Bu ölkədə kimlərə yer var?!

Mirzə Xəzər — Mon, 20 Apr 2009 07:15:47 -0400

Mən siravi Azərbaycan vətəndaşıyam. Hər hansı bir vəzifə və imkan sahibi-filan deyiləm. Yaşım da, bir o qədər çox deyil! Lakin, vətəndaşı olduğum Azərbaycanda çox haqsızlıqlar görmüşəm. İstər bəzi vətəndaşlar tərəfindən olsun, istərsə də, dövlət məmurları tərəfindən. Əlbəttə ki, əsas bu deyil ki, hər hansı bir məmur və ya vətəndaş mənimlə şəxsi-qərəzlik etsin və mənim haqqımı tapdasın və yaxud da, həqarət etsin! Bir vətəndaşa digər bir vətəndaş haqsızlıq edirsə, həmin vətəndaşın hüququ pozulursa və ölkədə şikayətə baxan da, yoxdursa, məmurların özbaşınalığı vətəndaşda ikrah hissi oyadırsa, bu həm də, mənim hüququmun pozulması deməkdir. Sabah mənim də, haqqım tapdana bilər. Sabah mənə qarşı da, haqsızlığa yol verə bilərlər. Amma, bu ölkədə hüquqlar kökündən baltalanırsa, təəccüblənməməliyik.

Bu il Novruz bayramı ilə bağlı Mirzə Xəzər bəyə təbrik mesajı yazmışdım. Amma, Mirzə bəylə tanışlığım çox maraqlı oldu. Onunla bir kəlmə belə, kəsməmişəm. Sadəcə saytları izləyə-izləyə Mirzə bəyin saytına rastladım. Bir neçə dəfə olub ki, bu sayta rast gəlmişəm, amma, bu şəxsin kim olduğu haqda maraqlanmamışam. Sonra isə, “Mirzə Xəzəri tanıyırsanmı?” – deyə, kimlərdənsə soruşdum. Mirzə Xəzərin kim olduğunu dedilər. Belə bir şəxsi indiyədək tanımadığım üçün özümü qınadım. Amma, şükür olsun ki, artıq, tanıdım. Amma, özümü qınamaqla bir o qədər də, özümə haqsızlıq etmiş olmuşam. Çünki “20 Yanvar” hadisələrində mənim yaşım elə də, çox olmayıb. Amma, bu gün “Mirzə Xəzərə ölkədə yer yoxdur” deyib onu ölkədən didərgin salanların ucbatından bu millət və vətən onun üzünə həsrət qalıb. Təsəvvür edin ki, Mirzə Xəzərlə e-mail vasitəsiylə hal-əhval tuturuq. Axı, nə üçün? “20 Yanvar” hadisələri zamanı xalqın qəhrəmanına çevrilmiş Mirzə Xəzəri bu gün insanlardan sorduqda, çoxu “bilmirəm, deyəsən o sağdır” deyirlər. Amma, Mirzə Xəzəri ölmüş bilənlər də, onu sorduqda tanıyır və nələr etdiyini xatırlayırsa, deməli, Mirzə Xəzər ölmüşsə də, ölməyibdir. İndi Mirzə Xəzər vicdanlı insanların xatirində qalıb. Zatən, vicdansız insanlar onun qədrini bilsəydilər, indi, Mirzə bəylə e-maillə xəbər tutmazdıq.

“Ey millət! Ayılın, Mirzə Xəzər kimilərə bu diyarda yer yoxdur! Ey xalq, sənə qarşı edilmiş zülmlərə etiraz edən Mirzə Xəzəri bu gün sənə başçılıq edənlər yad etmir, layiqincə qiymətləndirmir, vətəndan, səndən didərgin salıblar. Deməli, onu didərgin salanlara sən lazım deyilsən, ey xalq, ey vətən!” Məni çox təsirləndirən Mirzə Xəzərin bu sözləri oldu; “Neçə ildir Almaniyada yaşayıram. İşləmirəm. Azadam, sərbəstəm. Həyatımdan razıyam. Səhhətimdə problem vardı. Bir müddət müalicəmlə məşğul oldum. Yazmaqda davam edirəm. 2004-cü ilin yanvarında İnternetdə açdığım “Mirzə Xəzərin səsi” saytını idarə edirəm. Oxuculardan müntəzəm məktublar alıram. İnternetdə radio da açmışam. Dinləyənlərin sayı çoxdur. Bakıya gedib-gəlmək məsələsi bir az qəliz məsələdir. Axırıncı dəfə 2004-cü ilin yanvar ayında Bakıda olmuşam. Gedib-gəlmək bununla bitdi. 2004-cü il yanvarın 14-də bir iş görmək, bəzi layihələrimi həyata keçirmək ümidi ilə Bakıya getdim. Qəzet buraxmağa başladım. Təəssüf ki, imkan verilmədi. Düz bir aydan sonra mənə xəbər göndərildi ki, qəzeti bağlayım, özüm də dərhal, yubanmadan Bakını tərk edim. 2004-cü il fevralın 13-də Bakını tərk etməli oldum. O vaxtdan bəri Bakıya getmirəm. Layihələrimin yarımçıq qalmasının səbəbi budur.” Bəli, bu diyarda dövlətin gizli saxladığı haqsızlığı ifşa edənlərə yer yoxdur. Mirzə Xəzər Almaniyada sərbəstdir, rahatdır, didərgindir, vətənə həsrətdir, 5 ildir ki, vətəni görmür, ondan hal-əhval tutmur.

Mirzə bəy, bu gün sizin kimi insanlara bu ölkədə yer yoxdur. Bu ölkədə öz xeyrini güdən bəzi insanlar var ki, siz onların nanəcib hərəkətlərinin və rəzil əməllərinin qarşısında maneəsiniz! Nə olardı ki, siz də, hakimiyyət üçün yazanlardan, hakimiyyətin nanəcib əməllərini tərif edən, haqsızlıqlarına göz yuman jurnalistlərdən olardınız. Bu gün sizin böyük vəzifəniz, dəbdəbəli həyatınız olardı.

Mirzə bəy, gərək bu fikirlərimə görə, məndən inciməyəsiniz... Sizin əməyinizi heç xalq da, layiqincə qiymətləndirmədi. Bu xalq sizi unutmayıb- unutdu. Bu xalqa sizi və sizin kimiləri zorla unutdurdular. Siz bu xalqı müdafiyə etdiniz, bu xalq sizi müdafiyə etdimi?

Mirzə bəy, Allah-Təala sizin əməllərinizin qarşılığını mütləq verəcəkdir. Sizinlə tanış olduğum üçün çox şadam!

Hörmətlə: Tovfiq.

Mirzə Xəzərin Səsi: Bu ölkədə kimlərə yer var?!

Bu ölkədə kimlərə yer var?!