Mirzə Xəzərin Səsi: Category Mirzə Xəzərin arxivi

Mirzə Xəzərin kitabı yaxında nəşr ediləcək

Mirzə Xəzər — Fri, 27 Jan 2012 04:15:30 -0500

Mirzə Xəzərin kitabı üzərində iş son mərhələdədir. „Mirzə Xəzərin Səsi və Sözü“ adı ilə işıq üzü görəcək kitabda müəllifin son səkkiz ildə yazdığı məqalələr, şərhlər, esselər toplanıb. Bununla yanaşı, rus və ingilis dillərində yazılan məqalə və şərhlər, müəllifin verdiyi müsahibələr, ona gələn məktublar da kitaba daxil edilib. Kitab üzərində son redaktə işləri artıq sona çatır və bir ay ərzində nəşriyyata göndəriləcəyi gözlənilir. „Mirzə Xəzərin Səsi və Sözü“ kitabının harada nəşr ediləcəyi barədə hələ qəti qərar verilməyib. Azərbaycanla yanaşı Almaniya və Türkiyənin də adı çəkilir. Kitabın nəşri başa çatan kimi oxuculara məlumat veriləcəkdir.

„Mirzə Xəzərin Səsi“ qəzeti
27.01.2012

AMERİKANIN İÇ ÜZÜ VƏ YA ƏLVİDA, MİRZƏ XƏZƏR!

Mirzə Xəzər — Mon, 23 Jan 2012 21:49:16 -0500

Mən uzun illər mənfur, məkrli və amansız Sovet imperiyasından əzab çəkən bir yazıçı kimi gecələr səhərəcən rejimin bütün vasitələrlə səsini boğmaq istədiyi “Azadlıq” radiosuna qulaq asmışam. Bu radio mənim üçün dəhşətli həbsxana karserindəki kiçik pəncərə kimi, işıq və ümid mənbəyi idi. Və o olmasaydı, mən heç şəksiz ki, havasızlıqdan boğulardım.

Bu radionun mənim üçün iki rəmzi vardı: rusca B. Paromonov və Azərbaycanda Mirzə Xəzər. Onların gur ehtiraslı səsləri sovet imperiyasını lərzəyə salırdı. Xüsusilə Mirzə Xəzər Azərbaycan xalqının dünyada yeganə müdafiəçisi və arxası kimi, gecə-gündüz onun düşmənlərini qamçılayır, haqqını və hüququnu müdafiə edirdi. “Azadlıq” radiosunun Azərbaycan şöbəsinin ilk sədrini (heyf ki, adını unutmuşam) terrorla aradan götürən sovet rejiminin Mirzə Xəzərə gücü çatmadı. Və hələ də Azərbaycan radiosunda siyasi həpəndlik edən mənfur imperiyanın sədaqətli təbliğatçılarından Yasin Qaraməmmədlilərin lənətlərinə baxmayaraq, Mirzə Xəzərin səsi daha da gur səslənirdi. Və nəhayət, qanlı imperiya öz daxilində çürüyüb çökdü.

Beləliklə Mirzə Xəzər sovet imperiyasına, KQB-yə, Sov. İKP və onun Siyasi Bürosuna qalib gəldi. O, Xruşova, Brejnevə hakimiyyətin ilk 5 ilində Qorbaçova qalib gəldi.

O vaxtlar bütün bunlar üçün qəlbimiz, əlbəttə ilk növbədə ABŞ-a minnətdarlıq hissləri ilə aşıb-daşırdı. Amma heyf...

Azərbaycan nəhayət, Mirzə Xəzərin mənim və xalqımızın ləyaqətli oğullarının bu qədər arzuladığı azadlıq və müstəqilliyə qovuşdu. Amma bu azadlıq günəşi cəmi bir il üzümüzə güldü. Çünki meydan epopeyasının qəhrəmanlarından biri, Azad və müstəqil Azərbaycanın prezidenti Əbülfəz Eçibəy guya vətəndaş müharibəsinə yol verməmək üçün qoyub qaçdı. Və bu zaman sanki öz missiyasını başa vurmuş Mirzə Xəzərin gur səsi yenidən öz əvvəlki məni və əhəmiyyətini kəsb etdi. O yenidən hər cür tiranlığı qamçılamağa başladı.

