Mirzə Xəzərin Səsi: Category İnsan hüquqları

Nərimanabadda fövqəladə vəziyyət davam edir

Mirzə Xəzər — Sun, 18 Dec 2011 22:20:26 -0500

Son məlumata görə, qəsəbədə hələ də gərginlik və faktiki olaraq fövqəladə rejim hökm sürməkdədir. Dünən polisin saxladığı 5 sakindən biri - Cavanşir İsmayılov sərbəst buraxılıb.

Müsavat Partiyası Lənkəran rayon təşkilatının dünən yaydığı bəyanatda deyilir ki, mövcud rejim insanların narazılığını araşdırmaq əvəzinə yenə də xislətinə uyğun olaraq zora əl atıb, qəsəbə əhalisinə divan tutub. Hadisələr nəticəsində xəsarət alanlar və həbs olunanlar var. Uzun müddətdir ki, Nərimanabad əhalisi öz problemlərini hakimiyyət nümayəndələrinin diqqətinə çatdırmağa çalışır, qəsəbə akvatoriyasının spesifik xüsusiyyətləri nəzərə alınmaqla balıqçılıq üçün normal şəraitin yaradılmasını xahiş edirlər. Lakin hakimiyyət yenə də insanların problemini həll etmək əvəzinə ondan qazanc mənbəyi kimi istifadə etməyə çalışıb. Sahəyə az-çox aidiyyəti olan bütün təşkilatlar balıqçılıq üçün normal şərait yaradılması müqabilində rüşvət tələb edirlər. Nəticədə vətəndaşlarımız ağır zəhmət hesabına və ölüm riski altında əldə etdikləri gəlirin əhəmiyyətli hissəsini komfortlu kabinetlərdə oturan acgöz və harınlaşmış məmurlara vermək zorunda qalıblar. Lakin bu da həmin məmurları qane etmir, vaxtaşırı balıqçılar saxlanılır, ləvazimatları müsadirə edilir və digər maneələr törədilir. Son hadisələr də məhz belə özbaşınalıqların nəticəsində törənib”.

Müsavat Partiyası Lənkəran rayon təşkilatı zəhmətkeş insanımıza qarşı iqtidarın zülmünü qətiyyətlə pisləyir, hakimiyyətdən talançı siyasətə son qoymağı, Nərimanabad əhalisinin dolanışığı üçün normal şərait yaradılmasını tələb edir: “Təşkilat həmçinin Nərimanabad əhalisini mübarizəni səbir və təmkinlə aparmağa çağırır, onların haqlı tələblərinin yanında olduğunu bəyan edir”.

"Yeni Müsavat" qəzeti

Siyasi məhbus Tural Abbaslının evi söküldü, anası və qardaşları tutuldu

Mirzə Xəzər — Sun, 18 Dec 2011 21:50:04 -0500

Dekabrın 18-i axşam saat 18 radələrindən başlayaraq gecə saatlarınadək Müsavat Partiyası Gənclər Təşkilatının həbsdə olan sədri Tural Abbaslının Bakıda, Səməd Vurğun küçəsində (Heydər Əliyev Sarayının yaxınlığında) yaşadığı ev tamamilə sökülüb.

“Media forum” xəbər verir ki, ev sahibləri evin sökülməsinə etiraz ediblər, texnikanın qarşısını kəsməyə çalışıblar. Əraziyə çoxlu jurnalist və ictimaiyyət nümayəndəsi yığışıb. “Musavat.com” saytının yazdığına görə, Nəsimi Rayon Polis İdarəsinin rəis müavini Süleyman Nemətovun başçılığı ilə polis və mülki geyimli dəstə vicdan məhbusunun anası Baxşıxanım, qardaşları Teymur və Toğrul Abbaslını 21-ci polis bölməsinə aparıblar.

Tutulanlar arasında müsavatçılar Tural Hacıbəyli, Abid Süleymanlı, AXCP üzvləri Dəyanət Babayev və Əlirza Muxtar da olub.

