http://mirzexezerinsesi.net/articles/2008/01/15/mirze-xezer-fitnenin-anatomiyasi-merdliyin-anatomiyasi-namerdliyin-anatomiyasi en-us 40 <p>18.02.2006</p> <p>Fitnə fəsaddır. Fəsad da fitnədir. İkisi bir yerdə fitnə-fəsaddır. Fitnənin bir mənası qarışıqlıq, ara pozma, ara qarışdırmadır. İkinci mənası adamları, camaatı bir-birilə vuruşdurmaq, aralarını pozmaq üçün gizlicə hazırlanan qəsd, xəyanət, fitnə-fəsaddır. Göründüyü kimi fitnə doğrudan da fəsaddır. Çünki fitnə-fəsad da fitnədir. Fitnə salmaq da fəsaddır. Yalnız fəsad deyildir. Fitnə salmaq – araya nifaq salmaq, ara qarışdırmaq, fəsad törətməkdir. Yenə eyni dairədir. Tilsimli dairə. Əvvəli və sonu olmayan dairə. Fitnə olan yerdə fəsad var. Fəsad olan yerdə fitnə. Bəşər övladının icad etdiyi fitnə-fəsad adlanan rəzillik həmişə və istənilən hər şəraitdə ayrılmaz cütlük kimi hərəkət edir. Bir-birilə həmişəlik əhdi-peyman kəsmiş bu rezil cütlük bəni-adəm içində çox fəal olub, ta Adəm və Həvva dövründən bu yana insanlar arasında nifaq və ədavət salıb dağıdıcı əməllərini elə insanların taleyi üzərində təcrübədən keçirdir. Əqli zorlayır, zəkalını əzir, məhsuldar enerjini puça çıxardır, başlıları hürküdür, cəmiyyətin cılızlaşması cərəyanını sürətləndirir. Həzz ala-ala, kam ala-ala əzir, zorlayır, dağıdır və rəzilliyini bu şəkildə təcrubədən keçirdir. İnsan isə dözür. Çünki dözüm də fitnə-fəsad kimi bəşər övladının təbiətinin ayrılmaz parçasıdır. Buna görə dözür! Fitnə yalnız fəsad deyil. Fəsad da yalnız fitnə deyil. Eyni zamanda qurğudur, tələdir, hiylədir. Elə isanların bir-birinə qurduğu tələ və hiylə!</p> <p>Əslində fitnə-fəsad insanların bir-birinə yox, əqli və zəkası zəif olanların əqli və zəkası güclü olanlara qurduğu qurğu, tələ və hiylədir. Çünki əqli və zəkası güclü olanlar üstün gəlsələr, əqli və zəkası zəif olanlar cəmiyyətdə qılınc oynada bilməzlər. Elə buna görə də cəmiyyətdə qılınc oynatması üçün əqlən və zehnən güclüləri fitnə-fəsad qurub əzmək zəiflərin həyat qayəsinə çevrilir. Əqli və zəkası zəif olan fərddə fitnə-fəsad hissi güclüdür. Əqli və zəkası güclü olanlarda fitnə-fəsad qabiliyyəti çox-çox zəif və bəlkə də heç yoxdur. Nəticə nədir? Odur ki, fitnə fəsaddır, fəsad fitnədir. Hər ikisi birlikdə fitnə-fəsaddır. Törətdikləri bir çox rəzilliklər vardır ki, onların başında namərdlik gəlir. Namərdliyin dilimizdə mənası genişdir, mahiyyəti eynidir. Namərd – alçaq, müxənnəs, nakişidir. Lüğətimizdə belədir. Namərdlik kəlməsinin mənası daha geniş və rəngarəngdir. Namərdlik – alçaqliq, nakişilik, xainlik, vəfasızlıq, əhdi pozmaqdır. Bir də namərd çıxmaq var. Namərd çıxmaq, yəni əhdi pozmaq, vəfasızlıq etmək, xain çıxmaq, xəyanət eləmək. Namərd, namərdlik, namərd çıxmaq…</p> <p>Bəli, namərdliyin özülünü fitnə və fəsad təşkil etdiyi kimi, fitnə-fəsadın kökünü və özülünü də namərdlik təşkil edir. Hər üçü – fitnə, fəsad və namərdlik məntiq baxımından təhlil edilərsə, zəiflikdən irəli gəlir. Cismani zəiflikdən yox, birinin o birisindən əqli və zehni baxımdan zəifliyindən və sözü gedən fərdin rəqibi qarşısında öz zəifliyini açıq-aşkar dərk etməsindən irəli gəlir ki, belə şəraitdə əvvəlcə qibtə, sonra ədavət və ardınca fitnə-fəsad əmələ gəlir. Məzlum insanlıq! Türkiyənin məşhur İstanbul Teknik Universitəsinin məzunları bu yaxınlarda apardıqları