Elçibəy Azərbaycan siyasətinə ilk növbədə milləti təmənnasız sevmək örnəyini gətirdi

Mirzə Xəzər — Mon, 23 Jun 2008 09:39:10 -0400

«Taleyimizdə və tariximizdə böyük rolu olan şəxsiyyət»

Dünən “Azadlıq” bloku Azərbaycan Milli Azadlıq Hərakatının lideri Əbülfəz Elçibəyin 70 illiyilə bağlı dəyirmi masa keçirdi. Tədbiri AXCP sədri Əli Kərimli açaraq bildirdi ki, dəyirmi masa ətrafına toplanmaqda məqsəd Azərbaycanın təkcə 20-ci əsrdə yox, elə bütün zamanlarda yetişdirdiyi ən böyük şəxsiyyətlərdən birinin - Azərbaycan Milli Azadlıq Hərəkatının lideri, Azərbaycanın ümummilli lideri, eks-prezidenti Əbülfəz Elçibəyin yubileyini bir yerdə qeyd etməkdir: “Əbülfəz bəyi böyük edən həyatını məhz böyük ideyalara həsr etməsi olub. Əbülfəz bəy heç zaman kiçik işlərin ardınca getmədi. Kiçik şəxsləri öz şəxsiyyətindən aşağı hesab elədi. Bütün həyatını millətinə və millətin böyük ideallarına həsr elədi. Ona görə də milləti onu sevdi və böyütdü. Biz Elçibəyin timsalında bir daha bu həqiqəti gördük və əmin olduq ki, gerçəkdən də sevilmək üçün ilk növbədə sevmək lazımdır.

“Elçibəy gerçəkdən də bu millətin sevdalısı idi”

Rəhmətlik Nəcəf bəylə bağlı bir tədbirdə Əbülfəz bəy qəhərlənərək dedi ki, mənə kim nə deyirsə desin, mən onların heç birinə şərh vermək istəmirəm. Mən sadəcə bu millətin sevdalısıyam, mən bu milləti dəlicəsinə sevirəm. Bəy doğurdan da bu millətin sevdalısı idi, ona görə də millət o sevgini ona qaytardı. Hamımız şahidik ki, bu millət tərəfindən onun qədər sevilən başqa bir azərbaycanlı görmədik. Əbülfəz bəyi bu millətə əziz, hörmətli eləyən həm də onun önəm verdiyi, inandığı dəyərlər sistemi idi. Əbülfəz bəy çox böyük nümunələr yaratdı. Azərbaycan siyasətində ciddi bir məktəb yaratdı, böyük bir ardıcıllar nəsli yetişdirdi. Ola bilsin ki, bu gün o adamlar müxtəlif spektrlərdədilər və siyasi məsələlərdə seçimləri fərqlidir. Amma Azərbaycanda böyük demokratik kəsim formalaşıb. Bu təbəqə taktiki məsələlərdə nə düşünməyindən asılı olmayaraq, Elçibəyi özünə şəriksiz lider hesab edir.

Millətə xidməti ondan öyrənməyə çalışır. Elçibəy Azərbaycan siyasətinə bir sıra örnəklər gətirdi. Ilk növbədə milləti təmənnasız sevmək örnəyini. Əxlaqlı siyasəti Azərbaycana yerləşdirməyə çalışdı. Allah ona rəhmət etsin. Necə ki, varlığı ilə yaşadığı illərdə bütün mübarizə aparan insanlar üçün bir örnək idi, dünyasını dəyişəndən sonra yenə də bütün azərbaycanlıları sanki ucalığa, mənəviyyatlı siyasətə, demokratiya uğrunda ardıcıl mübarizəyə, istiqlalın keşiyində durmağa, milləti, Vətəni bütövləşdirməyə, xırda intriqalara qapılmamağa, uca olmağa səsləyir. Hər şeyin zamana ehtiyacı olduğuna bizlər onun ölümündən sonra bir daha əmin olduq. Doğurdan da bir sıra hallarda yerbəyer olmamış bir çox həqiqətləri də zaman yerbəyer eləyə bilir. Bu da Bəyin o böyük aforizminə yaşarlıq gətirir. Mən şadam ki, Azərbaycanın kifayət qədər geniş kəsimi, milli demokratik düşərgənin mütləq əksəriyyəti bu yubileyə biganə deyil. Hamı fərqindədir ki, yenə də Elçibəyə qısqanc münasibət var, dövlət səviyyəsində ona layiq olduğu qiymət verilmir. Hamı buna təbii də baxır. Elçibəy tamam başqa dəyərləri təmsil edir. Indi o dəyərlər dəbdə deyil. Indi o dəyərlərə dövlət səviyyəsində ögey baxılır. Biz hamımız buna da təbii yanaşırıq ki, necə sağlığında ona qərəzli, ədalətli münasibət var idi, hətta, dünyasını dəyişəndən sonra da o qərəz, o ədalətsizlik aradan qalxmayıb. Amma elə sağlığında da millət onu sevirdi, dünyasını dəyişəndən sonra da millət onu sevir".