Polis əməkdaşları ərazini etirazçılardan təmizləyəndən sonra binanın söküntüsü başlanıb və gecə saatlarında bina tamam sökülüb.

Başxanım Abbaslı saxlanmamışdan öncə jurnalistlərə deyib ki, bina sakinlərinə heç bir xəbərdarlıq olunmadan söküntüyə başlanıb: “Göründüyü kimi, heç bir yerə lent çəkilməyib, söküntü işarəsi qoyulmayıb. Sakinlərə öz əmlaklarının çıxarılmasına imkan verilməyib”.

B.Abbaslı saxlandıqdan sonra “Musavat.com”a telefonla bildirib ki, polis ona qarşı xüsusi amansızlıq edib: "Süleyman Nemətov məni zorla, kobudluqla maşına mindirdi”. O deyib ki, aidiyyəti qurumlara müraciət edəcək: “Ramil Usubovun bu məsələyə münasibət bildirməsini tələb edirəm”.

Media Forum

Mərhum Novruzəli Məmmədovun Əliyev rejiminə "borcu" ödənilib

Mirzə Xəzər — Fri, 16 Dec 2011 22:32:24 -0500

Dekabrın 17-də «Tolışi Sədo» qəzetinin mərhum baş redaktoru professor Novruzəli Məmmədova məxsus bəzi mal və əşyalar müsadirə olunub.

Əşyaları Yasamal rayon Məhkəmə icraçılarına N.Məmmədovun vəkili Ramiz Məmmədov və hüquq müdafiəçisi Hilal Məmmədov təqdim edib. Müsadirə barədə 1 həftə əvvəl Yasamal rayon Məhkəməsindən mərhumun vəkilinə xəbərdarlıq edilib.

Hüquq müdafiəçisi Hilal Məmmədovun sözlərinə görə 2008-ci il Ağır Cinayətlərə Dair İşlər üzrə Məhkəmənin hökmündə göstərildiyi ümumi dəyəri 600 manat hesablanan 1 kompyuter stolu, 1 stol, 5 stul, İranda toxunmuş 1 xalça, 1 televizor və 1 fotoaparat dövlətə təhvil verilməli barədə xəbərdarlıq edilib. "Bildirildi ki, əks təqdirdə Novruzəli Məmmədovun həyat yoldaşı axtarışa veriləcək. Bu xəbərdarlıqdan sonra onun Moskvada müalicə olunan 72 yaşlı yoldaşı bizə müraciət etdi ki, avadanlıqları ordan-buradan tapıb təhvil verək. Biz vaxtilə Novruzəli Məmmədovun İrandan 40 manata alıb gətirdiyi xalçanı, 4 köhnə, zədəli stulları və bir də kompyuter stolunu verdik. Amma stol, 1 stul, televizor və fotoaparatı tapa bilmədik».

2008-ci ildə çıxarılan məhkəmə hökmündə qeyd edilib ki, müsadirə olunan bu əşyaları N.Məmmədov güya İran xüsusi xidmət orqanlarının verdiyi vəsait hesabına alıb.

Hilal Məmmədov deyir ki, həmin hökmdən sonra bu məsələ indiyə qədər qaldırılmamışdı: «Bu adam həbsxanada vəfat edib. Bundan sonra onun iki oğlu vəfat edib. 72 yaşlı yoldaşı Məryəm Məmmədova BMT-yə müraciət edəndən sonra Rusiyaya köçüb və hazırda orda müalicə olunmaqdadır. Bu qədər müsibət, faciədən sonra 2 il əvvəl vəfat etmiş adamdan stol, stul, fotoaparat, xalça tələb etmək çox gülməli görünür».

«Talışi Sədo» qəzetinin baş redaktoru professor N.Məmmədov dövlətə xəyanət, milli, irqi və dini ayrı-seçkiliyi qızışdırmaqda ittiham olunaraq 10 il azadlıqdan məhrum edilmişdi.

