Mirzə Xəzərin Səsi: Category Cənubdan gələn səslər

İran Dövlət Televiziya və Radio Verilişləri İdarəsinin rəsmisi Azərbaycana buraxılmayıb

Mirzə Xəzər — Sat, 10 Dec 2011 11:39:38 -0500

İran İslam Respublikası Dövlət Televiziya və radio Verilişləri İdarəsinin rəsmi nümayəndəsi Əhməd Kazemi dekabrın 10-da Bakı təyyarə limanında gömrük idarəsi əməkdaşları tərəfindən Bakıya daxil olmaq imkanından məhrum edilmişdir. İranın „Presstv.ir“ portalının məlumatına görə, Əhməd Kazemi elə həmin gün təyyarə ilə Tehrana qayıtmağa məcbur edilmişdir.

İran portalının iddiasına görə, Azərbaycan rəsmiləri prezident administrasiyasının ictimai-siyasi şöbəsinin müdiri Əli Həsənovun İrana səfəri zamanı Bakı ilə Tehran arasında əldə edilmiş razılıqları pozmuşlar. Razılaşmaya əsasən, İran ilə Azərbaycan arasında media sahəsində münasibətlərin genişləndirilməsi imkanlarını axtarıb tapmaq üçün birgə media komitəsi yaradılmasını nəzərdə tutur. Əhməd Kazemi həmin komitədə İranı təmsil etməli idi.

„Mirzə Xəzərin Səsi“ qəzeti

İrandan Azərbaycana təhdidlərin sonu görünmür

Mirzə Xəzər — Tue, 01 Nov 2011 06:16:27 -0400

„Hizbullah Ənsarı“ təşkilatının baş katibi Höccətülislam Ruhulla Becani 4 noyabrda Azərbaycan Respublikasının Təbrizdəki konsulluğunun qarşısında etiraz aksiyası keçirəcəyini bildirib.
Höccətülislam Ruhulla Becani bildirib ki, „Təbriz gəncləri sionizmin istiqaməti ilə icra olunan Azərbaycan Respublikasının anti-islami siyasətlərinə etiraz olaraq bu respublikanın Təbrizdəki konsulluğunun fəaliyyətini dayandıracaq və işçilərini də çıxaracaqlar.“
Höccətüislam Becani əlavə edib: Alim və böyük şəxsiyyətlər indiyə qədər bu işi qadağan etmiş və ümid edirdilər ki, inşallah Azərbaycan Respublikası rəsmiləri bu anti-islami hərəkətlərdən əl çəkəcək və bu addımlarından çəkinəcəklər.

Bu arada yəmənli inqilabçı İsam əl-İmad Tehranda səfərdə olduğu zaman Azərbaycanda orta məktəblərdə hicab qadağasına qarşı mübarizəni himayə edərək, deyibki, "Oyanış dalğası Azərbaycan Respublikasını da bürüyəcək."

Yəmənli müxalifətçi Səhər Kanalının müxbiri ilə müsahibədə deyib: " Siyasi və fikri baxımdan Azərbaycan inqilabçıları Misir, digər ərəb ölkələri və bütün islam dünyası inqilabçıları ilə eynidirlər. Ərəb ölkələrində xalq hərəkatları Azərbaycan Respublikası inqilabçılarında da böyük ümidin yaranmasına səbəb olub və bu gerçəklik Azərbaycan hökumətində dərin qorxu yaradıb. Buna görə də bu ölkə hökuməti təbii olaraq qorxu hissi keçirməlidir və bilir ki, bu oyanış dalğası Azərbaycanı da bürüyəcək və Azərbaycana hakim kəsilmiş zülm hökuməti bu oyanış qarşısında heç bir şey edə bilməyəcək."

"Mirzə Xəzərin Səsi" qəzeti, 01.11.2011

Fotoşəkillər: azeritv.irib.ir

Təbriz: Urmiyə etirazları bitdi, hicab nümayişləri başladı

Mirzə Xəzər — Thu, 06 Oct 2011 04:01:54 -0400

fotoşəkil: Əhli-Beyt ABNA

Urmiyə gölünün qurumasına qarşı bir neçə həftə davam edən etiraz aksiyaları səngiyir və Təbriz yeni etiraz dalğasına səhnə olur. Urmiyə gölünün müdafiəçiləri ilə həmrəylik nümayiş etdirmək üçün Bakıda İran səfirliyinin qarşısında piketlər təşkil olunduğu kimi, indi də Təbrizdə Azərbaycan konsulluğunun qarşısında Azərbaycanda hicabın qadağan olunmasına qarşı etiraz aksiyaları keçirilir.

