Mirzə Xəzərin Səsi: Category Təhlil və şərhlər

“Analoqu” olmayan məmləkətin analoqsuz seçkisi və seçki qatarına gecikənlər

Mirzə Xəzər — Fri, 10 Oct 2008 00:15:56 -0400

Yumurta və rüşvət, Nigeriya və Azərbaycan

Mirzə Xəzər

Azərbaycan “analoqu” – bənzəri, oxşarı olmayan məmləkətdir. Azərbaycan prezidenti İlham Əliyev bu günlərdə bəyan etdi ki, “son dörd ildə iqtisadi inkişaf baxımından Azərbaycan dünya miqyasında birinci ölkədir”. Maraqlı cümlədir. Buna baxmayaraq və hətta ikinci yeri tutan ölkənin harada yerləşdiyi aydın olmasa belə, prezidenti də, vətəndaşları da ürəkdən təbrik edirik! Böyük nailiyyətdir. İlham Əliyevin bəyanatını eşidəndən sonra Xalıq Bahadırın “Azadlıq” qəzetində “Bu xalqı necə ələ salmaq olar” sərlövhəli şərhində irəli sürdüyü müddəalara şübhə etmək üçün təkzibedilməz dəlillərə sahib çıxdığımızı yalnız və yalnız bədxah adamlar görməyə bilər. Xalıq Bahadır nə yazır? Gəlin oxuyaq: “Türkiyəli qardaşlarımızın belə bir deyimi var: “Yalan ona inananlar üçündür”. Bu baxımdan Əliyevləri qınamaq bir az çətindir: onlar hər hansı xalqı bir belə (40 il!) aldada bilməzdilər. Bu xalqı bir belə aldada biliblərsə, deməli, bu xalq elə aldadılmalıdır.” Müddəanən həqiqətə nə qədər yaxın olduğunu müəyyənləşdirmək çətin olsa da, Xalıq Bahadırın lap axırda söylədiyi “...bu xalq elə aldadılmalıdır” kəlamına şiddətli etirazımızı nalə çıxara-çıxara bəyan etmək istəyirik. Çünki, heç bir xalq aldadılmalı xalq deyildir! Niyə? Oktyabrın 8-də elektron poçtumuza Azərbaycanın “X” adlı ucqar məkanından “X” adlı bir şəxsin bizə göndərdiyi qəribə və son dərəcə inanılmaz bir məktubu axıra kimi oxuyan hər kəs “Niyə?” sualına özü cavab verə bilər. “X” adlı ucqar məkanın “X” isimli bir sakini öz məktubunda yazır: “Hörmətli Mirzə Xəzər...Bütün dünya ictimaiyyəti insan hüquqlarından danışır, amma bizdə rəsmiləri insan hüquqları yox, yalnız pul maraqlandırır. Hətta pulu olmayan insan 30 yumurta verir ki, təki yazdığı şikayət ərizəsinə cavab alsın. Bizdə insan hüquqlarını 30 yumurtaya müdafiə edirlər...” Bu iddiaya inanırsınızmı, əziz oxucular? Öz işinizdi. Siz inansanız da, biz inanmırıq. Belə əhvalatlar Mirzə Cəlil və Mirzə Ələkbərin yaşadıqları cahil, ədalətsiz, özbaşınalığın hökm sürdüyü cəmiyyətdə baş verib, buna inanırıq, ancaq bu gün Azərbaycanda iqtisadi inkişafın “analoqsuz” inkişaf etdiyi bir zamanda yumurta ilə rüşvət verildiyinə heç cür inana bilmirik və əsla inanmarıq! Məsələn, qısaca FRİDE adlanan Fundación para las Relaciones Internacionales y el Diálogo Exterior təşkilatının son hesabatında iddia olunur ki, Azərbaycandan fərqli olaraq Afrikanın Nigeriya adlı ölkəsi 1999-cu ildə formal olaraq demokratiyaya keçib. Yəni, hesabatın müəllifləri bununla demək istəyirlər ki, Azərbaycan heç olmasa formal olaraq belə demokratiyaya keçməyib. Maraqlıdır. Hesabatda sonra iddia olunur ki, Səudiyyə Ərəbistanı isə Azərbaycandan fərqli olaraq beynəlxalq şəffaflıq təşkilatı olan “Transparancy International”ın 2007-ci il hesabatında rüşvət alan ölkələr sırasında Azərbaycandan düz 70 yer irəli çıxıb. Göründüyü kimi, Azərbaycan son dörd ildə iqtisadi inkişaf sahəsində dünyada birinci yerə çıxanda, Səudiyyə Ərəbistanı “analoqu” olmayan bir sıçrayışla rüşvət alan ölkələr siyahısında “yaxşılar”ın cərgəsində yer ala bilib. Azərbaycan isə “analoqu” olmayan bir sürətlə yerində saymaqda davam edib.

Təkcə Azərbaycanmı? Yox, ədalətsiz olmayaq

Day.az saytının məlumatına görə, Azərbaycandan mühacirət edib İsraildə məskunlaşan və bu ölkənin tamhüquqlu vətəndaşlarına çevrilən bir qrup şəxs dünya azərbaycanlılarına müraciət edərək onları qarşıdan gələn seçkilərdə İlham Əliyevin namizədliyini müdafiə etməyə çağırmışdır. Çağırışın əsl səbəbləri məlumdur və müəlliflərin səmimiyyəti şübhə doğurmaya bilər. Lakin, Israilin baş naziri Ehud Olmert rüşvətxorluq ittihamı ilə üzləşdiyi üçün istefa verməyə məcbur olduğu heç kim üçün sirr deyildir. Baş naziri rüşvətxorluq ittihamının ağır yükü altında istefa verməyə məcbur olan, yerli mətbuatın etiraf etdiyinə görə dövlət idarələrində korrupsiyanın geniş yayıldığı bir ölkənin vətəndaşlarının Azərbaycanda prezident seçkilərinə bu şəkildə “can yandırması” qəribədir. Onlar unutmasınlar ki, İsrailin özündə seçkilər yaxınlaşır...

Bəs qatar?

Bəli, qatar az qala yadımızdan çıxmışdı.Son məlumatlara görə, Bakı şəhər icra hakimiyyətinin İsveçrədə mühacirətdə yaşayan keçmiş başçısı Rafael Allahverdiyevdən sonra Rəsul Quliyevin sədrlik etdiyi Açıq Cəmiyyət Partiyası da seçkidə İlham Əliyevin namizədliyini himayə etdiklərini bildiriblər. Rəsul Quliyev bu qərara qarşı olduğunu bildiribsə də, Rafael Allahverdiyev və ACP kimilərin qatara çatıb, bir şeyə nail olmaq cəhdləri çətin fayda versin. Qatar çoxdan yola düşüb, cənablar! Bəs yumurta? Unutmayın, yumurta ən vacib qida maddələrindən biridir!

Mirzə Xəzər
08.10.2008

650 min iş yeri açan prezident, Nardaranı azad etmək istəyən namizəd, heysiyyətlə oynayan rejim

Mirzə Xəzər — Fri, 12 Sep 2008 09:14:48 -0400

“Kim Allahın evini bağlamaq istəyirsə...Allah onun evini bağlasın!”

Müasir dünyanın çox qəribə və ədalətsiz dünya olduğunu çox millət bilir, ancaq azərbaycanlılardan yaxşı bilən xalq tapılmaz. Elə bil dünyanın bütün ədalətsizlikləri, ziddiyyətləri, qəribəlikləri, nöqsanları məhz dünyanın Azərbaycan boyda kiçik bir coğrafi məntəqəsində cəmləşib. İnsan ətrafa baxdıqca özünün bu ziddiyyətli və ədalətsiz tilsimli şəraitin məngənəsində çabalayan köməksiz, biçarə, zavallı, arxasız fərd olduğunu dərk edir. Əslində insanı elə bu sarsılmış, gicəlmiş, köməksiz və İTAƏTKAR vəziyyətdə saxlamaq üçün qüdrətli bir sistem qurulub və bu sistem maneəsiz işləməkdə və öz şər əməlini həyata keçirməkdədir. Azərbaycan Sosial Rifah Partiyası bu günlərdə ictimaiyyətə “müjdə” verib bəyan etdi ki, partiyanın sədri, deputat Xanhüseyn Kazımlının “Böyük siyasətin davamı” adlı çoxcildli kitabının V cildi çapdan çıxıb. “Əsərdə” Heydər Əliyevin müəyyən etdiyi “vahid siyasi və iqtisadi strategiyanın uğurları, onun davam etdirilməsi yönündə prezident İlham Əliyevin reallaşdırdığı taktiki gedişlər geniş şəkildə işıqlandırılıb”. Məlumatdakı “Heydər Əliyev strategiyası” və “İlham Əliyev taktikası” kimi söz oyununa fikir verdinzmi, əziz oxucular? Fikir vermədinizsə, bir də oxuyun və lütfən fikir verin! Mühümdür. Heydər Əliyev “strategiyası”nın bar-meyvələrini azərbaycanlılar bu gün də dadmaqdadır və millət itaətkar kütlə vəziyyətində qaldıqca, oyanmadiqca hələ uzun zaman dadacaqdır. Necə olsa, şərhin əvvəlində qeyd etdiyimiz məlumatdakı “coxcildli” kəlməsindən aydın olur ki, Xanhüseyn Kazımlı hələ neçə-neçə buna oxşar cildlər hazırlayıb marksizm-leninizm dahilərinin çoxcildli əsələrindən cana doymuş, cəmiyyətdə həqiqət təhrif edildiyi üçün kitab oxumağa artıq meyli olmayan, söylənən hər bir rəsmi mülahizəyə və verilən hər cür vədə inamını itirən sıravi vətəndaşlara sırımağa çalışacaqdır. Çünki, mədhiyə ədəbiyyatı artıq 15 ildir Azərbaycanda ən qazanclı sənaye sahələrindən birinə çevrilib.

Bəs taktika?