O, 2009-cu ildə 68 yaşında Penitensiar Xidmətin müalicə müəssisəsində öldürülmüşdü.

TALISH.ORG

Rafiq Tağının qızı: "Mən atamla fəxr edirəm"

Mirzə Xəzər — Tue, 29 Nov 2011 11:16:47 -0500

Qəmər Tağı

“Media forum” saytı qətlə yetirilmiş yazıçı Rafiq Tağının qızı, 10-cu sinif şagirdi Qəmər Tağının yazısını təqdim edir.

Mənim atam dünyasını dəyişdi. Bəlkə də düşmən çox sevinir, amma daha bilmir ki, atamı, əksinə, daha çox yaşatdı. Bütün dünya, yer-göy ağladı atama. Çünki mənim atamın ölümü ilə barışa bilmirdilər. Mən də barışmıram. Atam həmişə yaşayıb, yaşayır, yaşayacaq.

Düşmən... Əlbəttə ki, o hər kimdirsə, atamı yaxından tanımayıb. Tanısaydı, belə eləməzdi.

Atamı tanıyanlar bilir. Əlavə sözə ehtiyac yoxdur. O qədər səmimi, mehriban, qayğıkeş, sadə idi ki! Xəstəxanada, o halda belə, ağrılarını, əzabını yanına gələnlərə, hətta bizə də bildirmirdi. Mənə də...

Atam şəkildən sanki mənə baxıb gülür. Gülərüzlü atam mənim! Həmişə “Attuşum” deyərdim...

Mən atamla fəxr edirəm. Həmişə onun kimi yaza bilərəmmi, əsl ustad kimi yazıb-yarada bilərəmmi deyə düşünürdüm. Tez də öz-özümə deyirdim ki, əşi, atam var da, o yazar, mən oxuyaram, mənim yazmağıma ehtiyac yoxdur. İndi isə qərarım atamın qəfil ölümü kimi dəyişdi.

Çalışacağam ki, onun başını uca eləyim...

mənbə: Media Forum

Həsənov Məmmədəlinin şikayəti

Mirzə Xəzər — Fri, 28 Oct 2011 10:27:48 -0400

Şirvan şəhər sakini, şəhərin Naxçıvan küçəsi 17, ev 359 ünvanda yaşayan Həsənov Məmmədəli Yəhya oğlu (ev tel. kod: 02121-574-20. mob. 055-568-87-99.) pozulmuş əmək hüquqlarının bərpası ilə bağlı VNŞ Şirvan İşçi Qrupuna müraciət etmişdir.

Cənab Həsənov M. şikayət ərizəsində bildirir ki o, 1976-cı ildən neft sahəsində çalışır. Orta-ixtisas təhsilli (Əlibayramlı heft texnikomu) 5-ci dərəcəli elektrik-çilingərdir. Əvvəllər “Şirvanneft” Neft və Qaz Çıxarma İdarəsində çalışıb. İdarədə struktur dəyişikliyindən sonra əmək fəaliyyətini “Karasu OKL”-da davam etdirib. 2009-cu ilin oktyabr ayında “Karasu OKL”-ın rəhbərliyi onu əsassız olaraq işdən çıxarıb. Şikayətçi ona qarşı haqsızlıqla bağlı millət vəkili Mehriban Əliyevaya ərizə ilə müraciət edib. Ərizə araşdırılmaq üçün oktyabrın 12-sində Heydər Əliyev fondundan Dövlət Əmək Müfəttişliyinə göndərilib. Əmək Müfəttişliyindən şikayətçiyə cavab 12 dekabrda gəlib. Şirvan şəhər məhkəməsi iddia müddəti keçdiyini əsas gətirərək işə bərpa ilə bağlı iddianı təmin etməyib. Appelyasiya məhkəməsi Şirvan şəhər məhkəməsinin çıxardığı qətnaməni qüvvədə saxlayıb.

