bakıya gedə bilərlər. Bir şərtlə- ictimai yerlərdə əl-ələ gəzin, amma amandır, öpüşməyin…Rəsmi Bakı: Azərbaycanda cinsi azlıqlara qarşı ayrı-seçkilik yoxdur...

Keçək hamam və tas məsələsinə. Qərb, xüsusilə „Eurovision“ həmləsinin bayraqdarı olan Almaniya elə düşünür ki, „Eurovision“ mahnı müsabiqəsi Azərbaycanda avtoritar Əliyev rejiminin yumşalıb liberallaşmasına gətirib çıxardacaqdır. Xəyaldır, yoxsa gerçəklik? Gerçəklik deyil, xəyaldır. Bir avropalı diplomat alman jurnalistinə məsələni belə şərh edib:

„Azərbaycan rəhbərliyi mahnı müsabiqəsindən öz imicini təmizləmək üçün istifadə etmək istəyir, amma çox sayda jurnalistin və əcnəbi qonaqların Bakıda olması üzündən istəyinə nail ola bilməyəcək. Bəs mayən 27-də „Eurovision“ iştirakçıları, jurnalistlər və qonaqlar Bakını tərk edəndən sonra nə olacaq? Heç bir şey olmayacaq. „Eurovision“ mahnı müsabiqəsinin Azərbaycanda islahatlara təkan verəcəyini düşünənlər xəyal dünyasında yaşayırlar. İslahat keçirtmək istəyən, „Eurovision“u gözləməz..."

Deməli, hər iki tərəf uduzacaq: Əliyev rejimi sərf etdiyi əməyə və milyonlara rəğmən „Eurovision“ mahnı müsabiqəsindən imicindəki qara ləkələri təmizləməyə qadir olmayacaq, Qərb isə „Eurovision“ kökəsi ilə Əliyev rejimini islahat keçirtməyə sövq edə bilməyəcək… Odur ki, köhnə hamam qalacaq, köhnə tas…

Mirzə Xəzər
16.05.2012

Almaniya mətbuatı: "Avroviziya" ölkəsində siyasi məhbuslar aclıq nümayişi elan etmişdir”. Folker Beck gələn həftənin çərşənbə günü Bakıda olacaq

Mirzə Xəzər — Wed, 16 May 2012 04:49:23 -0400

Almaniyanın “Deutsche Presse Agentur” informasiya agentliyi bu yaxınlarda Bakıda “Avroviziya” mahnı müsabiqəsinin keçiriləcəyini qeyd edəndən sonar Azərbaycan həbsxanalarında 12 nəfər siyasi məhbusun azadlığa çıxmaq üçün aclıq nümayişi keçirtdiyi barədə xəbər yaymışdır. Yaşıllar partiyasının parlament fraksiyasının rəhbəri Folker Bek agentliklə müsahibəsində Azərbaycanda son dərəcə ağır vəziyyət yarandığını bildirmişdir. Məlumatda deyilir ki, Folker Bek gələn həftə çərşənbə günü Bakıya gələcək. Azərbaycan hökumətinin insan hüquqları müdafiəçilərinə hər vasitə ilə mane olduğunu sözyləyən bek Bakıda cinsi azlıqların nümayəndəsi Kamran Rzayevlə də görüşəcək. Folker Bek “DPA” agentliyinə belə deyib: “Biz imkan verməməliyik ki, Əliyev rejimi “Avroviziya” mahnı müsabiqəsini təbliğat tamaşasına çevirsin. Bizim bu diktatora, heç olmasa, sözlə zərbə endirməkdən başqa çarəmiz qalmayıb.

“Mirzə Xəzərin Səsi” qəzeti
16.05.2012

Gözün aydın olsun, cənab Əliyev, Moskvanı qarışdıran alman parlamentinin deputatı Folker Bek gələn həftə Bakıya gəlir

Mirzə Xəzər — Tue, 15 May 2012 08:32:19 -0400

photo: stern.de

Burnu qanayan bu şəxs – Almaniyanı Yaşıllar partiyasının Bundestaqdakı fraksiyasının rəhbəri Folker Bekdir. 2009-cu ildə „Avroviziya“ mahnı müsabiqəsi Moskvada keçiriləndə Rusiya polisinin gözü önündə sağ meyilli radikal ruslar tərəfindən döyülmüşdü. Özü də cinsi azlıqlara mənsub olan Folker Bek 2006 və 2007-ci illərdə də Moskvaya gedərək homoseksualların və lezbianların hüquqlarının müdafiəsinə nümayişlərdə iştirak etmişdi...

Folker Bekin fəaliyyəti rəngarəngdir. Bundestaqın deputatı 2008-ci ildə parlamentdə çıxış edərək Çinin Tibet vilayətində insan hüquqlarının pozulmasını şiddətlə qınamış, üstündə „İnsan Hüquqları-Tibet“ yazılan köynəyi nümayiş etdirmişdi.