Taktika olduqca məzəli məsələdir. 2003-cü ildə prezident vəzifəsini ifa etməyə başlayarkən 600 000 təzə iş yeri açacağını bəyan edən İlham Əliyevin beş il sonra “biz 4 ildə 650 000 yeni iş yeri açmışıq” bəyanatını ruh yüksəkliyi ilə əksəriyyəti işsiz, böyük hissəsi də Rusiyada iş axtaran azərbaycanlıların başına müjdə kimi yağdırması avtoritar rejimlərin klassik taktiki gedişdir. “Versiya.az” saytının forumunda fəal iştirak edən Aynur xanım hər halda, istər-istəməz bu taktiki gedişi nəzərdə tutub yazır: “Hanı bu neftin pulu, niyə əhalinin sosial rifahinda ozünü göstərmir? Niyə qeyri neft sektoru inkişaf etmir?! Bir dəfə elan edirlər ki, 618 min iş yeri açılıb, üstündən 25 gün keçəndən sonra 600 min deyirlər”. Bəli, Aynur xanım, taktikanın, başqa şeylər kimi, çox üzü var. İlham Əliyev deyir ki, 4 il ərzində ölkədə yoxsulluq 49 faizdən 16 faizə düşüb. Bu da, İlham Əliyevin iddiasına görə, neft gəlirlərinin ədalətli bölüşdürdüyünü sübut edir. Taktikanı görürsünüzmü, əziz oxucular? Etibar Əliyev “Azadlıq” qəzetində “Yoxsulluq, yoxsa səfalət” sərvlövhəli şərhində yazır: “ Azərbaycanda əhalinin vəziyyəti pisləşdikcə hökumətimiz bəyan edir ki, yoxsulluğun səviyyəsi aşağı düşür. Yadımdadır ki, kasıbçılıq termini bu terminlə əvəz ediləndə bunlardan əvvəl hansı durumun olmasının adı çəkilmirdi. Məsələn səfalətin. Tutaq ki, hökumətin dediyi kimi, biz yoxsulluqdan çıxdıq, maraqlıdır, onda hara daxil olduq? Varlı təbəqəyəmi? Yoxsa orta yoxsulluğa? Bir dəfə Xo Şi Mindən ölkəsində nəyə görə yoxsulların sayının çox olması barədə soruşulduqda o, maraqlı bir cavab vermişdi: “Unutmayın ki, biz səfalətdən yoxsulluğa gəlmişik”. Azərbaycan rəsmilərinin göstərdiyi rəqəmlər yoxsulluq göstəricisi yox, deyəsən, səfalət göstəricisidir.” Bəli, deyəsən biz, yoxsulluqdan səfalətə tərəf addımlayırıq və İlham Əliyev məhz bunu nəzərdə tutub oyünməyə üstünlük verir. Böyük nailiyyətdir! İqtisadi və Sosial İnkişaf Mərkəzinin rəhbəri Vüqar Bayramov bildirir ki, “Azərbaycanda orta pensiyanın məbləği Rusiya ilə müqayisədə 6 dəfə, Qazaxıstanla müqayisədə 4 dəfə azdır”. Deməli Heydər Əliyevin sytrategiyasını taktika ilə davam etdirənlərin rəhbərlik etdikləri Azərbaycan orta pensiyanın məbləği sahəsində Rusiyadan və Qazaxstandan çox-çox GERİDƏDİR. Vaxtı ilə xarici dillər univeristetində fransız dili müəllimi olmuş, bu gün isə prezident taktika ustası olan prezidentin müşaviri olan Novruz Məmmədov xarici agentliklərdən birinə təntənəli surətdə bildirib ki, “Azərbaycan regionun lideridir”. Novruz Məmmədov dərin yuxuya qərq olmuş insana bənzəyir! Oyanmır. Yatıb, əziz oxucu! 2008-ci il avqustun 8-dən sonra Cənubi Qafqazda baş vermiş dərin dəyişiklikləri sezməmiş dərəcədə yuxuya qərq olan rejim hələ də köhnə və çeynənmiş ifadələri təkrarlamaqdan başqa çıxış yolu tapa bilmir. Strategiya və taktikanın qələbəsi buradan açıq-aydın görünmürmü, əziz həmyerlilər?

Görünür, özü də necə!

Araşdırmaçı Jurnalistlərin Azərbaycan Şəbəkəsinin əməkdaşı Şəhla Abusəttar “gələcəyimizin özülünü qazırlar” dedikdən sonra “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı pöroqramının icrası”na toxunur və deyir: “Nazir Misir Mərdanovun söz verdiyi kimi, nə vahid təhsil-informasiya mühiti yarandı və 10 000 iş yeri açıldı, nə də nazirin hesabatlarda saxta rəqəmlərlə anlatdığı kimi, 28 şagird - 1 kompüter nisbətinə nail olundu. Arada Azərbaycan xalqının bir çox başqa dərdlərinin çözülməsinə xidmət edə biləcək 30 milyon manat (təxminən 35 milyon dollar) xərcləndi, it-bata düşdü.” Və sözünə yekun vurub deyir: “Artıq bəllidir ki, dövlət büdcəsi Azərbaycan dövlətindən daha çox, “Azərbaycan hökumətinin cibi” kimi anlaşılan məfhuma çevrilib. Ona görə ki, ordan nəyin hara və necə xərcləndiyi barədə dövlətin əsl sahibi olan xalqa hər hansı açıqlama verilmir.” Taktikanın məərifəti bununla bitmir. Strategiyanın davamı olaraq seçki filminin bizi sovet hakimiyyəti illərinin ən “parlaq” dövrlərini xatırladan yeni seriyası başlayır. Bakı şəhər maarif idarəsinin müdiri Nailə Rzaquliyeva maarif işçilərinin bu günlərdə keçirilən konfransında vaxtı ilə partiya və komsomol işçilərinin “yüksək ruhlu” nitqlərində istifadə etdikləri ifadələrdən məharətlə istifadə edib bildirir ki, “Bakı maarif sistemində çalışanların hamısı qarşıdan gələn prezident seçkilərində İlham Əliyevin namizədliyini müdafiə edəcəklər”. Qeyd edək ki, bakı şəhərindəki ümumtəhsil müəssisələrində təxminən 34 min adam işləyir. Deməli, Nailə xanım Rzaquliyeva prezident seçkisindən iki ay qabaq 34 min seçicinin adından İlham Əliyevə səs verir. Bu, strategiyanın davamı olan taktikanın bariz nümunəsidir. Azərbaycan irəliyə yox, geriyə addımlayır.

Nardaran, yoxsa Qarabağ?

Azərbaycanda heç bir şey təsadüfi olmur. Azərbaycanda heç bir söz təsadüfi deyilmir. Azərbaycanda heç bir hərəkət təsadüfi həyata keçirilmir. Azərbaycan təsadüfün mövcud olmadığı bir ölkədir. Burada hər şey məqsədyönlü və düşünülmüş tərzdə olur. Prezidentliyə namizədlərdən biri olan Qüdrət Həsənquliyev “Day.az” saytının internet radiosunda çıxış edərkən İlham Əliyevə meydan oxuyaraq bildirib ki, Azərbaycan Dağlıq Qarabağdan qabaq Nardaran kəndində suverenliyini bərpa etməlidir”. Qəribə deyilmi, əziz oxucu? Qüdrət Həsənquliyev bu fikirlə nə demək istəyir? Demək çətindir. Qarabağ ermənilərin işğalında olan Azərbaycan torpağıdır. Nardaran Bakı kəndlərindən biri və Azərbaycanın suveren hüquqları çərçivəsində yaşayan bir kənddir. Bu kəndin yeganə günahı Bakı kəndlərinin yerli əhalidən təmizlənib torpaqlarının satılmasına müqavimət göstərməsidir. Qüdrət Həsənquliyev Nardaranda Azərbaycan suverenliyinin bərpasının Qarabağdan da mühüm əhəmiyyət kəsb etdiyini bildirməklə nəyi qəsd etdiyini təxmin etmək olar, amma belə görünür ki, prezidentliyə namizədin mətbuatın yazdıqlarından xəbəri yoxdur. Xəbəri olsaydı, bu cür iddia ilə çıxış etməzdi. “Yeni Musavat” qəzeti bu günlərdə yazırdı ki, Nardaran sakinləri ABŞ-ın Azərbaycandakı keçmiş səfiri Stenli Eskuderonun Nardaran ərazilərinin 30 hektar torpaq sahəsini zəbt etməsi ilə əlaqədar məhkəməyə müraciət etmişlər. Nardaran sakinləri bildirirlər ki, bu torpaq sahələri sakinlərin əlindən zorla alınmaq istənilir və bunun arxasında yüksək çinli məmurlar dayanır. Maraqlı deyilmi, əziz həmyerlilər? Qüdrət Həsənquliyev Nardaran Azərbaycanın suverenliyini bərpa etməyə çağırır, Nardaran sakinləri Azərbaycan məhkəməsindən ədalət umur, hansısa şəxslər Azərbaycan vətəndaşları olan Nardaran sakinlərinin torpaq sahələrini zorla mənimsəmək istəyirlər. Bura Azərbaycandır, Qüdrət bəy!

Fərdi heysiyyət, milli heysiyyət

İrlandiya yazıçızı Corc Bernard Şou bu cür “strategiya” və “taktika”nın, yəni insanların və millətlərin heysiyyəti ilə oynamağın nə qədər təhlükəli olduğunu belə izah edir: ““Sağlam insan öz onurğasını hiss etmədiyi kimi, sağlam millət də öz milliyyətinə fikir vermir. Ancaq, əgər onun milli heysiyyətini sarsıtsaniz, millətin yeganə amalı onu bərpa etməkdən ibarət olacaq. Millətçilərin tələbləri təmin olana kimi millət heç bir islahatçınin, heç bir filosofun və heç bir vaizin sözünə qulaq asmayacaq. Və hər nə qədər təcili işi olsa belə millət birləşmək və azadlığa nail olmaq amalından başqa heç bir işlə məşğul olmayacaq.” “Sağlam insan” və “sağlam millət”...

Mirzə Xəzər
12.09.2008

“Bu, bizim Vətənimizdir!”

Mirzə Xəzər — Tue, 02 Sep 2008 23:09:43 -0400

Yalançılıq sənəti, sərbəstlik dərdi, inkişaf hekayələri

Yalan cəmiyyətin ən aşağı pillələrində olduğu kimi ən yüksək səviyyələrində də dəbdədir. Aldatma və aldanma virusa çevrilib kabus kimi yorulmadan başımızın üstündə gəzir, cəmiyyəti çürüdür, dəhşət saçır, mənəviyyatı amansızcasına pozur, əxlaqı yox edir, şüura yeriyir, ləyaqəti alçaldır, qüruru məhv edir, qardaşı qardaşa, atanı övlada, ananı balasına düşmən edir. Yalan sənətdir, əziz oxucu! Dünənki lümpenləri inanılmaz sərvətlərin sahibinə çevirən də yalan sənətidir. Bəli, yalan sənətdir. Yalan qazandırır, yalan idarə edir, yalan cəmiyyətdə söz sahibinə çevrilir. Yalan milli şüuru çürüdür, millətin formalaşmasının qarşısını alır, vətənpərvərliyi zəiflədir, inamı sarsıdır, ideoloji boşluğu dərinləşdirir.