Əhli Beyt -ABNA- xəbər agentliyinin verdiyi xəbərə əsasən, əsas iştirakçıları gənclər və universitet tələbələrindən ibarət olan çoxlu sayda Təbriz sakini çərşənbə günü səhər, Azərbaycan Respulikasının Təbrizdə yerləşən konsulluğu qarşısında "Azərbaycan xalqı qəbul etməz zilləti", "Hicab müxalifləri ölməlidir, ölməli", "İslam Partiyası sədri azad olunsun", "Məhv olsun İsrail" və s. şüarlar səsləndirərək, Azərbaycan məktəblərində hicab qadağasını pisləməklə yanaşı, hicab məhbuslarının, xüsusilə də AİP sədri doktor Mövsüm Səmədovun tezliklə azadlığa buraxılmasını tələb etdilər.

Aksiyada Təbrizin tanınmış ruhanisi höccətül-islam vəl müslimin Nəzəri və Təbriz Azad İslam Universitetinin rektoru doktor Cavanpur Bakının „ islamofobiya siyasətini“ pisləyiblər.

„Mirzə Xəzərin Səsi“ qəzeti
06.10.2011

Mirzə Xəzər: “Güney Azərbaycan Milli Hərəkatının gələcəyi var”- Müsahibə

Mirzə Xəzər — Sun, 25 Sep 2011 21:31:57 -0400

GünAz TV mətbuat mərkəzinin növbəti müsahibi, “Azadlıq” radiosunun Azərbaycan şöbəsinin keçmiş rəhbəri, tanınmış jurnalist Mirzə Xəzərdir.

- Mirzə bəy, Sizcə, nə üçün qərb mətbuatı Güney Azərbaycan Milli Hərəkatına istəmədiyimiz səviyyədə diqqət ayırmır?

Qərb mətbuatının Cənubi Azərbaycanda baş verən hadisələrə biganə yanaşması məni qətiyyən təəccübləndirmir. Əksinə, biganə yanaşmasaydı çox təəccüblənərdim. Qərbin və Qərb mediasının İrana, İrandakı milli məsələyə, azərbaycanlıların istəklərinə, Urmu gölünün quruması ilə bağlı etiraz dalğasına lazımı səviyyədə diqqət ayırmamasının səbəbini öz təcrübəm əsasında izah etməyə çalışdım. 2001-2003-cü illərdə mənə hər tərəfdən təzyiqlər çox güclənmişdi. Məsələlərdən biri Cənub məsələsi idi. Bir yandan fars redaksiyası (şöbəsi) Cənubla əlaqədar verilişləri tərcümə edib Vaşinqton da daxil hər yerə yayır, o biri yandan da bəzi ünsürlər hər gün radionun rəhbərliyinə memorandumlar (məlumatlar) yollayırdı. „Azad Avropa/Azadlıq” radiolarının prezidenti Tomas Dayn artıq bezar olmuşdu. Məni yanına çağırdı və ona gələn bütün şikayətləri mənə göstərib izahat istədi.

Sakit tərzdə cavab verib dedim:

“ Tom, mən separatçılığı qızışdırmıram. Mən İranda azərbaycanlıların öz ana dilində təhsil almasını, ana dilində nəşriyyatların olmasını istəyirəm, onlara öz tarixlərini və mədəniyyətlərini izah edirəm ki, kim olduqlarını dərk etsinlər.

Tom Dayn gözlərini uzumə zilləyib dedi: “Mirzə, sən məni axmaq sayırsan. Mən bilmirəm ki, o dediklərini edəndən sonra o xalqın növbəti addımı müstəqillik istəmək olacaq? Bu verilişləri dayandır. “Cənubi Azərbaycan” sözünü işlətmə.”
Yenə işlətdim. Sonu məlumdur.

Qərb mediası İranın parçalanmasını istəmir. Bunu başa düşmək lazımdır.

- Bəs nə etmək lazımdır ki, hadisələri qərb mətbuatının diqqət mərkəzinə gətirə bilək?

