Xaliq Bahadır: Əliyevçi rejimin demokratiya dialektikası

Mirzə Xəzər — Tue, 01 Jul 2008 00:20:20 -0400

Xaliq Bahadır ("Azadlıq" qəzeti)

Əliyevçi rejimin demokratiya dialektikası

Əliyevlərin “uğurlu neft-qaz strategiyası” öz bəhrəsini verməkdədir: ölkəyə axası milyardlar bir Ailənin, onunla birgə olanların cibinə axmaqdadır. Sırada “uğurlu torpaq strategiyası”dır. Neftdən sonra ölkənin ən böyük gəlir qaynaqlarından biri torpaq, torpaq üzərində kontroldur. Buna görə otuz illik hakimiyyəti boyu rayonlara çıxmayan Ramiz Mehdiyev də rayonlara üz tutmağa başlayıb.

Bələdiyyə bələdçiləri

“Azərbaycanda vətəndaş cəmiyyətinin qurulmasında və demokratik prinsiplərin tətbiqində bələdiyyələrin iştirakına dair bələdiyyə sədrlərinin 2-ci ümumrespublika toplantısı”. Yevlaxda bu ad altında toplantı keçirilib. Toplantıda prezidentin icra aparatının başçısı, akademik Ramiz Mehdiyev böyük çıxış yapıb. Qabaqca bələdiyyə başqanları çıxış ediblər. Bu çıxışlar sovet dönəmi üçün xarakterik yalanlarla doludur. Adam Azərbaycanı tanımasaydı, Azərbaycanda baş verənlərdən soraqsız olsaydı, bu çıxışlara inanaraq ölkəmizi qanunçuluq, gəlişmə, demokratiya baxımından Batı Avropa ölkələri ilə bir sırada görərdi. Bu baxımdan R.Mehdiyevin çıxışı bələdiyyə başçılarının çıxışlarından seçilmir: Azərbaycan çiçəklənən bir ölkədir, o çiçəklənmənin başlıca yaradıcılarından biri də, söz yox, R.Mehdiyevdir. Bu, çıxışlardan görünəndir, ancaq ölkədə hamı onu demokratiya düşməni olaraq tanıyır. Bunu o özü də bilməmiş deyil. Qoy olsun, onu bu xalqın onunla bağlı nə düşünməsi maraqlandırmır; onun üçün başlıcası özünün Əliyevlərə bağlı otuz illik hakimiyyətini qoruyub saxlamaq, bu yolla özəl planlarını, maraqlarını gerçəkləşdirməkdir. R.Mehdiyev çıxışının bayağı görünməməsi üçün arada tənqidə də yer verib - bələdiyyələrlə bağlı qanunçuluğun qorunmasından da danışıb, konkret faktlar göstərib. O, Binəqədi rayonundakı Rəsulzadə bələdiyyəsinin başqanı Məcnun Əliyevi MTN əməkdaşlarının korrupsiya ilə bağlı tutduqlarını deyib. Birincisi, ölkənin baş antikorrupsioneri R.Mehdiyevin göstərdiyi fakt korrupsiya deyil, rüşvətdir; o özünün rolunu şişirtmək üçün rüşvətə korrupsiya adı verir. Ikincisi, Aqil Xəlil faktından bəlli olduğu kimi, M.Əliyevin torpaq satıb, rüşvət alarkən tutulduğu yerdə Zeytunluğu qırıb, villa tikdirənlər elə-belə adamlar deyil, hakimiyyətə bağlı adamlardır. Bəlli olduğu kimi, onların arasında yüksək rütbəli MTN zabitləri də var. Elə buna görə də Aqil Xəlilin üstünü açdığı cinayət işi onun özünə qarşı çevrildi. Görünür, R.Mehdiyev bunları bilmir; bilsəydi, bunlardan da danışar, gördüyü gərəkli işə görə Aqil bəyə “sağ ol”larını sunardı. R.Mehdiyev çıxışında Saqatlı rayonu ilə bağlı ilginc faktlara toxunub: “Bələdiyyə və dövlət ehtiyat fondu torpaqlarının qeyri-qanuni satışı, icarəyə verilməsi ilə bağlı vəziyyət Saqatlı rayonunda, xüsusilə acınacaqlı olmuşdur. Rayon icra hakimiyyətinin bir başçısı 1500 hektar torpaq sahəsini öz qohum-əqrabasına, vəzifəli şəxslərə, hətta pozucu qüvvələrə paylamış, digəri isə qanunsuzluqları aradan qaldırmaq əvəzinə bu biabırçılıqları davam etdirmişdir”. Saqatlı rayonunda durumun “xüsusilə acınacaqlı olması” yalnız adı çəkilən rayonda deyil, bütün ölkədə acınacaqlı olması deməkdir. Niyə? Saqatlıda baş verənlər bütün ölkədə baş verdiyinə görə! Bütün ölkədə icra başçıları torpaqları Saqatlıda olduğu kimi satıblar, mənimsəyiblər. Bunu hamıdan yaxşı bu işlərə birbaşa bağlılığı ilə tanınan R.Mehdiyev bilir. R.Mehdiyevin kurasiyası altında 14 il icra başçısı olmuş, minlərlə baş mal-qaranın, on minlərlə baş qoyun-quzunun olduğu heyvandarlıq komplekslərindən tutmuş torpaqlaradək rayonu çapıb-talamış Gülhüseyn Əhmədov indi, deyilənə görə, hamının yaxşı tanıdığı birisinə 3 milyon dollar verib deputat mandatı almaqla parlamentdə oturur. Onun adı nəyə görəsə çəkilmir. Ancaq vur-tut iki il icra başçısı olan, özü də rayon satılıb-sovulandan sonra olan, adamın - Vaqif Hüseynovun adı çəkilir. Görəsən, niyə? Daha çox bir faktla bağlı özəl maraqlara görə!