“Əbülfəz bəy yeganə dissidentdir ki, dövlətin xəfiyyələrini öz pərəstişkarına çevirmişdi”

Sonra çıxış edən millət vəkili Cəmil Həsənli bildirdi ki, bu gün Azərbaycan milləti taleyimizdə və tariximizdə çox böyük rolu olan insanın doğum gününü qeyd edir: “Zaman-zaman Azərbaycanda millətin taleyi ilə bağlı ağırlıq yükünü çəkən kişilər olur. Bunlardan biri də 20-ci əsrin sonlarında Əbülfəz Elçibəydir. Azərbaycanın 20-ci əsr tarixi milli mübarizə tarixidir. Bu mübarizənin ideya istiqaməti 19-cu əsrin ortalarından Bakıxanov, Axundov, Zərdabi tərəfindən müəyyən edildi. 20-ci əsrin əvvəllərində Azərbaycanda millətçilik ideyası aparıcı oldu ki, bu yükün ağırlığını da öz çiyinlərində çəkən çox böyük insanlar vardı. Azərbaycanın taleyi elə gətirib ki, bəlkə də müəyyən bir ideya bütövlükdə ictimai fikrə hakim kəsilmir, amma bu millətin içərisindən hər zaman elə adamlar çıxıb ki, onlar millətin maraqları baxımından yükü üzərlərinə götürüblər. Məşrutə inqilabı zamanı Səttərxan, rus inqilabı zamanı Məmməd Əmin Rəsulzadə, demokratiya uğrunda mübarizə zamanı Şeyx Məhəmməd Xiyabani, Güney Azərbaycanda milli hökumətin qurulması zamanı Seyid Cəfər Pişəvəri və 20-ci əsrin sonunda bu missiyanı Əbülfəz Elçibəy həyata keçirib. Əbülfəz bəy bütün varlığı ilə bu millətə bağlı adam idi. 80-ci illərin sonunda milli mücadilə başlayanda bu mübarizədə iştirak edən insanların böyük hissəsi 70-ci ilərdə Elçibəyin dərnəkçilik siyasətindən keçmişdilər, onun ideyaları ətrafında birləşmişdilər.
71-ci ildə Əbülfəz bəy mənə dərs demişdi. O, maraqlı bir müəllim kimi də yadda qalmışdı. Əbülfəz bəy tərəfindən yaranan dərnəklərdə 80-ci illərdə açıq müstəviyə gələn məsələlər müzakirə olunurdu. Millətin haqları, Azərbaycanın müstəmləkə olması, bu müstəmləkədən qurtulması, həmçinin milli dil, milli mədəniyyət uğrunda mübarizə həmin dövrün dərnəklərinin aparıcı mövzularından idi. Əbülfəz bəy Sovet dövründə çox az olan dissidentlərdən biri idi. O dövrdə türk, müsəlman ölkələrində bu dissidentçilik o qədər də geniş yayılmamışdı. Baxmayaraq ki, həmin ölkələrdə mövcud quruluşa qarşı çox böyük etiraz vardı. Onu açıq şəkildə müzakirəyə çıxaran Əbülfəz bəy olmuşdu. Qərb tədqiqatçıları onu birmənalı şəkildə 70-ci illərin dissidentləri sırasına daxil edirlər. Bəy çox açıq şəkildə deyirdi ki, bu quruluşda ədalət yoxdur, zülm var, bu quruluş mütləq dağılmalıdır.
O, həmin o milli zülmün əlamətlərini 70-ci illərdə açıq şəkildə auditoriyalarda tələbələrə deyirdi. Əbülfəz bəyin dərnəklərində universitetin humantar fakültələrinin tələbələrinin böyük qismi iştirak edirdi. Onların əksəriyyəti ideya vurğunları idisə, qalanları dövlət təhlükəsizlik orqanlarının əməkdaşları idi. Əbülfəz bəy tarixdə yeganə dissidentdir ki, dövlət təhlükəsizlik orqanlarının xəfiyyələrini öz pərəstişkarına çevirmişdi.
Onların böyük hissəsi o əməldən əl çəkib Əbülfəz bəyin ideyasının ardıcılı olmuşdu. Bunu biz məhkəmə proseslərində də görmüşdük. Tarix qarşısında Əbülfəz bəyin bir xidməti də Güney məsələsi ilə bağlıdır. Elə o vaxtkı dərnəklərin əsas müzakirələrindən biri də bu məsələ idi. Bir maraqlı məqam da odur ki, Türkiyənin özündə Osmanlı tarixinə ögey münasibət olanda biz bu tarixin ən maraqlı, ən şirin səhifələrini Əbülfəz bəyin dilindən eşitmişik".