- Qərbdə çox böyük Cənub diasporası var. Özlərini hansısa dövlətdən və Azərbaycan respublikasından (cümhuriyyətindən) asılı etmədən, müstəqil şəkildə xarici ölkələrdə fəal təbliğat işinə başlamalıdır. Azərbaycan respublikasını ona görə qeyd etdim ki, rəsmi Bakı dövlət maraqlarını üstün tutur və Tehranla əlaqələri gərginləşdirmək istəmir. Ümid ancaq xaricdəki minlərlə ziyalı cənubluya qalır.

- Urmu məsələsi ilə bağlı fikirləriniz nədən ibarətdir?

- Urmu gölünün qığılcımı artıq sönüb. Urmu gölü ilə Topxana arasında oxşarlıq varmı sualına vaxtı ilə cavab verərkən demişdim ki, yox, Urmu Topxana ola bilməz və olmadı. Tələsmək lazım deyil, mənim fikrimcə, bu məsələ hələ tam ortadan qalxmayıb.

- Güney Azərbaycan Milli Hərəkatının gələcəyini necə görürsünüz?

- Güney Azərbaycan Milli Hərəkatının gələcəyi var. Milli şüurun oyanmasına, milli kimliyin aşılanmasına çalışmaq lazımdır. Dil, mədəniyyət, tarix mövzularına diqqəti gücləndirmək lazımdır. Sonrası...Sonrası özü gələcək...

Söhbətləşdi: Elnur Eltürk

Əhmədinecada Nyu Yorkun Kolumbia Universitetinə girmək qadağan olunub

Mirzə Xəzər — Mon, 19 Sep 2011 08:54:45 -0400

"Şeyta gəldi!" Bu, "New York Daily News" qəzetinin manşetidir. İran İslam Respublikasının prezdenti Mahmud Əhmədinecad Amerikanın məşhur Kolumbia Universitetinin ərazisinə girə bilməyəcək. Xatırladaq ki, 24 sentyabr 2007-ci il tarixində Əhmədinecad Nyu Yorkun Kolumbia Universitetində çıxış etmişdi. O zaman bu görüşü təşkil edən Li Bollincer şiddətli tənqidlərə məruz qalmışdı. Universitetin indiki qərarı İran prezidentini istibdad, zülmkarlıq və dözümsüzlüyün təmsilçisi adlandıran ictimai qurumlar, ziyalılar və tələbələrin tələbi ilə əlaqədardır. Bununla yanaşı, Kolumbia Universitetinin rektoru Li Bollincer güclü etirazlardan sonra bildirib ki, o, Əhmədinecadın bir oteldə təşkil etdiyi ziyafətdə iştirak etməyəcək.

MXS

İraq Urmiyədə konsulluq açacaq

Mirzə Xəzər — Fri, 16 Sep 2011 08:37:40 -0400

"The Tehran Times" xəbər verir ki, İran nazirlər kabineti İraq xarici işlər nazirliyinin Urmiyədə konsulluq açmaq barədə xahişini təmin etmişdir. Qəzet yazır ki, Urmiyədə İraq konsulxanasının açılmasıQərbi Azərbaycan ostanı ilə İraq Kürdüstanı arasında siyasi, mədəni, iqtisadi əlaqələrin və ticarətin genişlənməsinə təkan verə bilər. İranın İraqın Nəcəf, Ərbil və Süleymaniyə şəhərlərində konsulluqları var.

Qeyd edək ki, iki həftədir Urmiyə gölünün quruması ilə əlaqədar Cənubi Azərbaycanda azərbaycanlıların kütləvi etiraz nümayişləri olmuşdur. Cənubi Azərbaycan fəalları ehtiyat edirlər ki, Urmiyə gölünün qurudulmasından ətraf ərazilərdən 13 milyon insanın başqa yerlərə köçürülməsi məqsədi güdülür.

