KEÇMİŞ KOMANDASINDAN HEÇ KİM AYAZ MÜTƏLLİBOVUN 70 YAŞINI TƏBRİK ETMƏYİB

Mirzə Xəzər — Tue, 13 May 2008 03:10:00 -0400

KEÇMİŞ KOMANDASINDAN HEÇ KİM AYAZ MÜTƏLLİBOVUN 70 YAŞINI TƏBRİK ETMƏYİB: «BUNU HEÇ GÖZLƏMİRDİM DƏ»

2008-05-13 – 15:04:00

Mayın 12-də 70 yaşı tamam olan, 16 ildir Rusiyada mühacirətdə yaşayan Azərbaycanın birinci prezidenti, Sosial Demokrat Partiyasının həmsədri Ayaz Mütəllibov yubileyini Moskvadakı evində, öz ailə üzvlərinin, qohumlarının əhatəsində keçirib. Bunu «Media forum» saytına eks-prezidentin özü deyib: «Ad günümdə nəvəm, gəlinim, qohumlarım, bir-iki nəfər də dostum iştirak edib». A.Mütəllibov dünən gün ərzində təbrik üçün onunla telefon əlaqəsi saxlayanların saysız-hesabsız olduğunu söyləyib: «Bakıdan, partiyamızın Azərbaycanın müxtəlif şəhərlərindəki təmsilçilərindən təbrik edənlər xüsusilə çox idi. Məni təbrik edənlərin çoxunu tanımırdım. Dünən bütün günü demək olar ki, telefonla təbrik qəbul etmişəm». Tanınmışların, yaxud Mütəllibovun prezidentliyi dövründə hakimyyətdə olmuş adamların təbriki məsələsinə gəldikdə, eks-prezident bildirib ki, vaxtilə bir yerdə işlədiyi şəxslərin heç biri onunla əlaqə saxlamayıb: «Bunu mən heç gözləmirdim də. Ancaq məni təbrik edənlərin arasında adi adamlar çox idi». A.Mütəllibov Azərbaycanda gedən ictimai-siyasi prosesləri daha çox mətbuat və internet vasitəsilə izlədiyini vurğulayıb. Payızda Azərbaycanda keçiriləcək prezident seçkisi ilə bağlı suala cavab olaraq A.Mütəllibov deyib: «Mən Azərbaycanda ədalətli seçki keçiriləcəyinə şübhə ilə yanaşıram. Çünki təcrübə bunu göstərir. Bunu təkcə mən demirəm, ümumiyyətlə Azərbaycanın siyasi vəziyyətini təhlil edən politoloqlar, siyasətçilər bildirirlər ki, bizdə seçkilər birtərəfli olur, yəni keçmiş sovet üslubunda».

Eks-prezident Rusiya paytaxtında yaşaması, hərəkət etməsi, təhlükəsizliyi ilə bağlı hər hansı problemin olmadığını qeyd edib: «Mən cangüdənsiz sərbəst hərəkət edirəm, təhlükə ilə üzləşəcəyimi də qətiyyən düşünmürəm». A.Mütəllibov Azərbaycana qayıtması üçün hakimiyyətə ünvanladığı müraciətlərinə indiyədək bir dəfə də olsun rəsmi cavab verilmədiyini bildirib: «Hökumət bu məsələyə biganədir. Onların əvəzinə mən xəcalət çəkirəm. Əcaib bir vəziyyətdir ki, Azərbaycanın ilk prezidenti vətənə buraxılmır. Əslində mənim qayıtmağım böyük problem deyil. Ancaq bunu böyük problemə çevirən adamlar var, bilmirəm onlar nəyə arxalanaraq və hansı məqsədlə belə edirlər. Biri deyir ki, Ayaz Mütəllibov gəlsə, onun ətrafına müxtəlif adamlar yığışacaq və Azərbaycanda asayiş pozulacaq, ona görə uzaqda qalması yaxşıdır. Mənim qayıdışıma mane olan başlıca səbəb elə budur. Müsahibələrimdə dəfələrlə demişəm ki, bir vətəndaş, qanuna riayət edən bir şəxs kimi həyatım boyu, həm sovet sistemində, həm də ondan sonra ağlıma gəlməyib ki, küçə hərəkətinə qoşulum, yaxud vəzifə hərisliyi göstərim. Ona görə artıq bu haqda düşünməkdən də yorulmuşam. Əslində qeyri-adi vəziyyət yaranıb. Bu, xalqımıza da şərəf gətirmir, iqtidarın isə heç vecinə deyil. Bunlar belə şeylərə vərdiş ediblər. Amma hər şeyi zaman göstərəcək, hələ ki, yaşayırıq».

A.Mütəllibov prezident olduğu zamankı arzularından da danışıb: «Mən istəyirdim ki, Azərbaycan tam mənada Avropa standartlarına uyğun, demokratik bir dövlətə çevrilsin. Azərbaycanın, xalqın tərəqqisini yalnız demokratiya təmin edə bilər. Əfsuslar olsun ki, biz demokratiyadan xeyli uzaqdayıq və bunun müxtəlif səbəbləri var. Bəziləri deyir ki, xalqımız demokratiyaya vərdiş etməyib, onu başa düşmür, demokratiya anarxiyaya çevrilib. Halbuki demokratiyanı 1990-cı illərin əvvəlində anarxiyaya çevirən adamın adı bəllidir, hamı da bilir ki, o vaxtkı hadisələrin arxasında kim durmuşdu. Amma biz son 20 il ərzində irəli getməkdənsə sovet sisteminə keçmişik. Bu həm seçkilərdə, həm də hökumətin davranışlarında görünür. Həmişə arzum o olub ki, Azərbaycanda demokratiya olsun, hakimiyyətə biri gəlsin, biri getsin, indiki kimi siyasi durğunluq olmasın. Biz indiki mərhələni sovet hakimiyyəti vaxtı keçmişdik».

«Media forum»

P.S. “Mirzə Xəzərin Səsi” Ayaz müəllimi ürəkdən təbrik edir, ona can sağlığı və müvəffəqiyyət arzu edir!!!!

Mirzə Xəzərin Səsi: KEÇMİŞ KOMANDASINDAN HEÇ KİM AYAZ MÜTƏLLİBOVUN 70 YAŞINI TƏBRİK ETMƏYİB

KEÇMİŞ KOMANDASINDAN HEÇ KİM AYAZ MÜTƏLLİBOVUN 70 YAŞINI TƏBRİK ETMƏYİB