“Əbülfəz bəy böyük Azərbaycanda siyasi elita yaratdı”

AXCP Qadınlar Şurasının sədri Solmaz Hüseynova bildirdi ki, Əbülfəz bəy millətin yüz illərlə daxilində qalan vətənpərvərlik hissini oyada bilmişdi: “Xalqa elə emosiyalar verdi ki, millət onu lider kimi qəbul edib arxasınca getdi. Bəy xalqı səfərbər edib arxasınca apara bildi. Lider kimi məqsədi də, istiqamətləri də çox düzgün seçmişdi. Ona görə insanlar ona inandılar və müstəqillik uğrunda mübarizəyə qalxdılar. Əbülfəz bəy böyük siyasətçi idi və Azərbaycanda siyasi elitanı yaratmışdı. Bəy xanımlara münasibətdə də çox səmimi idi. Əbülfəz bəylə söhbət edəndə onun dahiliyi, onun böyüklüyü hiss olunmurdu. Hər kəslə öz dilində danışardı. Mən Əbülfəz bəyin ruhunun qarşısında baş əyirəm və Allahdan ona rəhmət diləyirəm".

“Özümü Əbülfəz bəyin əsgəri hiss edirəm”

AXCP Rəyasət Heyətinin üzvü Məşədi Vaqif isə çıxışına “mən özümü Əbülfəz bəyin əsgəri hiss edirəm” deməklə başladı: “Mən bura yığışan hər kəsə müraciət edirəm ki, gəlin, Elçibəy şəxsiyyətini qoruyaq. Onun adından şəxsi mənafeyimiz üçün istifadə etməyək. Əfsuslar olsun ki, bu gün Elçibəyi sevənlər bir neçə cəbhəyə bölünüb. Qürurla deyə bilərəm ki, mən Elçibəyin həqiqi davamçılarının tərəfindəyəm, hansı ki, onun ideyalarını həyata keçirirlər”.

“Bizlərə insan olmağın, türk olmağın fəlsəfəsini öyrədirdi”

Sonra çıxış edən KAXCP Ali Məclisinin sədri Zəlimxan Məmmədli dedi ki, dünənə qədər Elçibəy komandasında olub, müəyyən səbəblərdən müxtəlif qütblərdə olan insanların bir qismi bu məsələdə bir yerdədilər və bu sevindirici haldır. “Əbülfəz bəyin siyasətçi, lider, ağsaqqal, dost olaraq çox ciddi keyfiyyətlərindən danışmaq olar. Bəyi sevənlər də, düşmən hesab eləyənlər də onunla təmasdan müsbət enerji alırdılar. Əbülfəz bəyin nəhəng missiyası var idi - xarabalıqlar altında olan imperiyadan Azərbaycan qurmaq, Azərbaycan insanına milli kimliyini aşılamaq. Fundamental olaraq o insan olmağın, türk olmağın fəlsəfəsini öyrədirdi.
Əbülfəz bəy üçün insan faktoru ən böyük faktor idi. Bəzi liderlər nimdaş geyinənin yanından keçəndə salam vermir ki, ayıbdır, görən olar. Bəy o nimdaş geyinənlərin ayağına gələ bilirdi. Allahın yaratdığı bəndə olaraq çox yüksək dəyərləndirirdi. Liderlik, müəllimlik, insanlıq bax budur.
Bu gün Elçibəy düşüncə sisteminə yaxın olan insanlar Elçibəy platformasında birləşməlidirlər. Istər AXCP, istər KAXCP istərsə də Müsavat olsun bir yerdə olmalıdırlar. Elçibəyin 70 illiyi, Cümhuriyyətin 90 illiyi ərəfəsində biz bu ideyanı gerçəkləşdirməliyik. Bu halda biz Bəyin ruhunu da şad etmiş olarıq. Əli bəy, Mirmahmud bəy, Isa bəy, Lalə xanım və digərləri birləşməlidirlər. Bu birliyə mane olan faktor da yoxdur".