“Azadlıq deməkdən,
yırtılan boğazıyla.
Cəhənnəm qışıyla,
Cənnət yazıyla.
Bol-bol ciblərə dolan,
Neftiylə, qazıyla.
Bu bizim Vətənimizdir!”

(Nüsrət Kəsəmənli)

*************
Bəli, əziz oxucu, yalan sənətdir. Bu sənətə yiyələnmək üçün qeyri-adi xüsusiyyətlərə sahib olmaq, sahib olmadıqda isə yiyələnmək üçün gecə-gündüz qeyrət sərf etmək lazımdır. Kobud səhvi üzündən həm Gürcüstanı, həm də bütövlükdə Cənubi Qafqazı bəlaya salan, ölkəsinin parçalanmasına yol açan Mixail Saakaşvili avqustun 31-də jurnalistlər üçün hazirladığı növbəti uzun monoloqunda söz verib ki, Gürcüstan Rusiyaya qalib gələcək. Müdrik kəlamdır. Ondan qabaq Saakaşvili hökuməti Rusiya ilə təmaslarda vasitəçi olmağı Amerikanın dövlət katibi Kondoliza Raysdan xahiş etmişdir. Bəs qələbə? Artıq sual verməyin, hörmətli oxucular!

***********

Prezidentin İcra Aparatının Siyasi təhlil və informasiya təminatı şöbəsinin müdiri Elnur Aslanov bu günlərdə bildirib ki, «Azərbaycan prezidenti İlham Əliyev medianın sərbəst fəaliyyəti üçün geniş şərait yaradıb» və prezidentin qayğıları nəticəsində “ölkədə medianın sərbəst fəaliyyəti üçün əlverişli mühit var.” Elnur Aslanovun iddiasında həqiqət payı vardır. Prezidentin sərəncamına əsasən ölkənin 38 dənə seçmə (seçilmiş) mətbuat orqanının hər birinə 5 000 manat pul hədiyyə verilib. Hələ hamısı almayıb, ancaq alanlar sevindiklərini gizlətmirlər. Məsələn, “525-ci” qəzetin baş redaktoru Rəşad Məcid arxayın tərzdə deyib ki, “qəzetimizə ayrılan 5 min manatı almışıq da, xərcləmişik də…” Doğrudan da “medianın sərbəst fəaliyyəti üçün (Azərbaycanda) geniş şərait yaradılıb”. Belə sərbəst mətbuatın əsər-əlamətinə heç Latın Amerikasında da təsadüf etmək qeyri-mümkün olan işdir.

**********

Bu günlərdə “Bibiheybət” məscidində Qafqaz Müsəlmanları İdarəsinin, Dini Qurumlarla İş üzrə Dövlət Komitəsinin, deputatların birgə iştirakı ilə toplantı keçirilib. Maraqlı toplantıdır. Maraqlı fikirlər söylənib. Məsələn, Qafqaz Müsəlmanları İdarəsinin qazisi, hörmətli Hacı Mirqiyas çıxışında deyib ki, “Azərbaycan dövlət müstəqilliyini 1991-ci ildə yox, 1969-cu ildə Heydər Əliyev hakimiyyətə gələndə qazanıb və H. Əliyevin iki miras qoyub, bunlardan “cansız miras” - müstəqillik, canlı miras isə İlham Əliyevdir.” Möhtərəm Hacı Mirqiyasla mübahisə etmək niyyətində deyilik. Yeni Azərbaycan partiyası artıq 15 ildir bu saxta faktı durmadan təbliğ edir və insanların şüuruna həkk etməyə çalışır. Azərbaycanın 1991-ci ildə Ayaz Mütəllibov prezident olanda yox, 1969-cu ildə Heydər Əliyev sovet rəhbərliyi tərəfindən Azərbaycan Kommunist Partiyası Mərkəzi Komitəsinin 1-ci katibi vəzifəsinə gətiriləndə dövlət müstəqilliyini qazandığına dair bu yeni tarixi “fakt” xarici ölkələrin tədqiqat mərkəzlərində son 40 ildə aparılan bütün araşdırmaları, yazılan əsərləri, buraxılan kitabların hamısını altüst etməyə bilməz. Çünki, bu fakt həqiqətə uzğundursa, deməli 1969-cu ildə Heydər Əliyev Azərbaycanda kommunist partiyasına rəhbərlik etməyə başladıqdan sonra “Sovet İttifaqı” adlı fövqəldövlət ümumiyyətlə yerli-dibli mövcud olmayıb! Yeni Azərbaycan partiyasının irəli sürdüyü bu iddia doğrudursa SSRİ 1991-ci ildə deyil, 1969-cu ildə
dağılıb. Çox maraqlıdır…

**********

Bunların hamısı bir yana, Azərbaycan həqiqətən sürətlə inkişaf edir. Bunu İlham Əliyev də təsdiq edib. Azərbaycan prezidenti Asiya və Sakit okean ölkələrinin xəbər agentlikləri təşkilatının (OANA) İcra Komitəsinin çərşənbə axşamı Bakıda keçirilən 30-cu iclasının iştirakçılarını qəbul edərkən bildirib ki, “son bir neçə ildə iqtisadi artım sürətinə görə Azərbaycan dünyada birinci yerə (liderlik mövqeyinə) çıxıb”. Böyük nailiyyətdir. Sevindirici haldır. İqtisadiyyatdan başımız çıxmadığı üçün prezidentlə mübahisə etmək istəmirik. Azərbaycanın iqtisadi cəhətdən güclü olması, əhalisinin firavanlığa qovuşması hər kəsin arzusudur. Ancaq bir neçə söz deməyi özümüzə borc bilirik. Əvvələn bu iqtisadi artımın yalnız neft sənayesi sayəsində mümkün olduğunu söyləyən səriştəli iqtisadçılar çoxdur. Yəni onlar deyirlər ki, Azərbaycan iqtisadiyyatı birtərəfli inkişaf edir. Bir də deyirlər ki, bu təktərəfli inkişafın əhalinin maddi-sosial vəziyyətinə təsiri azdır. Habelə söyləyirlər ki, son bir neçə ildə əhalinin təxminən 45 faizi hələ də yoxsulluqla çarpışmaqda davam edir. İnsanın dili dinc durmur. Göründüyü kimi iqtisadçıların işi-gücü qurtarıb, gah nala vururlar, gah mıxa…

************

Iqtisadçılar nal ilə mıx arasında qalıb vurnuxurlar! Azərbaycan respublikasının dövlət statistika komitəsinin məlumatına əsasən, son bir neçə ildə iqtisadi artım sürətinə görə dünyada birinci yerə yüksələn Azərbaycan iqtisadiyyatına xarici şirkətlərin və maliyyə institutlarının investisiyaları (sərmayə qoyuluğu) 2007-ci illə müqayisədə 10 faiz azalıb. Məsələn, ötən ilə nisbətdə ABŞ şirkətləri Azərbaycan iqtisadiyyatına 17, 2%, Yaponiya şirkətləri 18, 9%, Almaniya şirkətləri isə 52, 3% az sərmayə qoymuşlar (Day.az agentliyi). Məlumdur ki, istər xarici, istərsə də yerli sərmayələr yeni iş yerlərinin açılması üçün mühüm əhəmyyət kəsb edir. Bu azalmanın səbəbini dövlət statistika komitəsi açıq söyləmir. Ancaq Azərbaycan hökumətinin bu təmayülün üstündən susaraq keçməsi ona dəlalət edir ki, bu tənəzzül onları narahat etmir. Nə üçün? Bilmirik, bu arxayınçılığın səbəbi bizə məlum deyildir. Bəlkə başımız çıxmır…

***********

Azərbaycan həqiqətən sürətlə inkişaf edir. Məsələn, Türkiyə şirkətlərinin 2007-ci illə müqayisədə Azərbaycan iqtisadiyyatına 18, 7% az sərmayə qoymasına baxmayaraq, Azərbaycan şirkətlərinin Türkiyə iqtisadiyyatına qoyduqları sərmayənin həcmi sürətlə artmaqdadır. Daz.az agentliyi Türkiyənin ANKA informasiya agentliyinə istinadən xəbər verir ki, cari ilin birinci yarısında Azərbaycan İstanbulun iqtisadiyyatına sərmayə qoyan ölkələr arasında üçüncü yerə çıxmışdır. Sevindirici haldır. Amma bu yalnız İstanbuldur və ancaq başlanğıcdır. “Rota Haber” bu ilin əvvəlində Britaniyanın “Financial Times” qəzetinə istinadən yazırdı ki, “rus və ərəb sərmayəsindən sonra Azəri zənginləri də Türkiyəni kəşf etdi.” Qəzetin sevincini başa düşmək və təqdir etmək olar. Məlumatda deyilir ki, Azərbaycan Dövlət Neft Şirkəti Türkiyənin enerji sahəsinə 10 milyard dollar sərmayə qoymağı planlaşdırır. Qəzet bunu “petrol onlarda, parası bizdə” şəklində şərh edir. Bu cür şərhi Azərbaycan şirkətlərinin və varlılarının sərmayə qoyduqları hər bir xarici ölkənin mətbuatı sevinə-sevinə yaza bilər. Kim sevinməz! Bəs Azərbaycan? Bu sərmayə niyə Azərbaycan iqtisadiyyatına qoyulmur? Yersiz sualdır, əziz oxucular! Çünki bunların hamısı inkişafın göstəricisidir.

************

Nədən başladıq, nə ilə qurtardıq. Həyat çox mürəkkəbdir, onun sirrləri Allahdan başqa heç kimə məlum deyildir.

Allah Orucunuzu qəbul eləsin, əziz həmyerlilər!