Və mən bu zaman heç bir tərəddüd etmədən Mirzə Xəzərin adını tərtib və tərənnüm etdiyim “Yüz böyük azərbaycanlı” siyahısına daxil etdim. Mirzə Xəzər yenidən mənim və mənim kimilər üçün, ölkəmiz üçün həqiqət və ədalət ruporuna , ümid və xilas rəmzinə çevrildi.

Və bu zaman ikinci, amma dərk edilən və başa düşülən metamarfoza baş verdi. Amerika Birləşmiş Ştatları hökuməti – o hökumət ki, “Azadlıq” radiosunu yaradıb, illər uzunu sovet imperiyası ilə efir müharibəsində ona sarsıdıcı zərbələr endirib, SSRİ ilə öz azadlığı uğrunda qanlı mübarizəyə girən qəhrəman əfqan xalqına dayq olub və bizim hamımızın xalqların azadlıq və demokratiya carçısı hesab etdiyimiz bir hökumət, üzündən maskasını atıb qorxunc və yırtıcı dişlərini göstərdi. Sən demə, Azərbaycan Amerikaya onun siyasi və iqtisadi məqsədləri üçün lazım imiş. Sovet dövründə daim tənqid etdikləri korrupsioner rejimə 4 əlli dəstək verməklə, ABŞ hökuməti özlərinin demokratiya, həqiqət və ədalət carçısı kimi qələmə verilən siyasi simalarının əsl mahiyyətini açıb göstərdilər. Deməli , bunlar Panama dövlət başçısı və generalı Norrieqa kimi neçə-neçə ölkə rəhbərlərini heç də narkotika alverinə və ya amansız diktataor olmalarına deyil, sadəcə, onlara sərf etmədiklərinə görə devirmişlər.

Amerika Azərbaycan xalqına , onun ideallarına tüpürərək, bu ağır günlərdə onun yeganə həyanı olan şanlı Mirzə Xəzəri bütün böyük xidmətlərinə zərrə qədər əhəmiyyət verməyərək , vəzifədən kənar edib, bizi əliyalın, qaranlıq quyuya qoydular.

“Azadlıq” radiosu elə bil axtalanan kişiyə, dişsiz, obyektiv” və naqqal bir vəkilə döndü ki, nə istədiyi, kimə xidmət etdiyi heç kimə - hətta öz bədbəxt əməkdaşlarına da məlum deyil. Bu da sənə Amerika, bu da özünü dünyada azadlıq və demokratiyanın qarantı hesab edən dövlət! Bu da sənə demokratiya və siyasi məfkurə atası Z.Bzejinski.

Əlvida, böyük Mirzə Xəzər! Mən hələ 70-ci illərdə öz gözəl və mərdanə səsinlə efirə verdiyin Qurban Səidin “Əli və Nino” romanına görə , ondan aldığım dünyalarca zövq və xoşbəxtliyə görə sənə bir daha sağ ol deyirəm.

Neyləməli, bizimki də belə gətirdi. Sən Bakıda sənin adını daşıyan küçə axtarma! İllərlə mənəviyyatı çirkaba bulananlar , ideyalarını bir qarın çörəyə satanlar, döşlərinə “məni satın alın” kimi gözəgörünməz şüarlar yazıb küçələrdə və ya “Mersedes”lərdə veyillənənlər və ya kəllələrində ağıl əvəzinə eşşək nəcisi gəzdirən siyasi büqələmunlar ölkəsində sənin qədrini kim biləcək?!

Bir də Amerikada nə günah! Bu dünyada heç vaxt adamların qabağına onların xarekterinə və təbiətinə uyğun olmayan yemək qoyulmur. Kimin nəyə layiq olduğunu, kimin nə yediyini , kimin nəyi həzm edə biləcəyini yaxşı bilirlər. Kiməsə cücə plov, kiməsə yal verilir. Kim nəyə layiqsə onu alır.