Şikayətçi işdən çıxarılmasını “Karasu OKL” şirkətində korrupsiya faktlarını dilə gətirməsi ilə əlaqələndirir. Onun yazdığına görə “Karasu OKL”-un Şirvan şəhərindəki rəhbərliyi: 1. Təzə elektrik avadanlıq və qurğuları sifariş edir, amma bu avadanlıqları almayaraq bu avadanlıqların alınmasına ayrılan pulları fırıldaq yolu ilə mənimsəyirlər, əvvəlki mühərriklər, transformatorlar təmir edilir və onlardan əvvəlki kimi istifadə olunur; 2.Çıxarılan neftin bir qismi qeydiyyatdan gizlədilərək oğurlanır. Bu oğurluq sovetlər dövrundən qalma, torpağın altında olduğundan görünməyən köhnə ötürücü boruları yeni çəkilmiş nəqledici borulara gizli qoşmaqla həyata keçirilir; 3. Şirkətdə ikili mühasibatlıq yaradılıb. İşçilərdən gizlin onların ixtisas dərəcələri artırılır, vəzifələri böyüdülür, adlarına mükafat yazılır. İkinci mühasibatlıq yolu ilə bütün bu əməliyyatdan külli miqdarda vəsait mənimsənilir. Pullar işçinin xəbəri olmadığı, onun adına hazırlanmış ikinci ödəniş plastik kart vasitəsi ilə bankomatlardan çıxarılır. Bütün bu əməliyyatlar “QAZBANK” vasitəsi ilə həyata keçirilir.

Şikayətçi yazır ki bütün bu faktları bildiyi və bununla bağlı iradını bildirdiyi üçün ona böhtan atılıb, işdən çıxarılıb.

Kazım Kazımlı 28.10.2011

İlham Əliyevin "37"si davam edir...

Mirzə Xəzər — Mon, 10 Oct 2011 05:33:52 -0400

Elə təəssürat oyanır ki, Əliyev rejimi gələn il Bakıda keçiriləcək beynəlxalq forumlar və "Avroviziya" mahnı müsabiqəsinə qədər ağzını açmağa cəsarət edənlərin, hökumətə tənqidi söz söyləyənlərin, fikrini azad bildirənlərin, düşünənlərin, xalqa ürəyi yananların hamısını tutub Azərbaycanın hər yerini bürümüş həbsxana və lagerlərə soxmaq niyyətindədir. Rejimin əmri ilə işləyən məhkəmələrin son hökmlərini başqa cür yozmaq mümkün deyildir.

"Media Forum" yazır ki, Oktyabrın 10-da Nəsimi Rayon Məhkəməsində İctimai Palatanın 2 aprel mitinqinə görə həbs olunan müsavatçılar Ülvi Quliyev, Əhəd Məmmədli, Rüfət Hacıbəyli və AXCP üzvü Elnur Məcidliyə hökm oxunub. Avqustun 25-də Səbail Rayon Məhkəməsində 2 aprel mitinqinə görə həbs olunanlardan AXCP üzvləri Sahib Kərimov, Arif Alışlı, Zülfüqar Eyvazlı, Babək Həsənov, Müsavat fəalı Elşən Həsənov və bitərəf Elnur İsrəfilova hökm oxunub. Oktyabrın 3-də Səbail məhkəməsi 2 aprel mitinqinə görə təqsirləndirilən şəxslərdən Müsavat Partiyası Mərkəzi İcra Aparatının rəhbəri Arif Hacılı, Azərbaycan Xalq Cəbhəsi Partiyasının şöbə müdiri Məhəmməd Məcidli, Müsavat Partiyası Gənclər Təşkilatının sədri Tural Abbaslı və AXCP sədrinin müavini Fuad Qəhrəmanlı barəsində də hökmünü elan edib. Oktyabrın 8-də də İslam partiyasının fəalları barədə çıxarılan hökm çıxarıldı.