Mirzə Xəzər
04.09.2008

Azərbaycan fenomeni: Hafiz Paşayev ateizmlə dünyəviliyi çaşbaş salıb

Mirzə Xəzər — Mon, 25 Aug 2008 10:58:53 -0400

İşsiz prezidentlər, nikbin əcnəbilər, sürreal xoşbəxtlik

Avropa Şurası baş katibinin Azərbaycandakı xüsusi nümayəndəsi Veronika Kotek Bakının xəzrisinsən ilham, gilavarından vəhy alan anlarında üzünü Xəzərin qurğuşun rəngli sularına tərəf tutub və nida edərək müdrik bir kəlam söyləyib: “Prezident seçkiləri Azərbaycanın nəyə qadir olduğunu göstərmək üçün bir fürsətdir”. Oxudunuzmu, əziz oxucular? Avropa Şurası baş katibinin Azərbaycandakı nümayəndəsi Veronika xanım Kotek hələ də bizim nəyə qadir olduğumuzu oxuyub öyrənə bilmədiyini açıq büruzə verir. Hörmətli Veronika xanım, Azərbaycanın nəyə qadir olduğunu gözlərinizlə görməniz üçün seçki gününü gözləməli deyilsiniz. Yox! Qüdrətimiz göz qabağındadır! Deyin görüm, dünyanın özünü demokratiya beşiyi adlandıran hansı məmləkətində bir dənə prezdent yerinə 18 namizəd qeydə alınıb? Hələ bu bir yana dursun, deyin görək, özlərini demokratiya beşiyi adlandıran hansı dövlətdə 3-4 nəfər işsiz vətəndaş prezident vəzifəsinə namizəd kimi qeydə alınsın? Veronika xanım, lütfən cavab verin! Çətindirmi? Sizi başa düşürük. Əlbəttə çətindir. Çünki dünyanın altından girib üstündən çıxsanız da, yer kürəsinin səkkiz guşəsini qarış-qarış gəzsəniz də, işsizlərin prezidentliyə göz dikdiyi ikinci ölkəyə heç bir yerdə rast gəlməzsiniz. Çünki dünyada ancaq bir dənə belə məmləkət vardır – Azərbaycan! Çünki, Azərbaycan nəyə qadir olduğunu seçkini gözləmədən indidən dünyaya göstərir.

Bəli, əziz oxucu, biz, sürreal kainatın xoşbəxt bəndələriyik. Bizdə hər şey fərqlidir. Biz heç kimə bənzəmirik. Bizə hakim kəsilən “seçilmişlər”in də bu kainatda tayı-bərabəri, oxşarı-bənzəri yoxdur və ola da bilməz. Biz, 20-ci əsrin 70-ci illərindən bu yana “iri addımlarla” iki inkişaf mərhələsini yaşayan Allahın zavallı bəndələriyik. Birinci inkişaf mərhələsində 20-ci əsrin 70-ci illərində qırmızı biletli “milli qəhrəmanlarımız” bizi dəyənək və yumruqla qova-qova “iri addımlarla” kommunizm “cənnətinə” sürükləyirdilər. İkinci inkişaf mərhələsində, 21-ci əsrin əvvəllərində qırmızını yaşıla dəyişən “seçilmişlər” biz zavallı kəmsavadları təpiklə “iri addımlarla”, dünyanın ən uca, əlçatmaz inkişaf zirvəsinə çatdırmaq üçün əlləşirlər. Qırmızı və yaşıl bütlərə sitayış edən “seçilmişlər”in fədakarlığına bir tərəfdən valeh qalırsan, o biri yandan qibtə edirsən. Aynur adlı oxucumuz “Bakı gözəlləşir...” sərlövhəli məqaləyə şərhində fəryad edərək yazır: “ Mirzə bəy, millətin düşünmə qabiliyyətini məqsədyönlü şəkildə ATVlər, BTVlər, CTVlər və sair XTVlər vasitəsilə əlindən alıblar. Buna ağ ölüm deyirlər ki, bioloji ölümdən qat-qat faciəlidir! Varsan və varlığını sübut edə bilmirsən! Mənəviyyatın əldən gedir, torpağın əldən gedir və efirlər səni necə inkişaf etmiş dövlətdə yaşadığını bar-bar bağırır!” Bağırırlar, Aynur xanım, bağırırlar və onlar hələ uzun müddət bağıracaq, biz isə fəryadımızı içimizdə boğa-boğa sürünəcəyik.

Biz doğrudan da seçilmişlərimizin bizim üçün yaratdıqları sürreal cənnətin “xoşbəxt”
bəndələriyik. Çünki, Azərbaycanda “varsan və varlığını sübut edə bilmirsən!” Aynur xanım haqlıdır. Avqust ayının əvvəllərində Bakıda Azərbaycan Respublikası Xarici İşlər Nazirliyinin Diplomatiya Akademiyasının təşəbbüsü ilə “Azərbaycanlılar və amerikalılar: biz biri-birimizi necə görürük” mövzusuna həsr edilmiş beynəlxalq konfrans keçirildi. Amerikanın tanınmış “poligazette.com” bloqunun sahibi və baş redaktoru Maykl van der Qalien də konfransa dəvət edilmiş jurnalistlərin arasında olub və öz təəssüratlarını “Azərbaycanda din” adlı yazısında qələmə alıb. Maraqlı yazıdır. Bu yazını oxuyan azərbaycanlının amerikalıların bizi necə gördüklərini yox, bizim diplomatlarımızın azərbaycanlıları amerikalılara və xarici dünyaya necə təqdim etdiklərinı görəndən sonra rahat yata biləcəyini təsəvvür etmək çətindir. Maykl van der Qalien yazır: “ Azərbaycanın Amerika Birləşmiş Ştatlarındakı keçmiş səfiri cənab Hafiz Paşayev xarici jurnalistlərə bildirdi ki, azərbaycanlıların əksəriyyəti Allaha inanmır... Hafiz Paşayevin sözlərinə görə, məsciddə dua edən gənclərin öz dinlərindən xəbərləri yoxdur. Onlar ancaq valideynlərindən eşitdiklərini bilirlər. Hafiz Paşayev dedi ki, heç kim Quranın buyuruqlarını bilmir. Cənab Hafiz Paşayevin bu cür dünyəviliklə iftixar etdiyi aydın görünürdü.” Bəli, əziz oxucu! Amerikanın hər bir prezidenti əlini Bibliyaya basıb and içməklə, Türkiyənin baş naziri Rəcəb Tayyib Ərdoğan öz vətəndaşlarının dinə bağlılığı ilə fəxr edir, Amerika ilə Avropa Ərdoğanı alqışlayır,
Hafiz müəllim isə azərbaycanlıların əksəriyyətini ateist adlandırmaqdan həzz alır. Təəssüf! Bu cür təbliğat üsulu artıq tarixə qarışan sovet dövründə tez-tez tətbiq olunurdu. Belə təəssürat oyanır ki, Hafiz Paşayev və digərləri 1978-ci ildə SSRİ-də öyrəndiklərini 2008-ci ildə müstəqil Azərbaycanda hələ də tətbiq etmək əzmindədirlər.

Qəribədir, amma həqiqətdir. Təhminə Buxari adlı bir oxucu poligazette.com bloqunda Hafiz Paşayevin iddialarına cavab verib yazır: “Bir millətin tarixini və dinini inkar etmək dünyəviliyin fəxr ediləsi cəhəti sayıla bilməz. Görəsən İslamdan xəbərdar olmaq və Quranda yazılanları bilmək hər hansı bir şəxsə dindar və yaxud ekstremist damğası vurmaq üçün kifayətdirmi?” Təhminə Buxari yazır ki, yox, bu səhv düşüncədir. Əksinə, bəzilərinin ekstremizm və fanatizm yolunu seçməsinə səbəb olan amillərin başında dindən xəbərsizlik, İslamı kifayət qədər dərindən bilməmək və eyni zamanda həyat şərtlərinin ağırlığı, yoxsulluq gəlir. Təhminə Buxari Hafiz Paşayevə müraciət edərək fikir və hökm yürüdərkən ehtiyatlı olmağı məsləhət görür. Bəli, əziz oxucular, biz doğrudan da sürreal, qeyri-real dünyada yaşayırıq!

Mirzə Xəzər
25.08.2008

MİRZƏ XƏZƏR: “AZƏRBAYCANDA MÜSTƏQİL MƏTBUATIN OLDUĞUNA İNANMIRAM”/Mirzə Xəzər Versiya.az saytının oxuсularının suallarını cavablandırır

Mirzə Xəzər — Mon, 18 Aug 2008 16:36:45 -0400

“Polisi xalqla düşmən olmağa məcbur edənlər “parçala hökm et” düsturuna əməl edirlər”

Mirzə Xəzər Versiya.az saytının oxuсularının suallarını cavablandırır

Tural: Mirzə bəy Azərbaycanda baş verən son hadisələr barədə nə deyə bilərsiz? Nə zaman bizim müxalifət normal müxalifət olub Azərbaycanı demokratiyaya qovuşduracaq? Yoxsa elə belə də davam edəcək?

Cavab: Azərbaycandakı vəziyyət və ölkədə gedən proseslər təkcə müxalifətin fəaliyyəti yaxud fəaliyyətsizliyi ilə əlaqədar deyildir. Azərbaycanı bu günə salan və bütün mövcud eybəcərlikləri qidalandıran, mənəviyyatı pozan, ləyaqəti alçaldan, insan qürurunu sındıran, fərdləri dəyərsiz “dəyərlərə” möhtac gününə salan - mövcud siyasi sistem və bu sistemin təməlini təşkil edən korrupsiyadır. Müxalifəti müxalifətçilikdən məhrum edən, müxalifəti fəaliyyətsizliyə düçar edən də əvvəlcə sadaladığım fəsadlardır. Müxalifət bu fəsadlar qarşısında gücsüzlüyünü, acizliyini açıq nümayiş etdirdi. Belə müxalifət Azərbaycanı demokratiyaya qovuşdura bilməz.

Hun: Bu böhrandan çıxış yolunu görürsünüzmü? Qarabağımızın, bütün yurdumuzun taleyi yanlış əllərdə deyilmi?

Cavab: Böhrandan çıxış yolu oyanışdadır. Ölkəni böhrandan ancaq xalqın oyanışı, ziyalıların oyanışı, fərdlərin oyanışı çıxarda bilər ki, bu gün bu oyanışın əlamətlərinə təsadüf etmək mümkün deyildir. Qarabağın və yurdumuzun taleyi indi yox, çoxdan yanlış əllərdədir. Daha doğrusu yanlış məqsədlərə və yanlış dəyərlərə xidmət edənlərin əlindədir.

Hun: Mirzə Xəzər. Bu insan əbədi olaraq mənim şurumda bir vətənsevər şəxs olaraq həkk edilmişdir. Belə insanlara Azərbaycan hakimiyyətinin önəm verməməsi və ya sıxışdıması nəticəsində xalq acınacaqlı durumdadır.