Əlisa Nicat
Sentyabr, 2004

"Tarixin qürubu" kitabından

Ğüc aldı vətən torpağı azadlığımızdan

Mirzə Xəzər — Fri, 06 Jan 2012 05:58:42 -0500

1998-ci ildə Azadlıq radiosunun bağlanmasına etiraz olaraq yazılmış şer

Vidadi Vaqifoqlu

Ğüc aldı vətən torpağı azadlığımızdan,
Azadlığımız doğdu da irşadlığımızdan.
Dağ yardı Azadlıq da efir dalğalarıyla,
Dünyaya xəbər yaydı bu Fərhadlığımızdan.
Azadlığı daddıqca, eşitdikcə sevindik,
Ğöz yaşları tökdük nə qədər, şadlığımızdan.
Dünyada vətənçün nə qədər iş ğörür onlar,
Biz kəc baxırıq doğmalara yadlığımızdan.
Azadlığı boğmaq məğər ustadlıq olurmu,
İş ğör ki, ucalsın vətən ustadlığımızdan.
Dəhşətli 37 keçibdir, hələ bizlər
Əl çəkməmişik əski o cəlladlığımızdan.
Meydan sulayır düşmanımız can Qarabağda,
Boş-boş hələ qeybətdəyik arvadlığımızdan.
Ey Mirzə Xəzər, yaz bunu da çağla Xəzər tək,
Car çək və danış sən yenə bərbadlığımızdan.
Sizlər də verib əl-ələ bizlərlə bərabər
Azad eləyək yurdu xarabadlığımızdan.
Ğəl, ğəl vətən övladı, azadlıq deyə bir qalx,
Ğəl fayda verək millətə övladlığımızdan.

Bu şer vaxtilə nəşr olunsa da ünvanına yetişməmişdi. Hesab edirəm ki, artq şer öz ünvanına yetişdi. Təşəkkür edirəm. 06.01.2012

O SƏSin dünyanı yenidən titrədəcəyindən adım kimi əminəm...

Mirzə Xəzər — Tue, 29 Nov 2011 01:09:11 -0500

Hörmətli və çox dəyərli Mirzə müəllim!

Hər il oktyabrın 29-u “Mirzə Xəzərin Səsi”ndə Sizə ünvanlanan Doğum Günü Təbriklərini görəndə təəccüblənirdim. Amma bu yaxınlarda vesti. az saytına («Как молоды мы были» 10.11. 2010) verdiyiniz müsahibə ilə tanış olandan sonra Sizi sevənlərin “29 oktyabr təbrikləri” mənə aydın oldu:” - У некоторых день рождения совпадает с какой-то знаменательной датой, или же просто связана с воспоминаниями. А у вас?

- Думаю, что важнейший момент, связанный с днем рождения – это именно факт нашего рождения в этот день. Хотя лично у меня не все однозначно: моя покойная мать говорила, что на самом деле я родился 29 октября, но свидетельство о рождении выдали слишком поздно, и поэтому дату указали на месяц позже. Эта ошибка привела к путанице и в моем знаке зодиака – по паспорту я вроде бы стрелец, а на самом деле скорпион”.

Əziz Mirzə müəllim, bir kobud səhv üzündən dolaşığa düşən təkcə bürcünüz deyil ki. Sizi sevənlər də bəzi bişərəflərin səhvi üzündən tez-tez çaşıb qalırlar. Bu ilin avqust ayında yayılan yanlış xəbər BİZi çox üzdü:” ANS TV bir qədər öncə Azərbaycanın görkəmli jurnalisti, uzun illər “Azadlıq” radiosunun Azərbaycan redaksiyasının rəhbəri işləmiş Mirzə Xəzərin uzun sürən xəstəlikdən sonra 64 yaşında Bakıda vəfat etdiyi barədə məlumat yayıb.
Bu barədə az öncə ANS-ə məxsus internet saytda da məlumat yerləşdirilib, lakin az sonra xəbər saytdan çıxarılıb.

AZXEBER.COM-un məlumatına görə, Modern.az öz növbəsində bu xəbərlə bağlı araşdırma aparıb. "Azadlıq" radiosunun Mirzə Xəzərlə əlaqəsi olan əməkdaşları saytımıza bildiriblər ki, xəbər həqiqətə uyğun deyil və Mirzə Xəzər sağdır”. Dəyərli Mirzə müəllim, ölüm haqdır. Biz hamımız o yolun yolçusuyuq. Amma milyonların sevimlisi olan sağ adam haqqında yalandan ölüm xəbəri yaymaq cinayətdir. Elələrinin Mikayıl Müşfiqi, Əhməd Cavadı, Hüseyn Cavidi, Ziya Bünyadovu, Elmar Hüseynovu, Rail Rzayevi, Rafiq Tağını... qətlə yetirənlərdən, vətənin qeyrətli, istedadlı, savadlı övladlarını ölkədən didərgin salanlardan heç bir fərqi yoxdur.