İlham Əliyevin "37" həmləsi davam edir. Beynəlxalq icma Azərbaycan neftinə yox, Azərbaycan xalqının vəziyyətinə diqqəti artırmayınca, "37" hələ uzun zaman davam edəcək.

Növbədə yeni-yeni həbslər, yeni-yeni hökmlər var...

Mirzə Xəzər
10.10.2011

„Hökumət fikir, söz və vicdan azadlığını təmin etməyə çalışır“, amma necə?

Mirzə Xəzər — Fri, 07 Oct 2011 06:55:02 -0400

“Bütün müasir demokratik dövlətlər kimi, Azərbaycan Respublikası fikir və söz azadlığı, vicdan azadlığı prinsiplərini gündəlik həyatda təmin etməyə və qorumağa çalışır.“ Bunu Dini Qurumlarla İş üzrə Dövlət Komitəsi ABŞ Dövlət Departamentinin 2010-cı ilin ilk yarısında Azərbaycanda dini etiqad azadlığının vəziyyətinə dair hesabatını şərh edərkən iddia edib. Hidayət Orucovun komitəsi düz deyir. Komitə bu bəyanatı verdiyi anlarda Bakı Ağır Cinayətlər Məhkəməsi Azərbaycan İslam Partiyasının sədri Mövsüm Səmədova 12 il, digər üzvləri Vaqif Abdullayeva 11 il, Fəramiz Abbasova 11 il, Rufulla Axundzadəyə 11 il 6 ay müddətinə azadlıqdan məhrum cəzası verib.

Elə eyni gün, oktyabrın 7-də Nərimanov Rayon Məhkəməsində “Hicaba azadlıq” aksiyasına görə həbs olunanlardan beşinə - Əlvan Hüseynov, Rövşən Məmmədov, Nurani Məmmədov, Araz İsmayılov və Rüfət Miriyevə hökm oxunub.

Şərhə ehtiyac görmürük. Əgər Əliyev rejimi bu üsullarla Azərbaycanda İslamın radikallaşmasının qarşısını akdığını düşünürsə, böyük səhvə yol verir. Bu hökmlər repressiyanın məhsuludur. Repressiya isə radikallığın artmasına səbəb olur.

Mirzə Xəzər
07.10.2011

2011-ci ildə məhkum olunan fəalların sayı 18-ə çatdı

Mirzə Xəzər — Mon, 03 Oct 2011 04:14:27 -0400

Milli Məclisin deputatları Avropa Şurasına müraciət edib İranda insan haqlarının kütləvi pozulmasına təşkilatın öz etirazını bildirməsinin vacibliyini qeyd ediblər. Bu arada Bakıda müxalifətçilərə hökm oxunub.

Oktyabrın 3-də bu məhkəmədə keçirilən prosesdə 2 aprel məhbusları - Müsavat Partiyası Mərkəzi İcra Aparatının rəhbəri Arif Hacılı, Azərbaycan Xalq Cəbhəsi Partiyasının şöbə müdiri Məhəmməd Məcidli, Müsavat Partiyası Gənclər Təşkilatının sədri Tural Abbaslı və AXCP sədrinin müavini Fuad Qəhrəmanlı məhkum olunublar. Arif Hacılı, Məhəmməd Məcidli, Tural Abbaslının hər biri 2 il 6 ay müddətinə azadlıqdan məhrum edilib, Fuad Qəhrəmanlıya isə 2 müddətinə şərti cəza verilib.

“Media forum” saytı bildirir ki, oktyabrın 3-də müxalif İctimai Palatanın 2 aprel aksiyasına görə tutulmuş müsavatçılar Arif Hacılı, Tural Abbaslı, AXCP funksioneri Məhəmməd Məcidli Səbail Rayon Məhkəməsinin hökmü ilə azadlıqdan məhrumetmə cəzası alıblar. Bununla 2011-ci ildə azadlıqdan məhrumetmə cəzasına məhkum olunan fəalların və onlara yaxın şəxslərin sayı 18-ə çatıb.