“Bəy zəmanəsinin ən böyük geopolitiklərindən idi”

Millət vəkili Pənah Hüseyn bildirdi ki, Əbülfəz bəy çağdaş dünyanın ən böyük siyasət xadimlərindən biridir:"Keçmiş SSRI-də özəlləşdirmə proqramı Əbülfəz bəyin imzası ilə təsdiq edildi. Bundan əvvəl ticarətin liberallaşması haqqında prezident sərəncamı verilmişdi. Ilk dəfə olaraq milli valyutanın tətbiqi haqqında sərəncam yenə Bəy tərəfindən verilmişdi. Təhsil sahəsində ən böyük inqilabı Elçibəy eləyib. Bir çox keçmiş sovet respublikaları hələ də test sisteminə keçməyiblər. Bəy rus qoşunlarını ölkədən çıxardı. Hətta Pribaltika ölkələrində bu proses 4 il çəkdi. Bakı-Ceyhan layihəsinin reallaşması üçün Istanbulda Əbülfəz bəy Süleyman Dəmirəllə birlikdə dövlətlərarası sənədə qol çəkdi. Əbülfəz bəy zəmanəsinin ən böyük geopolitiklərindən biri idi. Onun bütöv Azərbaycan ideyası təkcə Azərbaycanın milli ideyası deyildi. Bütün Avrasiya məkanının ən ciddi layihələrindən idi".

“Elçibəyin sevgisi hər kəsə çatırdı”

Tanınmış ziyalı Mehriban Vəzir isə çıxışına “Elçibəyin çox böyük qəlbi vardı” deməklə başladı: “Cəmiyyətdə adamlar görürəm ki, çox güclü biliyi, güclü nəzəriyyəsi var. Amma təcrübədə elədikləri tamam başqa şeydir. Belə qüsurlar insana xas bir şeydir, hər birimizdə ola bilər. Amma Elçibəy o qədər böyük qəlb sahibi idi ki, onun qələbəsinin bazası bu qəlb idi. Liderin könlü ilə vətəndaşın könlü arasında bir bağ olur. Bu könül nə qədər böyük, nəhəng olursa, köksü imanla genişlənirsə, onun uğurları bir o qədər çox olur, onun sevgisi hamıya çatır. Bu sevgi ilə hamını - dostu da, düşməni də, sevəni də, sevməyəni də idarə eləyir. Elçibəy bunu bacarırdı. Mən çox istərdim ki, Allah bizim önümüzdə gedən insanların qəlbini imanla genişləndirsin. Çünki cəmiyyətə ancaq bu işıq saça bilər. Cümhuriyyət dövrü şərəf, qürur dövrümüzdür. Ikinci dövrdə həmin ideyalar yenidən gündəmə gətirildi. 30-40 il müddətində Elçibəy öz məktəbini yaratdı və cəmiyyəti addım-addım müstəqilliyə doğru gətirdi. Və nəticə hasil etdi - Azərbaycan müstəqil oldu. Bir ölkənin azadlığından dəyərli ikinci bir şey ola bilməz. Bu dönəmdə hər birimiz öz itkimizi verdik. Kiminin elmi yaradıcılığı, kiminin işi, kiminin də taleyi yarımçıq qaldı. Təbii ki, bu qurbanlar olmasa heç nə əldə etmək olmaz. Amma ən mühüm olan odur ki, biz ümumi olaraq çox böyük şey qazandıq. Onun adı müstəqillikdir, azadlıqdır".