Cavab: Mənə belə yüksək qiymət verdiyiniz üçün sizə minnətdaram.

Aqil Mahmudov: Salam Mirzə müəllim. Necəsiniz.Yoldaşınız ovladlarınız necədir. Sizə minnətdaram ki, məni mətbuatın tanınmış simalarından biri etmisiniz. Sizi hər zaman bir müəllimim kimi dəyərləndirirəm. Mirzə müəllim mən hal-hazırda “Həftəlik Azərbaycan” adlı qəzetin rəhbəriyəm və imkanlarımdan istifadə edib sizə bir sualım olacaq. Mirzə müəllim, Siz Azərbaycanda müstəqil mətbuatın olmasına inanırsınızmı? İkinci sualım isə, Sizin Azərbaycanın indiki hakimiyyətinə qarşə münasibətinizi öyrənmək istərdim. Bütün göyçaylıların salamını sizə çatdırıram. Hörmətlə aqilm@rambler.ru

Cavab: Aqil salam! Çoxdandi səndən xəbərim yox idi. Yüksəlməyin məni sevindirir. Suallarına cavab verim: 1) Yox, mən Azərbaycanda müstəqil mətbuatın olduğuna inanmıram, 2) Mənim Azərbaycanın indiki hakimiyyətinə qarşı münasibətim yoxdur. Bütün göyçaylılara məndən salam söylə!

Eldəniz: Salam Mirzə müəllim, siz xaricdə niyə bir TV yaratmırsınız? Buna pulunuz çatmır? Əgər pul probleminiz varsa, bunun həlli yolları barədə düşünmüsünüzmü? Ümumiyyətlə, bir hesablama aparmısınızmı Azərbaycanın hüdudlarından kənarda bir TV yaratmaq və o TV-ni işlətmək üçün nə qədər pul lazımdır?

Cavab: Salam Eldəniz! Mən xaricdə TV yaratmağı heç düşünməmişəm. Mən realist adamam, xəyalpərəstlikdən uzağam. TV açmaq və işlətmək üçün külli miqdarda vəsait lazımdır. Mənim belə vəsaitim yoxdur. “Həlli yollarını axtarmaq” - başqalarından vəsait, pul istəmək deməkdir. Bunu da bacarmıram. Kimdənsə və ya kimlərdənsə pul istəmək xasiyyətimə ziddir. Mən həyatımda atamdan başqa heç kimdən pul istəməmişəm. Xaricdə TV-ni işlətmək üçün nə qədər pul lazım olduğunu mən bilmirəm. Cənubluların Çikaqoda GünAz telekanalı fəaliyyət göstərir və onların yardım üçün yaydıqları müraciətdə dediklərinə görə bu telekanalın ayda 40 000 ABŞ dolları qədər xərci var.

Murad: Hörmətli Mirzə Xəzər. Məni çox düşündürən sual budur ki, siz dünya görmüş bir şəxsiyyətsiniz. Azərbaycanda rüşvət almaq, vermək dəbdir. Bugün Azərbaycanda rüşvət alanlar sizə elə gəlmirmi ki, şərəfsizdir.

Cavab: Salam Murad! Rüşvət almaq ümumiyyətlə şərəfli iş, şərəfli əməl deyildir.

Murad: Mirzə Xəzər. Mənim sizə bir sualim var. Azərbaycanın gələcəyini necə görürsünüz? Azərbaycanı idarə etmək qabilliyətinə məxsus olan müxalifət lideri tanıyırsınızmı?

Cavab: Arzu edirəm Azərbaycanın gələcəyi parlaq olsun. Azərbaycanı idarə etmək qabiliyyətinə malik şəxslər təkcə müxalifətdə deyil, müxalifət xaricində də çoxdur.

Elvin, “Müsavat” Gənclər Təşkilatı: Salam, necəsiniz? Xaricdə yaşayan vaxtı Vətən üçün heç darıxırdınız? Xahiş edirəm bu barədə xəbər vərərdiniz. Sag olun.

Cavab: Salam Elvin. Çox sağ ol, yaxşıyam. Xaricdə yaşadığım hər zaman, hər an Vətən üçün darıxmışam və darıxıram.

Mehdi: Salam hörmətli Mirzə müəllim. Sizi çox sevirik. Siz həmişə bu xalqın düşmənlərinə qarşı öz səsinizlə mübarizə aparmısınız. İndi Azərbaycanda rüşvətxorluq, qohumbazlıq baş alıb gedir. Təkcə daxili işlər naziri Ramil Usubovun tayfasından 50 nəfər DİN sistemində çalışır, polis öz xalqına düşmən kimi baxır. Xalq da polisini “it” deyə çağırır. Sizcə bu, bütün polislərin günahıdır? Axı onlar da azərbaycanlıdır. Polisi xalqla düşmən olmağa kimlər və nə üçün məcbur edirlər.

Cavab: “Parçala hökm et” kəlamı romalılardan qalıb və bu gün də dünyanın bir çox yerlərində, o cümlədən Azərbaycanda tətbiq olunur. Bu düsturu həyatda tətbiq edib ölkəni asanlıqla idarə etmək üçün cəmiyyətin bütün silk və təbəqələrini bir-birinə düşmən etmək lazım gəlir. Polisi xalqla düşmən olmağa məcbur edənlər də “parçala hökm et” düsturuna əməl edirlər.

Soviet: Mirzə müəllim niyə SSRİ-ni dağıtmağa kömək etdiz, biz indi yaşamırıq, heç olmasa o ölkədə yasayırdıq axı, Siz orda tox Avropada kef edirsiz, biz isə burada zülm çəkirik.

Cavab: Soviet salam! Çox təəssüf edirəm. Əgər nəticəsini qabaqcadan bilsəydim, orada işləməzdim. SSRİ-ni isə mən yox, Qorbaçov dağıtdı.

Tofik bəy, Almaniya: Hörmətli Mirzə müəlim!!! Sizə bütün dünyada yaşayan azərbaycanlılar inanır və sizin fikrinizi həvəslə dinləyir. Mənim sualım bundan ibarətdir. Sizcə prezident seçkiləri ilə bağlı Azərbaycanda gedən bu oyunlar nə vaxt öz həqiqi demokratik adına layiq olacaq və ümumiyyətlə, Siz Azərbaycanın gələcəyini necə görürsüz?

Cavab: Hörmətli Tofik bəy salam. Neft ölkəsi olan Azərbaycanda mövcud olan avtoritar rejimin əsasını kobud güc və misilsiz maliyyə imkanları təşkil edir. Neftdən asılı olan Qərbin demokratik ölkələrini sabitliyi qoruya bilən hakimiyyət təmin edir. Azərbaycanda bu gün hər şey idarə olunur. Ölkədə ictimai rəy də, ictimai güc də artıq mövcud deyildir. Bu səbəbdən, Azərbaycanda gedən bu seçki oyunları, digər oyunlar kimi, çox təəssüf ki, hələ davam edəcək.

Renat: Dünyanı 4 güc idarə edir. Siz hansı gücün ədalətli idarəetməsini qəbul edirsiniz? Səmimi olmayıb cavab verməyə də bilərsiz.

Cavab: Salam Renat. Mən səmimi adamam. Mən dünyanın heç bir gücünün bütün dünyanı ədalətli idarə etməsinə inanmıram.

Adil: Nəçənci ildən MKİ ilə əməkdaşlıq edirsiniz?

Cavab: Adil salam. Məzəli sual vermisən. İki tarix verəcəm, ürəyinə yatanı qəbul et: 29.10.1947 və 20.01.1990.

İlham: Niyə Amerika mətbuatında Cənubi Azərbaycan hadisələrindən həç nə yazmırlar?

Cavab: İlham, Amerikada minlərlə cənublu yaşayır və onların əksəriyyəti savadlı, ziyalılardır. Amerika mətbuatını hərəkətə gətirmək lazımdır. Onlar Amerika mətbuatı ilə işləməyi öyrənməlidirlər.

Eldar: Salam Mirzə müəllim. Prezident seçkisi haqda nə deyə bilərsiniz?

Cavab: Salam Eldar. Prezident seçkisinin nəticəsi indidən bəllidir. Azərbaycanda bu gün bu gülünc vəziyyəti dəyişməyə qadir olan qüvvə yoxdur. Başqa söz deməyə dəyərmi?

Şahlar: Salam Mirzə müəllim. Öncə sizi salamlayıram. Siz Sovet dövründə çox məşhur idiniz, Sovet dövrünün bütün eybəcərliklərini göstərə bilirdiniz. Amma indi doğma ölkənizdə belə siyasətdə deyilsiniz və Azərbaycanda müxalifət yoxdur. Var amma köhnə müxalifətdir. Köhnə fikirlərlə oturub dururlar. Mən sizi siyasətdə görmək istərdim. Hətta prezident görmək istərdim. Sual 1) Daha Amerikaya gərək deyilmisiniz? Sovet dövrü bitdi və onunla Mirzə Xəzər bitdimi? 2) Niyə Azərbaycanda fəal müxalifətə qoşulmursunuz? Müxalifətin güclüsü “Müsavat” idi, o da daha heç nə edə bilmir və köhnəlib.

Cavab: Salam Şahlar! Mənə böyük qiymət verdiyin üçün çox sağ ol. Suallarına cavab verim: 1) Düz deyirsən, mən daha Amerikaya gərək deyiləm. Haqlısan, Sovet dövrü bitdi, Mirzə Xəzər də bitdi. 2) Hansı müxalifətə? Özün yazırsan ki, Azərbaycanda müxalifət yoxdur. Bəs yoxdursa, mən hansı müxalifətə qoşulum?

Xaqani: 1) Azadlıq radiosunun hazırkı fəaliyyətindən razısınızmı? 2) Mənim üçün maraqlıdır - 1990-ci il 20 Yanvardan sonra radioda “Azərbaycandan gələn səslər” proqramı niyə qəfildən bağlandı? Mən uşaq idim, amma yadımdadı ki, atam buna görə möhkəm əsəbləşmişdi. İndi bunun səbəbini aça bilərsinizmi? Qabaqcadan təşəkkür edirəm.