Hörmətli Mirzə müəllim! Qanlı 20 Yanvar faciəsindən 21 ildən çox vaxt keçməsinə baxmayaraq Azərbaycan əhalisi hələ də blokada şəraitindədir. Və çox təəssüf ki, ağrılarımızı, dərdlərimizi bütün dünyaya çatdıran ilahi bir SƏSə- Mirzə Xəzərin Səsinə də həsrət qalmışıq. Amma bir gün o SƏSin dünyanı yenidən titrədəcəyindən adım kimi əminəm...

Sizə uzun ömür və can sağlığı arzu edirəm!

Hörmətlə, Məlahət Ağacanqızı

Əziz Mirzə müəllim

Mirzə Xəzər — Mon, 28 Nov 2011 06:56:18 -0500

Əziz Mirzə müəllim!

"Qurtuluş" günündən tutmuş "dirçəliş günü"nə kimi ən müxtəlif bayramlarla dolu olan milli təqvimimizdə hər bir namuslu qələm əhli, azadliq və hürriyyətsevər ziyalı, əqidə sahibi olanlarımız üçün əziz olan günlərdən biri heç şübhəsiz ki 29 oktyabr -SİZİN DOGUM gününüzdür.
90 cı ilin o qara günlərində - Azərbaycanın dilinin lal gözünün kor, qulaqlarının kar edildiyi bir zamanda "Koroğlu" üvertürasının sədaları altında ürəkləri isidən, milyonlara ümid verən təkrarsız səsiniz, cəsarətli qələminiz, böyük vətənpərvərliyiniz bu gün də unudulmayıb, sabah da unudulmayacaq və beləcə əbədi olaraq tarixdə qalacaq!

Əziz Mirzə müəllim, bu əziz gündə-Sizin doğum gününüzdə deyə bildiyim və deyə bilmədiyim ən xoş arzularımı bildirirəm! Sizə can sağlığı. can sağlığı və yenə də can sağlığı arzulayiram!

Hörmət və sayqılarla: "Azadliq" radiosunun Mirzə Xəzər epoxasının reportyoru - Cəlal Yaquboğlu

29-10-2011

Haqqınızı alın!

Mirzə Xəzər — Wed, 05 Oct 2011 00:05:27 -0400

Dünyaya nə gətirdiyimizi dəqiq bilmirəm, amma biz də dünyanın bir parçasıyıqsa, dünyadan istədiyimizi istəyə bilərik. Hətta tələb də edə bilərik. Qoparda da bilərik. Qopartdığımız bizdən sonra gələnlərə miras qalır. Miras qalır ki, onlar aldıqlarımızı almağa səy göstərməsinlər. Buna haqqımız var.

Mirzə Xəzər

04.10.2011

Mirzə Xəzərin "Ekspress" qəzeti ilə müsahibəsi: "Diaspor olmadan diaspor təşkilatlarından danışmaq doğru deyil"

Mirzə Xəzər — Fri, 30 Sep 2011 22:47:27 -0400

"Almaniyada Azərbaycanı tanıyanları barmaqla saymaq olar"

Mirzə Xəzər: "Təəssüf ki, "adı var, özü yox" cəmiyyətlər də çoxdur"

"Diaspor olmadan diaspor təşkilatlarından danışmaq doğru deyil"

Tanıtım: Görkəmli jurnalist, publisist, naşir Mikayılov Mirzə Kərim oğlu (Mirzə Xəzər) 29 noyabr 1947-ci ildə Göyçayda anadan olub. "Amerikanın Səsi" radiostansiyasının Azərbaycan bölməsinin müdiri (1985-1987) və "Azadlıq" radiosunun (Radio Free Europe/Radio Liberty) Azərbaycan redaksiyasının direktoru (1987-2003) vəzifələrində işləyib. Hazırda Almaniyanın Münhen şəhərində yaşayan M.Xəzər "Mirzə Xəzərin Səsi" internet radiosunun və eyniadlı internet qəzetin rəhbəridir.