Əski bolşevizm yeni axarda

“Pozucu qüvvələr” kimlərdir? Buna da aydınlıq gətirmək gərəyi yaranır. R.Mehdiyev üçün, eləcə də onun komanda yoldaşları üçün “pozucu qüvvələr” müxalifət, milli demokratik hərəkat adamlarıdır. Yer üzündə R.Mehdiyevin bir düşməni varsa, o da, yox, soyqırım, qanlı qırğın yolu ilə Azərbaycan torpaqlarını tutmuş ermənilər deyil, Azərbaycanın milli demokratik gücləridir. R.Mehdiyev onlara “pozucu qüvvələr” deyir. Belələrisə Saqatlı rayonunda daha çoxdur. Elə buna görə də mitinqlərə Saqatlıdan gələnlər daha çox olur. Bizdə olan informasiyaya görə, ölkə başçısı özü Saqatlı rayonu ilə ayrıca “məşğul olmaq” göstərişi verib. Bu göstərişin yerinə yetirilməsi özünü iki yöndə göstərir: bir yandan adamları kütləvi olaraq YAP-a yazdırır, o biri yandan “torpaq problemi” yaratmağa çalışırlar. “Müxalifətin kənddəki dayaqları da sarsıdılmalı, müxalifət adamlarının dolanışıq hüquqları-olanaqları əllərindən alınmalıdır”,- budur R.Mehdiyevlərin prinsipi. Budur onların kəndə ayaq açan demokratiyası! Onlara görə yalnız onların oğru hakimiyyətinə bağlı olanların mülkiyyət hüququ ola bilər, başqalarının yox! Torpaqların satılıb-paylanmasına gəlincə, prezidentin icra aparatının başçsı kimi bu işlərə görə birinci suçlu sayılmalı adam başqası deyil, R.Mehdiyev özüdür. Örkən gəlib doğanaqdan keçdiyi kimi, bütün icra başçıları onun kabinetindən gəlib keçmirmi? Bundan başqa, Novxanıda, R.Mehdiyevin hər gün keçib getdiyi yolun o üz, bu üzündə kimlərsə Bakı kimi torpaq qıtlığı olan yerdə üç-beş hektar torpağa yiyələnərək kilometrlərlə hasarlar çəkiblər. Deyilənə görə, bu böyük torpaq yiyələri başlıca olaraq R.Mehdiyevin qohum-əqrabasıdır. Görünür elə buna görə də o, gözünün qabağında uzanıb gedən kilometrlərlə hasarlamalara göz yumur. Bütün bunların üstündən yoldaş Mehdiyev buyurur: “Heç bir bələdiyyə unutmamalıdır ki, torpaqları onlara dövlət dağıtmaq üçün verməmişdir. Nə də ki, bu torpaqlar onlara miras qalmamışdır. Torpaqların idarə edilməsində qanunçuluq əsas götürülməli, şəxsi maraqlar deyil, dövlət mənafeyi üstün tutulmalıdır”. Belə yerdə deyirlər: avazın yaxşı gəlir, oxuduğun quran olsa... R.Mehdiyev ölkənin ən yaxşı bələdiyyələri sırasında Yasamal bələdiyyəsinin adını çəkir. Inanardıq, bu bizim bələdiyyəmiz olmasaydı. Bizim Yeni Yasamaldakı evimizin böyür-başında ayaq basmağa yer qalmayıb; yaşıllıqlar qırılıb, torpaq qarış-qarış satılıb, tində, bucaqda qalanlar da bir ucdan satılmaqdadır. Görünür, R.Mehdiyevi Yasamal bələdiyyəsinə bağlayan nəsə var, buna görə onu təmizliyə örnək göstərir. Örnəyi belə olan Aparatın görün pisi necədir!