“Əbülfəz bəy təmiz əlli siyasətçi idi”

ALP-nin sədr əvəzi Əvəz Temirxan dedi ki, bu rejim Elçibəyin təmənnasız olmasını ideoloji təxribat kimi qəbul edir: “Elçibəy haqqında hər şey deyə bilərlər. Amma deyə bilməzlər ki, Elçibəy rüşvətxor olub. O öz tərəfdarları haqqında deyirdi ki, Xalq Hərəkatından gələn bəziləri tankın qarşısında dururdular, amma rüşvətin qarşısında dura bilmədilər. Elçibəy bunu etiraf edə bilirdi. Bu günkü rejimin başında duranlar onu deyə bilər? Əksinə deyir ki, mənimlə birgə oğurlayın. Əbülfəz bəy dövlət başçısı olaraq təmiz əlli siyasətçi idi. Bəyin böyüklüyü onda idi ki, Qarabağ uğrunda mübarizəni milli azadlıq hərəkatı uğrunda mübarizəyə çevirməyi bacardı”.

“Elçibəyə qarşı çox böyük sabotaj gedirdi”

Tanınmış jurnalist Xaliq Bahadır isə çıxışına belə başladı: “Biz Əbülfəz bəydən çox, özü də böyük pafosla danışa bilərik. Amma o zaman doğru danışmış olarıq ki, Əbülfəz bəyə simpatiya və antipatiyamızın dərəcəsindən asılı olmayaraq, bir yerdə olaq. Cəbhə dövründə mən televiziyada üç birliyin direktoru vəzifəsində işləmişəm. O zaman Elçibəy hakimiyyətinə qarşı çox böyük sabotaj gedirdi. Iqtisadi sabotajın başında Mütəllibovun, hərbi-siyasi sabotajın başında isə Heydər Əliyevin adamları dururdu. Üçüncüsü isə təmiz siyasi sabotaj idi ki, onun başında bu gün sizin 15 ildən bəri müxalifət lideri kimi tanıdığınız bir adam dururdu. O adam Elçibəy hakimiyyətini içəridən parçalayırdı. O proseslərlə bağlı Etibar Məmmədovun da adını çəkmək olar. Amma o zaman o müxalifətdə olduğu üçün mən ona haqq qazandırıram. Amma Elçibəyin ən yaxın adamlarından biri, özü də yüksək post tutan adam az qala hər gün ayağının altını qazırdı. Hər gün mənim stolumun üstünə kasetlər gəlirdi. Mən bu kasetlərlə o adamları təbliğ etməli idim, amma etmirdim. Çünki bu adamlar Azərbaycanı ələ keçirməyə çalışan imperiya güclərinə xidmət edirdilər".

“Demokratik düşərgə ağsaqqalsız qalıb”

Vətəndaş və Inkişaf Partiyasının sədri Əli Əliyev bildirdi ki, Elçibəyin nəhəngliyi hələ indilərdə duyulmağa və dəyərləndirilməyə başlanıb: “Əfsuslar olsun ki, kimisə itirəndən sonra həqiqi qiymət verməyə başlayırıq. Dağ uzaqlaşdıqca böyük görünür. Bu illər bizi Elçibəydən cismani olaraq uzaqlaşdırıb və bizlər onun həyat yolunu, ideyalarını düzgün dəyərləndirməyə başlamışıq. Indi biz Azərbaycanın demokratik düşərgəsini ağsaqqalsız, müxtəlif ideya daşıyıcılarını pərakəndə görməyə başlamışıq. Zaman gəldikcə alimlər Elçibəyin xidmətlərini düzgün qiymətləndirib tarixə çevirəcəklər. Elçibəyin səhvi yox idi? Var idi. Amma onun etdiyi müsbət işlər səhvlərini kölgədə saxlayırdı. Hamının susduğu, Imperiyaya qulluq elədiyi vaxtda bu şəxsiyyət Azərbaycanın müstəqilliyi haqqında, Turan dövləti haqqında düşünürdü. Azərbaycanın imperiyadan qurtulmalı olduğunu dilə gətirirdi. Fikirlərinə görə həbsə atılsa da, əqidəsindən dönmürdü. 60-cı illərin repressiyalarını, 70-ci illərin üzəduranlarını, 80-ci illərin satqınlarını, 90-cı illərin naqisliklərini görən bir şəxs sona qədər millətindən incimədi. Bu, onun əqidəsinə olan bağlılığından irəli gəlirdi”.