Onu Azərbaycanın haqq səsini tanıdan jurnalist kimi tanıyırlar. Bir vaxtlar, daha dəqiqi 1990-cı il yanvar faciəsi baş verərkən Bakıda radio, televiziya, qəzetlər susdurulan günlərdə Azərbaycanı informasiya blokadasından xilas edən də o olub. Sovet qoşunlarının Bakıda törətdiyi qəddar əməllərini, Azərbaycanın və dünyadan əli üzülmüş azərbaycanlıların səsini dünyaya çatdıran da odur. O, Azərbaycanda demokratiyanın inkişafı, insan hüquqlarının qorunması və ədalətli cəmiyyət qurulması uğrunda yorulmaz mübariz, radiojurnalist kimi tanınır. Söhbət uzun illər "Azadlıq" radiosunun Azərbaycan redaksiyasının direktoru işləmiş Mirzə Xəzərdən gedir.

-Azərbaycanla bağlı dünyada informasiya blokadasının qırılması sizin adınızla bağlıdır. Amma "Azadlıq" radiosundan getdikdən sonra səsiniz çox eşidilmir. Bundan sonra da Azərbaycanın haqq səsini dünyaya çatdırmaq üçün nələrsə etmək fikriniz varmı?

- Mənim imkanlarım məhduddur. Azərbaycanın haqq səsini dünyaya çatdırmaq üçün bu gün Azərbaycanın geniş imkanları var. Azərbaycan 90-cı illərin Azərbaycanı deyil. Mənə onların ehtiyacı yoxdur.

- Amma siz bu işi daha yaxşı bilirsiniz...

- Bilməklə etmək arasında uçurum var. Mənə heç kim müraciət etməyib. Mən özüm özbaşıma bu işi görə bilmərəm.

- İmkanlarım məhduddur dedikdə nəyi nəzərdə tutursunuz?

- Mənim öz səsimi çıxarmağım üçün vasitə olmalıdır. Mən "Azadlıq"da işləmirəm. 8 ildir oradan ayrılmışam.

- "Mirzə Xəzərin Səsi" internet radiosu hazırda fəaliyyət göstərirmi?

- "Mirzə Xəzərin Səsi" internet radiosu 24 saat efirdədir. Amma verilişləri təzələmək mümkün olmur. İmkanlar məhduddur. Əsasən arxiv materialları səslənir.

- Verilişləriniz daha çox hansı mövzulara həsr olunur?

- Hamısı Azərbaycanla bağlıdır. Bu internet radiosu səsim üçün darıxan insanlar üçündür. Onlar sayta girib arxiv materiallarına qulaq asa bilərlər. Operativ məlumatlar yoxdur. Ola bilsin, bu yaxınlarda radionu bağladım.

- Niyə bağlayırsınız ki?

- Mənə elə gəlir ki, artıq buna ehtiyac yoxdur. Maddi baxımdan da problemdir.

- Bəs internet qəzetiniz fə-aliyyətini davam edəcəkmi?

- Əlbəttə. Qəzet həmişə fə-aliyyətdə olacaq.

- Mirzə bəy, Azərbaycandan təklif gəlsə, burdakı radioların birində fəaliyyətinizi davam etdirə bilərsinizmi?

- Yox, təklifi qəbul etmərəm. Mən Azərbaycanda radioda fə-aliyyət göstərə bilmərəm. Mən sərbəst, azad şəraitdə işləməyi üstün tuturam.

- Siz xaricdə yaşayan azərbaycanlı və professional radiojurnalist kimi deyə bilərsinizmi ki, Azərbaycan həqiqətlərinin dünyaya çatdırılması, Azərbaycanın yaxşı tanınması üçün nələr edilməlidir?

- Azərbaycanın geniş imkanları var. Azərbaycan həqiqətlərini xaricdə təbliğ etmək üçün peşəkar, vətənpərvər mütəxəssislərə ehtiyac var. Yəni, şəxsi mənfəətini güdməyən, milli şüuru güclü olan insanlara ehtiyac var.

- Sizcə, Azərbaycanı təbliğ etmək üçün xaricdə qəzet və radiolardan istifadə etmək yetərlidirmi? Azərbaycandan dəstək olduğu təqdirdə yaşadığınız ölkədə - Almaniyada radio aça bilərdiniz?

- Mən, xaricdə qəzet və radiolar vasitəsilə Azərbaycanın ciddi təbliğ olunduğuna şahid olmamışam. Almaniyada radio açmaq asan iş deyil. Bu işə özfə-aliyyət məşğuliyyət kimi yanaşmaq olmaz və bunun işə xeyiri də dəyməz. Ciddi bir radionun açılması üçün maddi imkanlardan başqa Azərbaycan dövlətinin də himayəsi lazımdır. Səmimiyyətlə deyim ki, dövlətin, Azərbaycan dövlətinin himayə etdiyi radioda mən işləyə bilmərəm. Azərbaycana, Azərbaycan dövlətinə böyük hörmətim var. Amma mən öz azadlığımın qiymətini bilirəm. Qiymət deyəndə mən azad və sərbəst olmağın qiymətini nəzərdə tuturam.