maraqlı, amma ciddi bir tədqiqat işinin nəticəsini ictimaiyyətə çatdırıblar. Tədqiqatın hədəfi qoz, məğzi qoz, mahiyyəti qoz, nəticəsi qoz, fəlsəfəsi qoz, düsturu qozdur…</p> <p>Nə üçün? Gəlin deyim. Bir qozu əlinizə alanda lap çölündə yaşıl qabıq, sonra taxta qabıq, daha sonra zərif bir zər və lap içəridə insan beynini xatırladan ağ bir qida ilə qarşılaşırıq. Sözün kəraməti bəs nədir? Qoz çölündəki yaşıl və sonrakı taxta qabığı ilə insan başına bənzədiyi kimi, içərisindəki əsl meyvəsi ilə beyinə bənzəyən qeyri-adi bir qidadır. İstanbul Teknik Universitetinin tədqiqatına görə, qozun içərisindəki qida beynimizin kiçildilmiş modelidir. Mütəxəssislər nə olursa olsun gündə 1-2 dənə yaş qoz yeməyi təkidlə tövsiyə edir. Xüsusilə inkişaf çağındakı uşaqlar üçün çox mühümdür. Zəifliyin qarşısını almağın bir yolu budur. Qoz güc mənbəyidir. Xüsusilə beyin üçün ən güclü qida insan beyninə bənzəyən qozdur! Qoz zəifliyin və acizliyin müalicəsidir. Fitnə-fəsadla mübarizədə qozun müstəsna əhəmiyyəti vardır. Çünki, əvvəldə dediyimiz kimi, zəifliyin labüd nəticəsi namərdlikdir. Tilsimli dairədir! Fitnə-fəsad fəsaddır. Fitnə-fəsadın əmələ gəlməsinin qaçılmaz nəticəsi isə əvvəldə dediyimiz kimi – namərdlikdir. Bu da bir dairədir. Nə əvvəli var, nə də axırı. Fitnə fəsadı törədir, fəsad fitnəni. Fitnə-fəsaddan qibtə və paxıllıq törəyir. Fitnə, fəsad, qibtə və paxıllıq namərdliyin bünövrəsini qoyur. Və namərdlik- ağ atın belində əlində qılınc olan bu rəzalət özündən əqli və zehni baxımdan üstün olan rəqibinə meydan sulayır. Ağ atın belində? Bəli, əziz oxucum! Faciə odur ki, mənəviyyatın pozulduğu, fitnə-fəsadın qalib gəldiyi və hər şeyin təhrif olunduğu cəmiyyətlərdə ağ atın mənası da təhrifə məruz qalır və bu üzdən ağ atın belinə düzlük və mərdlik yox, namərdlik minir. Və faciə odur ki, mənəviyyatı pozulmuş, mənəvi təməlləri sarsılmış, mənəvi dəyərləri yoxa çıxarılmış cəmiyyətlərdə fitnə-fəsad və onun labüd bəhrəsi olan namərdlik əksər hallarda üstün gəlir, qalib çıxır. Güclü olduğu üçün qalib gəlmir. Fitnə-fəsad və namərdlik cəmiyyətdə MƏRD SÖZ <span class="caps">SAHIBIN</span>Ə çevrildiyi üçün qalib gələ bilir.</p> <p>Əziz oxucum! Yazıdakı hər kəlmənin altında zəka yatır, fitnənin başını yemək istədiyi “başlar” yatır. Əlavə yazmağa ehtiyac yoxdur.</p> <p>Amma qəm yemə! Yazdıqlarımızda məcaz var, əziz oxucum! Əzsələr də, vursalar da, qovsalar da, at oynatsalar da, meydan sulasalar da zəka zəkadır, zəka mərdlikdir və güclüdür!</p> <p>Fəsad isə fitnədir, namərdlikdir və zəifdir. Zəka və mərdlik əbədidir və qüdrətlidir! Fitnə və namərdlik isə həmişə rəzalət törətsə də zəifdir! Biri xeyir verdiyi üçün həmişə lazımdır və güclüdür, o biri şər olduğuna görə çox vaxt heç kimə lazım olmadığı üçün zəifdir…</p> <p>Məzlum insanlıq! Yox, elə də məzlum deyil insanlıq! Çünki, cəmiyyəti iflic edən fitnə-fəsadın mənbəyi olan zəiflikdən-gücsüzlükdən xilas yolu, nicat yolu, çıxış yolu var! Qoz!!! İstanbul Teknik Universitesi düz məsləhət verir. Qoz yemək lazımdır! Dünya qoz dünyasıdır!</p> <p>Mirzə Xəzər</p> Tue, 15 Jan 2008 18:44:00 -0500 urn:uuid:eef964bc-cfc3-4352-9410-839a1a398297 Mirzə Xəzər http://mirzexezerinsesi.net/articles/2008/01/15/mirze-xezer-fitnenin-anatomiyasi-merdliyin-anatomiyasi-namerdliyin-anatomiyasi Təhlil və şərhlər