Cavab: Salam Xaqani. Suallarına keçim: 1) Mən 2003-cü ildə oradan ayrılandan sonra radionun verilişlərinə qulaq asmamışam. Bu səbəbdən qiymət verə bilmərəm. 2) “Azərbaycandan gələn səslər” verilişi çox populyar veriliş idi. 1990-cı ilin Yanvar faciəsi günlərində efirə verdiyim verilişlər Radionun Vaşinqtondakı rəhbərliyini, eyni zamanda hökumət dairələrini çox narahat etmişdi. SSRİ hökuməti dəfələrlə Vaşinqton hökumətinə və radionun rəhbərliyinə etiraz notaları göndərmişdi. Bu səbəbdən, yanvar şəhidlərinin qırxı bitəndən sonra verilişlər normal məcraya qayıdanda, Vaşinqtonda yaradılmış xüsusi komissiya mənim məsələmi müzakirə etməyə başladı. Yoxlama bir neçə ay sürdü. Məni işdən çıxartmadılar, amma şiddətli töhmət verdilər və verilişlər üzərində nəzarət gücləndirildi. “Azərbaycandan gələn səslər” o zaman kəsildi…

Tural: Salam Mizə bəy! Sizə sualım son dövrlər nədənsə sakit bir yerlə kifayətlənməyinizin səbəbini bilmək üçündür…

Cavab: Tural salam! Mən sakit oturmamışam. Yazıram. İnternetdə qəzetim və radiom var. Ancaq yenə də imkanlarım məhduddur.

Elçin: Salam Mirzə müəllim. Siz Quranı Azərbaycan dilinə tərcümə üzərində işləyirdiniz. Eşitdiyimə görə, nəcə oldu axırı? Sağlamlığınızda da problemlər var idi, indi necəsiniz? Hörmətlə, Münhendən Elçin.

Cavab: Salam Elçin! Mən 1989-cu ildə Qurani Kərimi tərcümə etməyə başlamışdım. Lakin Bakıda bir qrup mütəxəssisin Müqəddəs Quranın tərcüməsi ilə məşğul olduğunu öyrənəndə, niyyətimdən vaz keçdim. Mən İsveçin paytaxtı Stokholmda yerləşən Bibliya Tərcümə İnstitutunun sifarişi ilə 1975-1984-cü illərdə Əhdi Cədidin (İncil) və Əhdi Ətiqin (Tövrat) tərcüməsi üzərində işləmişəm. Əhdi Cədid (İncil) 1982-ci ildə çap edildi və sonrakı illərdə 4-5 dəfə yenidən nəşr edilmişdir. Əhdi Ətiq (Tövrat) hazır olsa da, indiyə kimi çap edilməyib. Sağlamlığım babatdı, çox sağ ol.

Mübariz S. Əzimli: Bəy, hərəmizin bir sitəsi var. Bəlkə hamımızın bir sitəsi olsa, yaxşıdır?

Cavab: Mübariz bəy! Mənə elə gəlir ki, hərəmizin bir sitəsi olsa yaxşıdı.

Biznez: Azərbaycanda biznesiniz olmamış olmaz. Əgər varsa hansı sahədədir?

Cavab: Mənim Azərbaycanda biznesim yoxdur. Olsaydı sahəsini deyərdim.

İlham: Mirza müəllim, man sizə uzun ömür, can sağlığı arzulayıram, ailənizlə birlikdə. Kaş Azərbaycanda sizin kimi kişilər çox olaydı. Ancaq çox təəssüf ki, yaltaqlar baş alıb gedir. Sizə 1 sualım var. Azərbaycan düzələcək, yoxsa kürdün ya erməninin gülü olacayıq?

Cavab: İlham salam. Cox sağ ol, sənə də ailəlikcə can sağlığı və xoğbəxtlik arzu edirəm. Sualın çox ağır sualdı. Azərbaycan çoxlarının iştahasını açıb. Nəfs ən böyük bəladır. Çox şeylər nəfsə qurban verilir. Nəfs olan yerdə müqəddəs heç bir şey qalmır.

Xəzər Mirzə: 2008-ci ilin Mirzə Xəzəriylə 1988/1990-ci illərin Mirzə Xəzəri arasındaki fərqlər nədir? (yaş fərqindən başqa). O zamanların Mirzə Xəzəri tamam başqa birisi kimi gəlir mənə.

Cavab: Əlbəttə fərq var. İşsizdir, əlində mikrofon yoxdur.

Əlincə: Hər vaxtınız xeyir olsun sayın Mirzə Xəzər. Biz gözümüzü açanadan bəri, sizi həyatnızı Azərbaycan uğrunda yanmağa fəda edən bir insan kimi görmüşük! Bu qədər mübarizədən sonra nədən hamımızın bir Vətəni olan Azəbaycanımızı, düşmən Əliyevlər bandası tərəfindən tari-mar və viran olunmasına bizim kimi seyrici qalmısınız? Vətən bizim kimi siraviləri bağışlasa da, Sizin kimi böyük ziyalını, seyrici qaldıgınıza görə bağışlamayacaq! Vətən sizdən söz gözləyir!

Cavab: Hörmətli Əlincə, çox sağ olun. Mən susmamışam, seyrçi də qalmamışam. İmkan daxilində sözümü deməyə çalışıram.

Səda: Salam Mirzə müəllim. Siz bugün Azərbaycan xalqının düsdüyi bu vəziyyətdən çıxış yolu görürsünüzmü? Xalq nə etməlidir ki, öz vəziyyətini yaxşılığa dəyişsin? Çox sag olun.

Cavab: Xalq ayılmalıdır, öz ləyaqətini qorumağı öyrənməlidir. Öz ləyaqətini, mənliyini qorumağı öyrənsə, vəziyyətini də yaxşılaşdıra biləcək.

Elvin, “Müsavat” Gənclər Təşkilatı:: Özünüz barədə məlumat verin. Ali təhsilinizi harada almısınız?

Cavab: Elvin salam! Həyat yolum budur:

Mikayılov Mirzə Kərim Oğlu (Mirzə Xəzər) 1947-ci il noyabrın 29-da Göyçay şəhərində anadan olub. 1973-cu ilin iyun ayında Azərbaycan dovlət univərsitətinin hüquq fakultəsini bitirib. 1974-cü ilin yanvar ayınadək Sumqayıtda vəkil işləyib. 1974-cü ilin iyun ayında SSRİ-ni tərk ədib, Israilə mühacirət edib. 1976-cı ilin avqust ayında Azadlıq radiosunun Azərbaycan redaksiyasına işə götürülüb. 1979-1985-ci illərdə Azadlıq Radiosu Azərbaycan Redaksiyasının redaktor müavini vəzifəsində çalişıb. 1985-ci ilin oktyabr ayında Amerika Birləşmiş Ştatlarına köçüb və Vaşingtonda Amerikanın səsi radiosunun Azərbaycan bölməsinin müdiri vəzifəsini ifa ətməyə başlayib. 1987-ci ilin fevral ayında yenidən Almaniyaya qayıdıb, Azadlıq radiosu Azərbaycan redaksiyasının müdiri vəzifəsini ifa etməyə başlayıb. 2003-cü il sentyabrın 2-dək bu vəzifədə işləyib. Bu illər ərzində müxtəlif ölkələrdə dil və peşə üzrə təhsil ocaqlarında oxuyub: 1975-ci ildə Israildə Təl Əviv univərsitətinin SSRİ-dən gəlmiş hüquqşunaslar üçün açılan xüsusi kurslarında; 1979-cu ildə Nyu York şəhərinin Hüntər köləcində; 1981-ci ildə Böyuk Britaniyanin Folqston şəhərində xüsusi ingilis dili məktəbində, 1986-ci ildə Vaşinqtonda menecərlər üçün ixtisasi artırma kurslarında, 1989-cu ildə isə Boston univərsitətinin Münxen filialının təşkil etdiyi menecerlik kurslarında oxuyub. Mühacirət həyatı illərində tərcümələr edib, müxtəlif jurnallar, məcmuələr üçün tədqiqat məqalələri yazıb. Mirzə Xəzər Isvəçin Stoqholm şəhərindəki Bibliyanı Tərcümə Institutunun sifarişi ilə Bibliyanı (Əhdi Ətiq və Əhdi Cədidi) bütövlükdə müasir Azərbaycan dilinə 70-ci illərin sonu 80-cı illərin əvvəllərində tərcümə edib. Mirzə Xəzərin tərcümə etdiyi Əhdi-Cədid (Incil) ilk dəfə 1982-cü ildə Xorvatiyada, ümumən isə beş dəfə nəşr edilib. Mirzə Xəzərin tərcüməsində Əhdi-Ətiq (Tövrat) nəşr olunmadan qalıb. Evlidir, üç uşağı var

Orxan: Salam Mirzə, müəllim, nəcəsiz? Nəçə vaxtdı səsinizi eşitmir, üzünüzü görmürük. Nə vaxt Azərbaycana gələcəksiz? Bəs indi harada yaşayırsız, nə işlə məşğulsuz?

Cavab: Orxan salam! Çox sağ ol, yaxşıyam, sən də yaxşı olasan. Mən hazırda Almaniyada yaşayıram. İşim yoxdu, internetdə səhifəm və radiom var. Bununla məşğulam, başımı qarışdırıram. Azərbaycana gəlmək məsələsi çətin məsələdi. Mən 2004-cü ilin yanvarında Azərbaycana qayıtdım. Yerləşib, iş görmək istədim. Qəzet buraxmaq qərarına gəldim. 2004-cü il fevralın əvvəlində “Mirzə Xəzərin Səsi” adlı qəzet işıq üzü gördü. Hər yerdən müsbət rəylər gəlirdi. Ziyalılar zəng edib təbrik edirdilər. Qəzetin ikinci nömrəsi çıxanda mənə müəyyən yollarla xəbərdarlıq göndərib “məsləhət” gördülər ki, qəzeti dayandırım, özüm də Azərbaycanı tərk edim. Elə də elədim. Qəzetin nəşrini dayandırdım və ertəsi günü Bakını tərk etdim. O vaxtdan Bakıya qayıtmamışam…

http://www.versiya.az/?p=2554

Mirzə Xəzər: Bakı gözəlləşir, varlılar varlanır, kasıblar kasıblaşır, “Vəhdət” partiyası İlham Əliyevin müdafiəsinə qalxır