- Bəs ciddi təbliğ olunmamağın səbəbini nədə görürsünüz?

- Nədə görürəm? Hər fərdin öz vətəninin milli məsələsindən çox öz qayğısına qalmasında. "Bacarana can qurban" deyib işə girişməkdə. Hər bir işdə mənfəət güdməkdə. Bu təzahürlər üstün gələndə vətən də, millət də, dövlət də, Qarabağ da arxa plana sıxışdırılır. Təəssüf ki, bu zehniyyət bu gün cəmiyyətdə kütləvi şəkil alıb.

- Almaniyada azərbaycanlıların başqa bir mətbuat orqanı varmı?

- Yox, mətbuat orqanı mövcud deyil. Hamı tost deməklə məşğuldur.

- Yeri gəlmişkən, bu ölkədəki Azərbaycan diaspor təşkilatları ilə əlaqələriniz varmı?

- Əvvəllər var idi. Son vaxtlarda heç biri mənə zəng eləmir. Başları çox qarışıqdı. Ayrı-ayrı şəxslər zəng edir.

- Azərbaycanlıların sevimli bir radiojurnalisti kimi sizi tədbirlərinə dəvət edirdilərmi? Ümumiyyətlə, Almaniyadakı Azərbaycan cəmiyyətlərinin fəaliyyəti sizi qane edirmi?

- Yox, etmirlər. Mən 8 ildir radiodan ayrılmışam. Bu 8 ildə bir-iki dəvət almışam, amma gedə bilməmişəm. Almaniyadakı Azərbaycan cəmiyyətlərinin fə-aliyyətindən az xəbərim var. Bu cəmiyyətlərin fəaliyyət göstərməsindən əmin deyiləm. "Adı var, özü yox" cəmiyyətlər də çoxdur, təəssüf.

- Almaniya mətbuatında Azərbaycanla bağlı informasiyalar yer alırmı? Bu ölkənin Azərbaycana münasibəti necədir? Orada Azərbaycanı tanıyırlarmı?

- Çox nadir hallarda. Əsas etibarilə neft və qaz məsələsi gələndə adı çəkilir. Almaniyanın Azərbaycana münasibəti normaldır. Alman firmaları Azərbaycanda fəaliyyət göstərir. Almaniyada Azərbaycanı tanıyanları barmaqla saymaq olar.

"Eurovision" musiqi yarışmasında təmsilçilərimizin qələbəsi Azərbaycanın tanınmasına təsir edib. Bu qələbənin böyük əhəmiyyəti oldu. Bu qələbəni Azərbaycanın tanınması baxımından uğurlu təbliğat saymaq olar.

- Mirzə bəy, sizcə diaspor təşkilatları Azərbaycan həqiqətlərini - ermənilərin ölkəmizə qarşı işğalçılıq siyasətini alman cəmiyyətinə çatdırmaq üçün hansı üsullardan istifadə etməlidir?

- Ermənilərin istifadə etdikləri üsullardan istifadə etməlidirlər. Mənim fikrimcə, diaspor olmadan diaspor təşkilatlarından danışmaq doğru deyil. Əvvəlcə diaspor yaradılmalıdır. Diaspor xaricdə yaşayan azərbaycanlı mühacirlərin ümumi məqsəd, ümumi ideya, ümumi amal ətrafında birləşməsi deməkdir. Bu birliyi yaratmadan diaspor kəlməsini dilə gətirmək, məncə, yanlışdır.

- Sizdə məlumat varmı ki, Almaniyada nə qədər azərbaycanlı yaşayır?

- Yox, yoxdur.

- Bəs yaşadığınız Münhen şəhərində həmyerliniz varmı?

- Münhendə həmyerlilərimiz var, amma təşkilatlanmayıblar.

- Siz özünüz onları bir araya gətirib təşkilat yarada bilərsinizmi?