Mirzə Xəzər
16.09.2011

Urmiyə etirazlarında həbs edilən azərbaycanlı şairə Fərənək Fərid işgəncəyə məruz qalıb

Mirzə Xəzər — Thu, 15 Sep 2011 09:29:09 -0400

Fərənək Fərid

“Amnesty İnternational” Cənubi Azərbaycanın tanınmış şairəsi, tərcüməçi və qadın hüquqları uğrunda fəal mübariz Fərənək xanım Fəridin həbsxanada dəhşətli şəkildə döyülməsinə və işgəncəyə məruz qalmasına etirazını bildirib. Fərənək xanım sentyabrın 3-də Təbrizdə həbs edilib. Bundan qabaq Cənubi Azərbaycanın hər yerində Urmiyə gölünün qurumasına və hökumətin buna biganə qalmasına qarşı kütləvi etiraz nümayişləri baş vermişdir. “Amnesty İnternational” təşkilatının Yaxın Şərq və Şimali Afrika üzrə müdir müavini Filip Lüter Fərənək Fəridin vicdan əsiri olaraq dərhal və qeyd-şərtsiz azad edilməsini tələb etmişdir. Fərənək xanım hazırda Təbrizin mərkəzi həbsxanasında saxlanır. Onun həkimə ehtiyacı var.

“Mirzə Xəzərin Səsi” onlayn qəzeti

15.09.2011

Tehran geri çəkilir, Əhmədinecad: Biz, Azərbaycanın müstəqilliyini himayə edirik

Mirzə Xəzər — Wed, 14 Sep 2011 18:29:43 -0400

İran prezidenti Mahmud Əhmədinecad Ərdəbil vilayətinin Farsabad şəhərində mitinqə yığışanların qarşısında çıxış edərək İran və Azərbaycan arasında sıx əlaqələrin inkişafına heç bir problem ziyan vura bilməz. "Fars News Agency"nin məlumatına görə, Əhmədinecad demişdir: "Biz Azərbaycan respublikasının müstəqilliyini himayə edir və qonşu ölkə ilə ən yükksək səviyyədə dost münasibətləri davam etdirməkdə maraqlıyıq.

Xəbər verdiyimiz kimi, bu həftənin bazar ertəsi günü Urmiyə gölünün quruması üzündən Ərbədildə kütləvi nümayişlər olmuşdur. Əhmədinecadın regiona səfəri və xalqın qarşısında çıxış etməsi Tehranın son hadisələrdən duyduğu əndişəni nümaiş etdirir.

MXS

Türkiyənin Milliyyətçi Hərəkat Partiyası Urmiyə gölünün məhv edilməsinə qarşı

Mirzə Xəzər — Tue, 13 Sep 2011 23:20:40 -0400

Türkiyənin Milliyyətçi Hərəkat Partiyasının (MHP) Türkiyə Böyük Millət Məclisindəki millət vəkili Əhmət Kənan Tanrıkulu Urmiyə gölünün quruması nəticəsində ətraf mühitə və ətraf ərazilərə faciə gətirəcəyini bildirib. MHP-nin millət vəkili qeyd edir ki, Urmiyə gölünün quruması ətraf ərazilərdə həyatı məhv edəcək. Əhməd Kənan Tanrıkulunun fikrincə, Urmiyə gölünü qurutmaqla Tehran rejimi 15 milyon “türkü” başqa ərazilərə köçürtmək və beləliklə onların etnik qüvvə kimi regiondakı nüfuzunu zəiflətmək istəyir. Əhməd Kənan Tanrıkulu: "Təəssüf ki, İran hökuməti etirazlara məhəl qoymur və gölü qurutmaqda davam edir".

MXS

İngilis dilində mətni oxumaq istəsəniz bu linkə müraciət edin: http://news.az/articles/politics/44201

Ərdəbildə vəziyyət gərgindir, nümayişlər davam edir, həbslər aparılır

Mirzə Xəzər — Tue, 13 Sep 2011 22:54:14 -0400

Ərdəbildə Urmiyə gölünün müdafiəsinə bir neçə etiraz nümayişi olmuşdur. Hakimiyyət orqanları internetin sürətini sıfıra endirmişlər. Mobil telefonlarla danışmaq mümkün deyil. Yerli sakinlər Urmiyə gölü ilə bağlı şüarlar deyərək etiraz aksiyalarını davam etdirirlər. Başqa bir məlumata əsasən, Ərdəbil işğal olunmuş şəhərə bənzəyir. Təhlükəsizlik qüvvələri şəhərin hər yerində keşik çəkirlər. Urmiyə gölünün müdafiəçiləri “Facebook”da səhifə açmışlar. Qoftar Sabz öz bloqunda yazır ki, bazar ertəsi Ərdəbil küçələrində bir sıra nümayişçinin tutulmasının şahidi olub. Onun məlumatına görə, şəhərin hər yerində təhlükəsizlik qüvvələri yerləşdirilib.

Mənbə: globalvoicesonline.org