Diktatura demokratiyası

R.Mehdiyevin Yevlaxdan nə gətirdiyini deyə bilmərəm, ancaq onun Yevlaxa ən azı bir maşın demokratiya apardığını demək olar. Bunu onun çıxışındakı çoxsaylı demokratiya sözlərindən bilmək olur. O orada demokratiyadan çox danışıb. Demokratiyaya ayrıca istəklə danışıb. Deyilənə görə, balıqlar belə Kürün Yevlaxda çox da bulanıq olmayan sularından baş qaldırıban administrator-filosof-akademikin demokratiya ilə bağlı nağıllarını ağzı açıla qalmaqla dinləyirmişlər. Bu gedişlə biz Azərbaycanda balıqların da tezliklə “vətəndaş cəmiyyətinin qurulması və demokratik prinsiplərin tətbiqi” ilə bağlı ortaya dünyada ANALOQU olmayan praktika qoyacağına ürəkdən inana bilərik. Onun indi elədikləri özünün yaradıcılıq örnəyi sayıla bilməz. Bunları o, ulu öndərindən, böyük müəllimindən öyrənib. Qabaqlar, şanlı 70-ci illərdə, onun böyük ustadı Moskvaya Azərbaycanın var-yatırını daşıyar, Moskvadan Azərbaycana uçaq-uçaq, qucaq-qucaq kommunizm alıb gətirərdi. O illərdə mağazalar bomboş olsa da, xalq alıb yeməyə, geyməyə nəsə tapmasa da, respublikamızda bütün Sovetlər Birliyində olmayan “kommunizm” vardı. Onda Azərbaycan o kommunizm bolluğundan IRI, çox IRI ADDIMLARLA IRƏLILƏYIRdi. Indi Azərbaycan demokratiya bolluğundan REGIONUN LIDER DÖVLƏTINƏ çevrilib. Bu gedişlə, ola bilər tezliklə Amerikanın özünü də vurub keçərik. Sovetlər Birliyi dağıldı. Içi kommunizm havası ilə dolmuş xalq onsuz dura, duruş gətirə bilmədi. Kimlərsə böyük bir xor düzəldib: “Qayıt gəl, qayıt gəl” çağırışlarında bulundular. Qayıtdı gəldi. Istədiklərini, işinə yararlı bildiklərini başına yığdı. Əski, sınaqlardan çıxmış praktikanın yönü dəyişdi. Indi Azərbaycandan Avropaya, Amerikaya var-yatır aparılır, oralardan Azərbaycana uçaq-uçaq, qucaq-qucaq demokratiya daşınırdı. 2000-ci ilin başlanğıcında qəzetlər Azərbaycandan Avropaya, Amerikaya daşınan var-yatırın 20 milyard dollardan artıq dəyərdə olduğunu yazırdı. Indi, neft pullarının axınından sonra, onun 50 milyard dolları ötdüyü bildirilir. Bunu hamıdan yaxşı onlara yardımçı olan ABŞ, Ingiltərə, Rusiya hökumətləri bilir. Iran başda olmaqla sözügedən dövlətlər üçün önəmlisi budur: kim varlanır varlansın, kim güclənir güclənsin, Azərbaycan varlanmasın, Azərbaycan güclənməsin. Bu isə bugünün, dünənin siyasəti deyil, antitürk maraqlarına