2011-ci ildə daha əvvəl bu şəxslər məhkum olunmuşdular:

4 may - gənc fəal Cabbar Savalanlı;
11 may - ruhani Azər Cəbiyev;
18 may - gənc fəal Bəxtiyar Hacıyev;
2 iyun - ilahiyyatçı Həsən Məmmədov;
17 iyun - xalq hərəkatı liderlərindən Nemət Pənahlı və dostu Ceyhun Fərzullayev;
29 iyun - ruhani Fəxri İlyasov;
21 iyul - AXCP fəalı Şahin Həsənli;
25 avqust - AXCP üzvləri Sahib Kərimov, Arif Alışlı, Zülfüqar Eyvazlı, Babək Həsənov, Müsavat fəalı Elşən Həsənov və bitərəf Elnur İsrəfilov;
27 avqust - hüquq müdafiəçisi Vidadi İsgəndərli.

Türkiyəli rəssam Bahadır Barutər cəzalansınmı? (Mirzə Xəzər, Rəsul Mirhəşimli)

Mirzə Xəzər — Thu, 29 Sep 2011 03:38:01 -0400

Bahadır Barutər

Türkiyəli karikaturaçı Bahadır Baruter cəmiyyətin müəyyən təbəqəsinin dini dəyərlərini təhqir ittihamı ilə məhkəməyə çağırılıb. Buna səbəb rəssamın satirik “Pinqvin” jurnalında dərc etdirdiyi karikaturadır. Məsciddə namaz qılan insanları təsvir edən karikaturaçı onlardan birini əl telefonu ilə Allaha zəng edərək “vacib işlərinə görə” namazı yarımçıq qoymağa icazə istəyirmiş kimi göstərib. Məscidin iç divarında isə kiçik şriftlə “Allah yoxdur, din yalandır” sözləri həkk olunub. Oxucuların çoxsaylı şikayəti İstanbul baş prokurorunun Bahadır Baruter haqqında iş açması ilə nəticələnib. Günahkar bilinəcəyi təqdirdə onu bir il həbs cəzası gözləyir.

“Media forum” saytı bu hadisəyə Almaniyada yaşayan jurnalist Mirzə Xəzərin və dini sahə üzrə araşdırmaçısı jurnalist Rəsul Mirhəşimlinin münasibətini öyrənib.

Mirzə Xəzər: “Bahadır Baruter öz fikrini ifadə edib”

- Dinin, dindarların təhqir edilməsinə qətiyyətlə qarşı olduğumu bəri başdan qeyd etmək istəyirəm. Lakin burada söhbət karikaturadan, satiradan gedir. Bəzi dindarların, dinin və hətta peyğəmbərin satira və karikatura hədəfinə çevrilməsi hallarına ilk dəfə İsraildə şahid olmuşam. Televiziya ekranında həzrəti Musa haqqında satirik səhnəni seyr edəndə elə bilirdim indi camaat küçələrə çıxıb üsyan edəcək, sonra da satirik səhnənin müəllifini damğalayıb məhkəməyə verəcəklər. Yox, heç kim küçəyə çıxmadı. Satirik səhnənin müəllifini də heç kim cəzalandırmadı. Cəmiyyət bu cür tənqidlərə dözümlə, təmkinlə yanaşırdı. Bu mənim ifadə və fikir azadlığı elmi üzrə ilk əyani dərsim idi.