4 il sonra o, üstündə Azərbaycan dilində „İnsan Hüquqları“ yazılan köynəyi Azərbaycan respubliqasının Almaniyadakı səfiri Pərviz Şahbazova hədiyyə etmişdi...

Bu günlərdə Beynəlxalq Amnistiya Təşkilatının dəvəti ilə Köln Universitetində dəyirmi masa müzakirlərində çıxış edən Folker Bek demişdir ki, Azərbaycan „qanlı diktatura“ deyildir, amma İlham Əliyev „represiv sistemə“ başçılıq edir…

Folker Bek gələn həftə Bakıya gedir. Bakçıda „Avroviziya“ mahnı müsabiqəsinin boykotuna qarşı çıxdığını deyən Bek Bakıda „Demokratiya üçün oxu!“ tədbiri çərçivəsində müxalifətçilərlə görüşəcəyini bildirib.

Görəsən Moskvadan burnu qanaya-qanaya qayıdan Folker Bek Bakıdan necə qayıdacaq?

Mirzə Xəzər
15.05.2012

Vicdan məhbusları mayın 15-dən aclıq aksiyasına başlayıblar

Mirzə Xəzər — Tue, 15 May 2012 03:42:12 -0400

Müxalif İctimai Palatanın 2011-ci il aprelin 2-də Bakıda keçirdiyi etiraz aksiyasına görə məhkum olunan məhbuslar mayın 15-dən aclıq aksiyasına başlayıblar. “Media forum” saytı bildirir ki, aclığa bu məhbuslar qoşulub:

Müsavat Partiyası Mərkəzi İcra Aparatının rəhbəri Arif Hacılı;

Müsavat Partiyası Gənclər Təşkilatının sədri Tural Abbaslı;

Müsavat Partiyası Gənclər Təşkilatının sədr müavini Əhəd Məmmədli;

Müsavat Partiyasının üzvü Ülvi Quliyev;

Müsavat Partiyasının üzvü Rüfət Hacıbəyli;

AXCP üzvü Zülfüqar Eyvazlı;

AXCP üzvü Məhəmməd Məcidli;

AXCP üzvü Babək Həsənov;

AXCP üzvü Sahib Kərimov;

AXCP üzvü Elnur Məcidli.

2011-ci ilin aprelində başqa ittihamlarla tutulan AXCP üzvü Şahin Həsənli və hüquq müdafiəçisi Vidadi İsgəndərli də aksiyada iştirak edirlər.

“Amnesty İnternational” təşkilatı bütün bu məhbusları vicdan məhbusu sayır və azadlığa buraxılmasını istəyir.

Tural Abbaslının anası Başxanım Abbasovanın və Müsavat başqanının müşaviri Dünyaxanım Cərullayevanın isə Müsavat Partiyasının mərkəzi qərargahında aclıq etdiyi xəbər verilir.

Müsavatçı Qadınlar Birliyinin bəyanatı: Polislər qadınlara qarşı zorakılıqlara yol verib, tərbiyəsiz hərəkətlərdən belə çəkinməyiblər

Mirzə Xəzər — Mon, 14 May 2012 21:32:09 -0400

Müsavat Partiyası Müsavatçı Qadınlar Birliyi bəyanat yayıb. Gunxeber.com saytına daxil olan bəyanatda deyilir:

“Azərbaycan iqtidari antidemokratik xislətini davam etdirməkdədir. İfadə və sərbəst toplaşmaq azadlığı kimi fundamental və konstitusion insan huquqları söz olaraq qalır. Bu, dünən İctimai Palatanın Bakının mərkəzi küçələrində “Vicdan məhbuslarına azadlıq!”, “Sərbəst toplaşmaq azadlığı təmin edilsin!” şüarları ilə keçirilən aksiyada özünü bir daha büruza verdi. Aksiya zamanı xidməti və mülki geyimli polislər xüsusi qəddarlıq nümayiş etdiriblər. Gənc aksiya iştirakçıları qanlarına qəltan edilib, onlara bədən xəsarətləri yetirilib. Ana-bacı və mentalitet mövzusunu çox sevən bu rejimin bığıburma polisləri qadınlara qarşı zorakılıqlara yol verib, tərbiyəsiz hərəkətlərdən belə çəkinməyiblər. Belə hərəkətlər media nümayəndələrinin foto və video çəkilişlərində öz əksini tapib. Bu faktlar hökmən məhkəmə predmetinə çevrilməlidir. Aksiyada onlarla etirazçı, o cümlədən qadınlar da həbs edilərək polis bölmələrində izahatları alınıb.

Müsavatçı Qadınlar Birliyi ifadə və sərbəst toplaşmaq azadlığının təmin edilməsini, səlahiyyət həddini aşan polis əməkdaşlarının ciddi cəzalandırılmasını tələb edir”.