bağlı əski dönəmlərin siyasətidir! O, ulu öndərindən, böyük müəllimindən xeyli balaca siyasətçi olduğuna görə öz çapına uyğun işlər görür: Bakıdan rayonlara demokratiya daşıyır. Bu özü də bir qanunauyğunluqdur: Bakını demokratiya ilə doldurub-daşdırıblar, indi bu demokratiyadan rayonlara da daşımaq gərəkdir. Bu iş üçünsə ən yararlı onu biliblər. Üstəlik, qabaqdan “Bizim sonuncu problemli seçkimiz” dedikləri bir seçki gəlir. Problem nədədir? Milli demokratik müxalifətin sayca az da qalsa, varlığında. Hakimiyyətə yiyələnəndən indiyədək - üç beşilliyə - müxalifəti azalda-azalda gəliblər. “Indiki seçkini də udsaq, qarşıdakı beşillikdə müxalifəti bitirəcəyik”- deyirlər. Sovet dönəmində beşillik planlarla xalqı, ölkəni, dövləti yüksəldirdilər, bunlar beşilliklərlə xalqı, ölkəni, dövləti... yenirlər! Deyilən yenmələrin özülü saxtalaşdırılan seçkilərdə qoyulur. Arxasında Azərbaycana düşmən güclərin dayandığı o seçkilər bunlara xalqı, ölkəni, dövləti yenmək üçün yeni kart-blanş olur. Bununla bağlı onun akademik seçki saxtakarlığına çağırışı çox yerinə düşür: “Bu ilin oktyabr ayında prezident seçkiləri keçiriləcəkdir. Bu hadisə bizim hamımızı səfərbər etməlidir. Növbəti prezident seçkisi çox yüksək səviyyədə keçməli, dünya standartlarına uyğun, ölkə tarixində indiyə qədər baş tutmuş ən mükəmməl və mütəşəkkil seçki olmalıdır. Bunu bizdən respublikada bərqərar olmuş demokratik mühit, prezident Ilham Əliyevin siyasi xətti, onun siyasi iradəsi tələb edir”. Bu yerdə “xoruzun quyruğu” görünür: toplantı “vətəndaş cəmiyyəti quruculuğu”, “demokratik prinsiplərin tətbiqi” adı altında keçirilsə də, başlıca ideya, başlıca istək, seçki “səfərbərliyi”, seçkinin bütünlüklə saxtalaşdırılması, yalançı sorğu sonuclarına uyğun göstərici əldə edilməsidir. “Mükəmməl”, “mütəşəkkil” seçki, “respublikada bərqərar olmuş demokratik mühit”, üstəgəl Əliyevçi Ramiz Mehdiyev kommunizmi. Başa düşün: demokratiyaya düşmən olduğuna görə Elmar Hüseynov öldürülüb, bir çox jurnalistlər döyülüb, dustaq edilib. Başqalarını nə gözlədiyini ağalar özləri bilərlər. Hələlik bilinən budur: yaltaqlara yalaq, əyilməzlərə şapalaq! Diktatura demokratiyası belə olur...

Mirzə Xəzərin Səsi: Xaliq Bahadır: Əliyevçi rejimin demokratiya dialektikası

Xaliq Bahadır: Əliyevçi rejimin demokratiya dialektikası