Hər bir cərəyanda mənfi hallar olur. “Tövrat”ı və “İncil”i tərcümə edən adam kimi deyə bilərəm ki, hər bir cərəyanda həqiqi imanlılar və saxta imanlılar olur. Mən inanmıram ki, Bahadır Baruterin qayəsi dini, dindarları təhqir etmək olub. Mənim dinindən asılı olmayaraq bütün səmimi imanlılara böyük hörmətim var. Ancaq etiraf etmək lazımdır ki, hər bir dində həqiqi dindarlar da var və zahiri dindarlar da. Bahadır Baruter öz fikrini ifadə edib. Fikirə fikirlə cavab vermək ən doğru yoldur.

İfadə azadlığının cəmiyyətin heysiyyəti ilə toqquşması məsələsinə gəlincə, demək istərdim ki, azad cəmiyyətdə, fikir və ifadə azadlığının olduğu cəmiyyətdə, dindarın da, dinə inanmayanın da öz fikrini sərbəst söyləyə bildiyi cəmiyyətdə bu, necə deyərlər, “toqquşma” həmişə olacaq. Bu “toqquşma” karikatura ilə, satira ilə cərəyan edirsə, deməli, o cəmiyyətdə sağlam düşüncə hökm sürür. Bu “toqquşma” psixoz yaradırsa, məhkəmə yolu ilə həllə üstünlük verilirsə, deməli, cəmiyyətdə fərqli düşünənlərə dözümsüz yanaşmaq meyli güclənməyə başlayır.

Ateistin hər hansı bir dindarın Allahını sevməsinə dözməməsi qəbuledilməzdir və ifratdır. Ateist hicablıya, namaz qılana dözümsüz yanaşırsa, bu, ifratdır. İfrata varmaq cəmiyyətə xeyir gətirməz, mövcud nöqsanların aradan qaldırılmasına kömək etməz.

Dindarın öz Allahının, peyğəmbərinin tənqid olunmasına, lağa qoyulmasına dözməməsini isə anlayışla qarşılamaq lazımdır, amma bu dözümsüzlük başqa müstəviyə keçməməli, ifrata varmamalıdır. İfrata vararsa, ortada heç bir dəyər qalmaz.

Rəsul Mirhəşimli: “Ateist qarşı tərəfin inancına təcavüz etməməlidir”

- İnsanların dini hissləri ilə oynamaq və onu ələ salmaq ilk növbədə tərbiyəyə bağlı məsələdir. İslam dini bütün insanlara sayğı ilə yanaşır. İnancı olmayanların belə inanmamaq haqqına zorakılıq göstərmir. Dinimizin hikmətində “sənin inandıqların sənə, mənim dinim mənə” prinsipi hakimdir. Bu hikmətə tapınan insanların heysiyyətinə toxunan kəsin ictimai və mənəvi davranışlarında dəyərlərin yoxluğu özünü göstərir. Hüquq və beynəlxalq hüquq da milli və dini hisslərə hörmətlə yanaşmağı tələb edir.

Bu karikaturaya münasibətdə güzəşt üçün ortaq nöqtənin olduğunu düşünmürəm. Çünki adam öz təhqirlərini dindara və ya dini icmaya deyil, dindarın tapındığı dəyərlərə yönəldib. Çox təəssüf ki, bu problem əhalinin mütləq əksəriyyəti müsəlman olan və dini inancları gözəl şəkildə yaşadan Türkiyədə baş verib. Bir insanın azadlığı başqalarının inandığı dəyərlərin üzərində qurulmamlıdır. Bizdə də xurafatı və mövhumaçılığı tənqid edən çoxlu ədəbiyyat və rəsm nümunəsi var. Bu əsərlər insanların inanc sisteminə təcavüz etmir, geriliyi və cəhaləti tənqid edir. Amma bu karikaturada həmin tənqidi göstərə biləcək birini tapmaq mümkündürmü? Heç bir norma və hüquq heç kimə başqasının şəxsiyyətini təhqir etmək haqqını vermir. Belə olmasaydı, şəxsiyyəti təhqir olunanlar məhkəmə davaları açmazdı.