Mirzə Xəzər — Sun, 17 Aug 2008 02:38:36 -0400

Bakı gözəlləşir. Təbrik edirik. Azərbaycanlılar nəhayət neftin xeyrini öz gözlərilə görür, öz həyatlarında hiss etməyə başlayırlar. Hamı sevinir. Son məlumata görə, “Azad Azərbaycan” telekanalında yeni meyxana yarışması başlayacaq. Bunun özü firavanlığın işarəsidir. Uğurlu olsun! Rəsmi mətbuat deyir ki, Azərbaycan xalqı həqiqətən öz neftinin xeyrini əyani surətdə hiss etməyə başlayıb. Rəsmi mətbuat yanılmır. Azərbaycanda bu gün varlılar varlanır, bəs kasıblar? Bəzi insanlar gileylənirlər ki, kasıbların güzaranında hələ hissediləcək bir irəliləyiş nəzərə çarpmır. Versiya.az saytının oxucularından biri öz gileyini belə ifadə edir: “Xəbəriniz varmı Azərbaycanda olan yaşayış səviyyəsindən? Bu dövlətin müəlliminin, həkiminin, aliminin, ziyalısının yaşayış tərzindən məlumatlısınızmı? Orduda nələr baş verdiyini bilirsinizmi? Bu qədər sərvətə sahib dövlətin vətəndaşının Rusiya skinhedlərinin ayağının altında sürünməsi faciədir! Hanı bu neftin pulu, niyə əhalinin sosial rifahinda özünü göstərmir?” Və oxucu fəryad edib fikrini belə tamamlayır: “Bu qədər maddi nemətlərə sahib bir məmləkətin sakinlərinin ətə həsrət qalmasını görmək istəmirəm!” Təsirli sözlərdir. Amma hələ ümid var. İlham Əliyev prezident seçiləndə vəd etdiyi 600 000 yeni iş yerini birinci prezidentlik müddətində aça bilməyibsə, ümid ölməyib, növbəti seçkilərdən sonra başlayacaq növbəti 5 illikdə mütləq açar. Bəs açmasa? Suala fikir verməyin, əziz oxucular, sualımız fərziyyədən irəli gəlir...Açmasa, qəm yeməyə dəyməz...

Azərbaycan neft ölkəsidir. Düzdür, neft ölkəsidir. Bəs Azərbaycanın neçə illik neft ehitiyatları vardır? Özünü “Azərsevər” kimi təqdim edən bir oxucu “Mirzə Xəzərin Səsi” saytına bu günlərdə maraqlı bir məktub göndərib. Yazır ki: “Bir məsələ bu gün diqqətimi cəlb etdi. Bir yerli agentliyin saytında oxudum ki, “bp.Azərbaycan” bu il 307 milyon barel neft hasil etməyi planlaşdırır. Eyni agentliyin başqa xəbərində oxumuşam ki, Azərbaycanın 100-200 illik neft ehtiyatı var. Üçüncü məlumatda isə yazırlar ki, Azərbaycanda 7 milyard barel neft ehtiyatı var. Əgər bir ildə 307 000 000 barel neft istehsal etmək planlaşdırılırsa və 7 000 000 000 barel neft ehtiyatı varsa, onda 7 000 000 000 : 307 000 000 = təxminən 23 il. Deməli Azərbaycanın təxminən 23 illik neft ehtiyatı var. Əgər rəqəmlər belə deyirsə, onda Azərbaycanın 100-200 illik neft ehtiyatı haradan olur??? Xahiş edirəm Siz də məsələni araşdırasınız. Ən xoş arzularımla, Azərsevər.” Oxucumuzun məlumatı olduqca maraqlıdır. Görəsən neft hasilatı və neft ehtiyatı ilə bağlı verilən statistik məlumatlarda uyğunsuzluq nədən irəli gəlir. Səbəb nədir? Növbəti yazılarda bu məsələyə qayıdarıq. Azərbaycan seçkilərə hazırlaşır. Müxalifətin seçkilərdən kənarda durmaq niyyətində olduğunu nəzərə alsaq, deyə bilərik ki, qarşıdan gələn seçkilərdə rəqabət çox gərgin olacaq. Belə ki, MSK üzvləri avqustun 16-da İlham Əliyevin və Qulamhüseyn Əlibəylinin prezidentliyə namizədliyinin qeydə alınması məsələsini müzakirə ediblər. Uzun müzakirələrdən sonra MSK üzvləri hər iki şəxsin, İlham Əliyevin və Qulamhüseyn Əlibəylinin prezidentliyə namizədliyini qeydə alıb. Elə həmən gün, avqustun 16-da Tahir Kərimlinin “Vəhdət” partiyası prezident seçkilərində İlham Əliyevin namizədliyini müdafiə etmək barədə qərar qəbul edib. Çox mühüm və ciddi bir hadisədir.

Tahir Kərimli Ali Məclisin sessiyasında müxalifət düşərgəsinin parçalanmış və sosial bazasının aşağı səviyyədə olduğunu, bu vəziyyətdə müxalifətdən kiminsə iqtidara gəlməsinin mümkün olmadığını bildirəndən sonra İlham Əliyevin namizədliyini himayə etməyə çağırmışdır. Maraqlı məntiqdir. „Yeni Musavat“ qəzetinin yazdığına görə, T.Kərimli partiyanın siyasi mövqeyində dəyişiklik edildiyini və bundan sonra İlham Əliyevə dəstək verəcəyini söyləyib: “Ümid edirik ki, seçkilərdə uğur qazanacaq hazırkı hakimiyyət öz komandasında Vəhdət Partiyasının üzvlərinə də yer ayıracaq”. Hazırkı hakimyyət Vəhdət Partiyasının üzvlərinə öz komandasında yer ayıracaqmı bilmirik, amma “Vəhdət” partiyasının Baş Məclisinin bu qərarından sonra İlham Əliyevin prezident seçkilərində qələbəsi qaçınılmazdır. Bakı doğrudan da gözəlləşir, əziz oxucular! Azərbaycan paytaxtını bu günlərdə ziyarət edən əcnəbilər şəhərdə aparılan tikinti işlərindən, inşa edilən yeni, möhtəşəm binalardan, şəhərin küçələrində şığıyan bahalı maşınlardan ağız dolusu tərif yağdıra-yağdıra danışırlar. Təbrik edirik!

Mirzə Xəzər

17.08.2008

Azərbaycan: Minnət edənlər, minnət qoyanlar və minnət götürənlər ölkəsi

Mirzə Xəzər — Fri, 15 Aug 2008 23:01:06 -0400

Yer kürəsi Günəşin ətrafında fırlanırsa, Yer kürəsinin balaca bir parçası olan Azərbaycanda hər şey minnət ətrafında fırlanır. Azərbaycan minnət edənlər ölkəsidir. Azərbaycan minnət götürənlər ölkəsidir. Azərbaycan minnət qoyanlar ölkəsidir.
Bu məmləkətdə minnət edənlər və minnət götürənlər əksəriyyətdə, minnət qoyanlar əqəliyyətdədir. Lakin, bu məmləkətdə azlıqda olanminnət qoyanlar əksəriyyətdə olan minnət edənlərdən və minnət götürənlərdən hər sahədə güclüdür. Hakimiyyət, pul, səlahiyyət minnət qoyanların əlindədir. Elə bu səbəbdən minnət edən və minnət götürən əksəriyyət minnət qoyan əqəliyyətdən asılı vəziyyətdədir. Qəribə dünyadır. Və Azərbaycan bu qəribə dünyanın qəribə bir məmləkətidir. Minnət edən və minnət götürən gününə salınmış vətəndaşların boynuna minnət qoyaraq ölkənin bütün rayon, kənd və qəsəbəsində keçmiş prezident Heydər Əliyevin heykəllərini ucaldan prezident aparatının kommunist dövründən qalmış nomenklaturası İlham Əliyevin bütün rayon və şəhərlərdə portretlərinin yığışdırılması barədə göstəriş verdiyini bəyan etdi. Maraqlı göstərişdi. Çünki, göstərişin təfsilatı ilə tanış olanda, onun hər kəlməsində minnət qoymaq cəhdinin dərin izlərini görməli olursan. Birinci minnət. İlham Əliyevin sözlərinə görə, o, seçki qanunvericiliyinə hörmət etmək istədiyi üçün bu göstərişi vermişdir. İkinci minnət. İlham Əliyev habelə deyib ki, seçki kampaniyası başlayanda o da namizədlərdən biri olacaq, ona görə də, heç yerdə başqalarından artıq şəkli olmamalıdır. Qəribə fikirdir. Hakimiyyətin bütün qollarını və strukturlarını, habelə maliyyə imkanlarını əlində cəmləşdirib seçkiyə gedən bir şəxsin xarici dünyaya o biri namizədlərlə bərabərhüquqlu olduğunu nümayiş etdirmək üçün öz portretlərini küçələrdən yığışdırması inandırıcı bir dəlil olaraq çətin qəbul edilsin. Bu göstərişin də xalqa minnət qoymaq məqsədilə verildiyini nəzərə almalı olsaq, prezidentin portretləri ilə deyil, əməyi ilə xalqın qəlbində qalmaq istədiyinə dair bəyanatının səmimiyyətinə şübhə etməli olursan. Qarşıdan gələn seçkidə İlham Əliyevin rəqiblərinin siyahısına nəzər saldıqda, bu fikrin doğru olduğuna bir daha əmin olursan. “Exo” qəzetinin yazdığına əsasən, İlham Əliyevin rəqibləri arasında Sumqayıt şəhər mərkəzi kliniki xəstəxanasının tibb bacısı Sevinc Quliyeva, işsiz Yaşar Əhmədov, Azərbaycan Elmlər Akademiyasının elmi işçisi Qüdrət İsakov və digərlərinin adlarına rast gəlmək olur. Şübhə yoxdur ki, bu ilki prezident seçkiləri qeyri-adi seçki olacaq və indiki seçkinin qeyri-adiliyi bu tədbirin sovet hakimiyyəti illərində keçirilən “seçki” tədbirlərinə çox bənzəməsidir. Sovet seçkilərinə bənzədiyi üçün bu seçki demokratik və ədalətli bir dövlət istiqamətində irəliyə atılmış addım yox, geriyə, qaranlıq keçmişə doğru atılan bir addım olacaq. Bu addımın minnət qoyularaq atılması isə regional fenomenlərdən biri sayıla bilər.