- Təşkilatlanmaq üçün istəklə yanaşı maddi imkanlar lazımdır. Mənə müraciət etmişdilər. Dedim ki, sizə hər sahədə kömək edərəm, amma qabağa düşüb kimlərinsə yanına gedib pul istəyə bilmərəm, məndə belə bacarıq yoxdur və kimdənsə pul istəmək mənim təbiətimə uyğun deyil. Mən kömək edərəm, amma kömək istəmərəm. Bunu deyəndən sonra getdilər, bir də gəlmədilər.

- Almaniya hökumətinin Qarabağ probleminə yanaşması sizi qane edirmi? Siz şəxsən Qarabağ probleminin həllini necə görürsünüz?

- Almaniya hökumətinin Qarabağ məsələsində mövqeyi o biri Qərb ölkələrinin mövqeyindən çox da fərqlənmir. Bu siyasət "nə şiş yansın, nə kabab" siyasətidir. Münaqişə edən tərəflərlə eyni dərəcədə əlaqə saxlamaq, Dağlıq Qarabağ məsələsinin dinc yolla həllinə tərəf çıxmaq. Dağlıq Qarabağ münaqişəsi tərəflər arasında həll olunmalıdır. Bu münaqişənin hərbi yolla həll edilməsi qeyri-mümkündür:

1. Müharibə böyük riskdir.

2. Qərb müharibəyə imkan verməz.

3. Azərbaycan Qərbin iradəsinə qarşı hərəkət edə bilməz.

4. Rusiya Ermənistanın məğlubiyyətinə yol verməz.

Bu, mühüm amillərdir.

Münaqişənin dinc yolla həlli yaxın gələcəkdə mümkün olan iş deyil:

1. Rusiya cənubi Qafqazda iştirakını hifz etmək üçün Qarabağ münaqişəsinin həll olunmadan qalmasına çalışır.

2. Erməni diasporu güclüdür və ABŞ-la o biri Qərb dövlətlərinin siyasətinə təsir göstərə bilir.

3. Azərbaycanın sanballı, etibarlı müttəfiqi yoxdur. Sözdə müttəfiqlər var, amma əməldə yox.

Aqil ASLAN "Ekspress" qəzeti 01.10.2011

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi ilə çap edilib

Allah heç kimin başına belə şey gətirməsin!

Mirzə Xəzər — Wed, 07 Sep 2011 10:11:28 -0400

Allah heç kimə „Wikileaks“ kimi düşmən qismət eləməsin! İlham Əliyevə qismət oldu. Şübhə qalmadı. „Wikileaks“ İlham Əliyevlə çarpışır. Yerli mətbuata məharətlə nəzarət edən İlham Əliyev, “Wikileaks”in qabağında aciz qalıb. Allah heç kimin başına belə şey gətirməsin!

Mirzə Xəzər
07.09.2011

P.S. İlham Əliyev "Wikileaks"i ciddi qəbul edir, çünki dərc edilən sənədlər məxfidir və yalnız Azərbaycanda yox, bütün dünyada eyni zamanda yayılır. İlham Əliyev təşvişdədir.

ALLAHIN GÖZƏL SƏSİ

Mirzə Xəzər — Mon, 29 Aug 2011 05:54:17 -0400

ALLAHIN GÖZƏL SƏSİ ,DÜYANIN HAQQ SƏSİNİ ÇATDIRAN , ÜZÜNDƏ NUR VƏ RƏHM OLAN GÖZƏL MİRZƏ bəy , sizə bu Ramazan ayında etdiyiniz duaların bütünlüklə ALLAH tərəfindən qəbul olmasını diləyirəm AMİN inşaALLAH

Humay Hesenli

29.08.2011

Mirzə Facebook

Mirzə Xəzər — Sat, 27 Aug 2011 00:32:29 -0400

Dostluğu qəbul etdiyinizə görə çox sağ olun, Mirzə Bəy! Ömrümün uzun bir hissəsi Sizin "Azadlıq"dan gələn səsinizin tilsiminə düşdü və mən dözdüm, yaşadım. Bu gün ədəbiyyat adamı kimi fəaliyyətimdə özünüz bilmədən də böyük rolunuz olub! Hekayələrimi "Azadlıq" radiosunun "Oxu zalı"ndan, "Adyazar.az", "Kultaz.com", "Dayaq.orq" və s. saytlardan Aliq Nağıoğlu imzası ilə oxuya bilərsiniz. Allah nəzərini üstünüzdə əskik etməsin!