Ateist qarşı tərəfin inancına təcavüz etməməlidir. Dindar da atesitin inancsızlığına radikal yanaşmamlıdır. İslam “heç kəs başqasının günahlarını daşımaz” ehkamının hikmətini paylaşan dindir. İfadə azadlığı heç bir halda insan şəxsiyyətinin və toplumun heysiyyəti əleyhinə yönəlməmildir. Bu hal baş verəndə müvafiq hüquq normaları çərçivəsində etiket hüdudlarını aşan insanı həmin hüdudlar çərçivəsinə salmaq lazımdır.

"Media forum"

Nardaranda etirazlar davam edir, polis məmurların villalarını qoruyur

Mirzə Xəzər — Wed, 28 Sep 2011 01:07:13 -0400

Hakimiyyət rəsmiləri Nardaranda yaranan narazılıqla əlaqədar sentyabrın 27-də qəsəbə ağsaqqalları ilə görüşüb. Məlumatı “Media forum” saytına Nardaran ağsaqqalı Hacı Hacıağa Nuri verib.

Əməkdaşımza məlum olub ki, kənd adamlarından kimsə Nardarana elektrik enerjisinin verilməyəcəyi təqdirdə yolları bağlamaq və kənddəki villalara hücum etmək barədə təşəbbüs qaldırıb. Polis isə bunu ciddiyə alaraq həmin evləri nəzarətə götürüb. Villalar varlı məmurlara və nazirlərə aiddir.

Hacı Hacıağa Nurinin sözlərinə görə, Bakı Şəhər Baş Polis İdarəsinin rəisi Rafiq Abbasov, Bakı Şəhər Dövlət Yol Polisi İdarəsinin rəisi Nuşirəvan Səfərov, Bakı Şəhər Prokurorluğunun nümayəndələri, Sabunçu Rayon İcra Hakimiyyəti başçısının müavinləri Maştağaya gedərək Nardaran ağsaqqalları ilə görüşüb: “Bakıelektrikşəbəkə” borcun olduğunu bəhanə edib Nardaranın işıqlarını söndürürdü. Nardaran sakinləri də buna etiraz olaraq yolları bağlamışdı, İmam Hüseyn meydanında aksiya keçirilmişdi. Sentyabrın 27-də isə axşam Bakı Şəhər Baş Polis İdarəsinin rəisi Rafiq Abbasov, Bakı Şəhər Dövlət Yol Polisi İdarəsinin rəisi Nuşirəvan Səfərov, Bakı Şəhər Prokurorluğunun nümayəndələri, Sabunçu Rayon İcra Hakimiyyəti başçısının müavinləri Maştağaya gəldilər, orada görüşdük, ətraflı müzakirələr apardıq. Onlar yolun bağlanmasından narahat olduqlarını dedilər və açılmasını tələb etdilər.

Real vəziyyəti izah etdik, yolların qəsəbəyə işıq verilməməsinə etiraz olaraq bağlandığını dedik, məsələnin birtərəfli formada həll olunmamasını, işıq probleminin də aradan qaldırılmasını istədik. Belə qərara gəldik ki, ağsaqqallar camaatla danışsın, işıqpulu imkan daxilində ödənilsin. Hakimiyyət rəsmiləri də söz verdilər ki, problemin həllinə kömək edəcəklər”.

Hacı Hacıağa Nuri "Media Foruma" bildirib ki, hakimiyyət rəsmiləri ilə görüşdən sonra işıqlar yanıb və yolları açıblar: “Amma gecə yenə də söndürdülər. Elə bildik ki, yenə də qəsdən söndürüblər. Bu gün səhər maraqlandıq, məlum oldu ki, yüksəkgərginlikli xətdə qəza baş verib, təmir işləri gedir. Təmir başa çatandan sonra işıqlar yanacaq. Biz də qəsəbə sakinləri ilə söhbət aparırıq ki, imkan daxilində ödəniş etsinlər. Hazırda sakitlikdir, yollar da açıqdır”.