Minnət qoymaq, minnət götürmək və minnət etmək təkcə Azərbaycan fenomeni deyil, Yəmən Ərəb Respublikasında da dəbdədir. Dəbdədir, amma arada balaca bir fərq vardır. Hakim Əlmasmari Yəməndə ingilis dilində çıxan “The Yemen Post” qəzetinin son nömrəsində Azərbaycana səfərinin təəssüratlarını əhatə edən məqaləsində sevincini gizlətməyərək yazır ki, “şükür Allaha, elə bilirdim Yəmən dünyanın ən korrupsiyalaşmış ölkəsidir, ancaq Azərbaycana səfər edəndən sonra başa düşdüm ki, yanılmışam. Azərbaycanda polis nəfərlərinin utanmadan, xəcalət çəkmədən açıq-aşkar rüşvət götürdüyünü görəndə göylərim kəlləmə çıxdı. Bəli, Yəməndə də rüşvətxorluq var, ancaq insanlar rüşvət götürsələr də dərk edirlər ki, düz iş görmürlər…” Azərbaycanı görməzdən qabaq Yəmənin gələcəyinə ümidini itirən Hakim Əlmasmari, Azərbaycandakı vəziyyəti görəndən sonra Yəməndə müsbət dəyişikliklərin olacağına ümidinin dirildiyini sevinə-sevinə qeyd edir. Qoy sevinsin. Minnət qoymadan, minnət götürmədən, minnət etmədən sevinməyə onun da haqqı var, bizim də. Yəmənli jurnalist öz vətəninin gələcəyi ilə bağlı çoxdan itirdiyi ümidini bu günlərdə Azərbaycanda polis nəfərlərinin biabırçı rüşvətxorluğunu görəndən sonra tapdı. Biz isə boynumuza minnət qoyularaq əlimizdən alınan ümidlərimizin həsrətini minnət götürə-götürə çəkirik…

Mirzə Xəzər
06 Avqust 2008-ci il

Mişa Saakaşvili Rusiyanın tələsinə düşdü

Mirzə Xəzər — Fri, 15 Aug 2008 22:56:07 -0400

Cənubi Qafqaz üzərində yenə Rusiya kabusu dolaşır

Cənubi Qafqazın başı üzərində yenə Rusiyanın vahiməli kabusu gəzir. Gürcüstanın prezidenti Mixail Saakaşvili avqustun 8-də Rusiyanın qurduğu tələyə düşüb səhv qərar verməklə siyasi vəziyyətə düzgün qiymət verməkdə aciz olduğunu açıq nümayiş etdirdi. Qərbin siyasi icmalçıları və tədqiqat mərkəzləri Gürcüstanın haqlı, Rusiyanın haqsız olduğunu təkrar-təkrar bildirsələr də, Gürcüstan prezidentinin Rusiya amilinə məhəl qoymadan Cənubi Osetiyaya qoşun yeritmək qərarını səhv və tələsik addım adlandırmaqdan da çəkinmirlər. Türkiyə telekanallarında çıxış edən bəzi tədqiqatçılar isı daha irəli gedib Saakaşvilinin hərəkətini qumar oyununa bənzətdilər. Rusiyanın tələsindən bəhs edərkən qeyd etmək lazımdır ki, Mixail Saakaşvili və ona məsləhət verənlər Moskvanın hərəkətlərini düzgün qiymətləndirə bilmədiyi kimi, Qərbin bu ixtilafda tutacağı mövqeyi də yanlış qiymətləndirmişlər. Mixail Saakaşvilinin Amerika Birləşmiş Ştatlarının və yaxud Qərbi Avropa ölkələrinin bu ixtilafda Rusiya ilə açıq qarşıdurmaya gedəcəyini düşünməsi, Qərbi yaxşı tanıması ilı öyünən Gürcüstan prezidentinin səriştəsizliyini yox, daha çox xəyalpərəstliyini göstərə bilər.

Edvard Lukas Britaniyanın “Tayms” qəzetində dərc edilən “Gürcüstan necə düşmənin tələsinə düşdü?” sərlövhəli şərhində Qərbin səhvlərinə toxunur və bu günkü vəziyyət üçün müəyyən mənada məsuliyyət daşıdığını irəli sürür. Müəllif yazır: “ Son döyüşlər Qərbin oyanmasına xidmət edən təbil səsi olmalıdır. Bu ilin aprel ayında NATO-nun Buxarest sammitində biz, Gürcüstanın ittifaqa üzv olmaq üçün bizdən dəqiq plan xahişini rədd etməklə, amansız bir səhvə yol verdik. Hələ o sammitdə Saakaşvili bizə xəbərdarlıq edirdi ki, Rusiya Qərbin hər hansı zəifliyindən və ya qətiyyətsizliyindən dərhal istifadə edəcəkdir. Rusiya bunu etdi.” Rusiyanın niyyətlərindən bərədar olan Gürcüstan prezidentinin indiki tələyə düşməsini başa düşmək çətindir. Mixail Saakaşvilini demokrat adlandıran “Tayms” qəzeti ilə tam razılaşmaq çətindir. 2003-cü ildə Qərbin köməyilə, necə deyərlər, “məxmər inqilabı” nəticəsində hakimiyyətə gələndən sonra Mixail Saakaşvili bəzən demoratik oyun qaydalarına və mövcud qanunlara məhəl qoymayaraq öz siyasi rəqiblərinə divan tutanda Qərbin ancaq yumşaq bəyanatlar verməklə kifayətlənməsi, əlbəttə, Gürcüstan prezidentini şirnikdirməyə bilməzdi. 2003-cü ildə böyük demokrat kimi hakimiyyətə gələn Saakaşvili tezliklə müəyyən mənada avtoritarizm üsullarına meyl göstərməyə başladı. Bu, şübhəsiz, gürcü xalqının daxili işidir. Bu gün mühüm olan Gürcüstandakı müharibədir. Mixail Saakaşvilinin və Qərbin Cənubi Osetiya səhvi üzündən bu gün təkcə o özü və onun siyasi aqibəti təhlükəyə düşməyib. Bu səhv üzündən Gürcüstan və Cənubi Qafqaz Moskvanın tələsinə düşmüş, Qərbə arxalanıb Rusiyaya sinə gərən MDB ölkələrini isə təşviş bürümüşdür. Şübhə yoxdur ki, Azərbaycan bu hadisələrin təsirindən kənarda qala bilməyəcək. Bu səbəbdən, Gürcüstanın Azərbaycandakı səfirinin “strateji partnyorluq” dəlilini irəli sürüb Azərbaycandan kömək istəməsi anlaşılandırsa, rəsmi Bakı hökumətinin buna sükutla cavab verməsini də anlamaq çətin deyildir. Helen Kuper “Nyu York Tayms” qəzetində çıxan şərhində “Stratfor” tədqiqat mərkəzinin icraçı direktoru Corc Fridmanın bu fikrinə diqqəti cəlb edir: “ Sovet İttifaqı dağılandan sonra ilk dəfədir ruslar qətiyyətli hərbi hərəkətə baş vurmuş və vəziyyəti dəyişə bilmişdir. Rusiya bunu təkbaşına etmişdir və uzun zaman rusları qorxutmaq üçün Qərbin himayəsinə sığınan ölkələr bu gün baş verənlərin üzərində ciddi düşünməlidirlər.” Fridman haqlıdır. 2008-ci il avqustun 8-dən sonra təkcə Cənubi Qafqazda yox, keçmiş SSRİ məkanında və Qərbin Rusiya ilə münasibətlərində çox şey dəyişmişdir. Saakaşvili Rusiyanın tələsinə düşdü. Cənubi qafqazlıların başı üzərində yenə Rusiya kabusu dolaşır.

Mirzə Xəzər
10.08.2008

Mirzə Xəzər: Gözün aydın Azərbaycan müxalifəti, ABŞ və Rusiya İlham Əliyevin yenidən prezident seçilməsinə razılıq verib

Mirzə Xəzər — Sun, 03 Aug 2008 10:06:33 -0400

Gözünüz aydın, Azərbaycan müxalifətçiləri! Sevinin! Gözünüz aydın, Azərbaycan seçiciləri! Gözün aydın, Azərbaycan demokratiyası! Gözlərinizin ikisi də aydın olsun, Azərbaycan demokratları! 2003-cü ilin sentyabr ayından bu yana başınıza gələn (gətirilən) müsibət silsiləsinin nə axırı görünür, nə də sonu...

Gözünüz aydın olsun. Prezident seçkisinin nəticəsi hələ seçki keçirilmədən artıq indidən məlumdur. Mübariz Əhmədoğlu iddia edir ki, ABŞ və Rusiya İlham Əliyevin yenidən prezident seçilməsi məsələsində yekdil mövqe nümayiş etdirirlər. Bu iddiaya şübhə etmək olarmı? Şübhə etmək olardı, amma şübhə etməsək yaxşıdı. Əvvələn ona görə şübhə etməmək lazım gəlir ki, Mübariz Əhmədoğlunun fikrində zərrə qədər qüsur yoxdur. Digər tərəfdən ona görə şübhə etməmək məsləhətdir ki, Azərbaycanda şübhə etmək təhlükəli sənətdir. Şübhə demokratiya və plyuralizmin təcəssümüdür. Şübhə demokratiya və plyuralizmin qəlbidir, ürəyidir, canıdır... Şübhə yoxdursa demokratiya da, plyuralizm də ürəksiz və cansızdır. Ürəksiz və cansız demokratiya və plyuralizm isə ölüdür, yoxdur... Gözün aydın, Azərbaycan, çünki son 16 ildə dünyaya o qədər yeni fenomenlər bəxş etmisən ki indiki fenomen daha heç kimi təəccübləndirə bilməz!

Gözünüz aydın, əziz oxucular!

Mirzə Xəzər: Gözünüz aydın qəzetlər...Prezident müstəqil mətbuata qiymət qoydu!

Mirzə Xəzər — Fri, 01 Aug 2008 03:00:20 -0400

Bu tarixi günü çoxları çoxdan gözləyirdi. Gözlərin aydın olsun, MÜSTƏQİL MƏTBUAT! Nəhayət bu xoşbəxt gün sənə də nəsib oldu! İlham Əliyev Azərbaycan mətbuatına layiq olduğu qiyməti verdi.Sərəncama əsasən, prezident aparatının xəlbirdən keçirdib seçdiyi hakimiyyətli-müxalifətli 31 qəzetə və 7 agentliyə - hərəsinə 5 min manat maliyyə yardımı veriləcək. Gözün aydın olsun, MÜSTƏQİL MƏTBUAT! Azərbaycanda hər şey qiymətini almışdı, tək sən qalmışdın, təklənmişdin. Sən uzun illər qiymətsiz, yetim qalmışdın. Nəhayət sənə həm qiymət verən tapıldı, həm də qiymət qoyan! İndi prezident seçkisinə alnıaçıq, üzüağ getmək olar!