“Elçibəyə qarşı çox xəyanət olub”

Sonuncu çıxışçı Milli Birlik Hərəkatının lideri, professor Lalə Şövkət oldu: “Mənim üçün Elçibəy haqqında danışmaq çox çətindir. Çünki bizim aramızda müstəsna münasibətlər var idi. 90-cı ildə Elçibəy məni Moskvadan çağırdı və çox istədi ki, Xalq Cəbhəsi adından Milli Məclisə namizəd olum. Eyni yolu gedirdik, amma taktiki baxışlarımız bir qədər zidd idi. Sonra biz Elçibəylə dost olduq. Açıq deyim ki, siyasətçilər arasında dostluq olmur. Siyasətçilər həmişə bir-birindən ehtiyat edirlər ki, bu günün sabahı var. Bu gün ürəyimi açıb nəyisə deyərəm, sabah o söz mənə qarşı yönələr. Bəy həmişə bu məsələdə ehtiyatlı idi. Çünki görə-görə gəlmişdi. Amma biz Elçibəylə çox rahat dostluq edirdik. Bilirdik ki, nə o bu əmanəti açan deyil, nə mən. Bir dəfə ona sual verəndə ki, niyə, Liberal Partiyası ilə saziş bağlamırsız, dedi, Lalə Şövkətin sözü möhürdür. Bu, mənim üçün çox böyük söz idi. Bir dəfə ANS kanalında dedi ki, bu gün ən çox Lalə Şövkəti, bir də məni vururlar, həm sağdan, həm soldan.
Hələ zaman çatmayıb ki, bu məsələlər hamısı gəlib həllini tapsın. Bəlkə mən də dünyadan köçəndə bunların çoxunu özümlə aparacam. Ona görə ki əmanətdir. Amma bunları bilə-bilə yaşamaq çox ağırdır. Çox şeyi görürsən və deyirsən, Ilahi, necə olur ki, bu adam bu işi görüb, amma özünü rahat hiss eləyir, rahat danışır. Çox şeyin şahidiyəm və ona görə də süniliyi, oyunu qəbul etmirəm. Elçibəy də süniliyi qəbul etmirdi.
Ən son danışığımız Bəy Türkiyədə xəstəxanada yatanda olmuşdu. Onunla saatlarla söhbət edirdik. Bu söhbətlərdə çox ağrı var idi. Elçibəyə qarşı çox xəyanət olub. Amma, görünür bu da onun qismətidir. Çox fəlakətlər yaşadı. Onu heç zaman təkcə siyasi çərçivədə görmədim. Mən Elçibəyi həmişə siyasətdən qat-qat üstün görmüşəm. Elçibəy mənim üçün milli ideya daşıyıcısı olub, milli ruhun sahibi olub. Həmişə onu Mahatma Qandi ilə müqayisə etmişəm. Insan kimi çox alicənab idi. Bu dünyada hər şeyi öyrənmək olar - protokolu da, siyasəti də, geosiyasəti də. Alicənablığı öyrənmək mümkün deyil. Bu ya sənin təbiətində var, ya yoxdur. Elçibəy hər şeyin yerini, hər kəsin qiymətini bilən çox həssas bir insan idi. Ölümünə bir ay qalmış ANS-də danışanda onun içində nə qədər sarsıntı vırdı. O ölmək istəyirdi, ölmək arzusunda idi. Bəzi şeylərdən çox bezmişdi. Mən bunun şahidi olmuşam. Elçibəy böyük məqsədi, böyük amalı olan və öz həyatını bunlara qurban verən insan idi. Elçibəy məqsədinə çatmaq üçün hər vasitəyə bəraət qazandıran insan deyildi. O, mənəviyyatı, əqidəni hər şeydən üstün tuturdu. Bilirdi ki, mənəviyyatsız siyasəti qəbul etsəydi, indiyə qədər prezident qalacaqdı. Elçibəy Azərbaycan tarixi üçün böyük insan, böyük lider nümunəsidir. Hər dövrdə belə bir mərhələ olur ki, dəyərlər dəyərsizləşir, ağıllı ilə cahilin arasında fərq qoyulmur. Dəyərlər adamı üçün belə abırsız mərhələdə yaşamaq çox çətin, çox acıdır. Bu gün biz bu abırsız məqamı yaşayırıq. Azərbaycan yalan içində üzür, yaxşı ilə pisin arasında fərq yoxdur, cahilə dahi deyirlər. Amma bu çox davam edə bilməz. Hər millətin öz immuniteti var. O müəyyən məqamda zəifləyir, amma sonra yenə öz yerini tutur. Öz yerini tutmaq üçün ona dərman olan nümunələr lazımdır. Bu gün həmin nümunə Elçibəy nümunəsidir. Yaxşı ki, Azərbaycan tarixində Məmməd Əmin olub, Topçubaşov olub, Üzeyir bəy olub və çox xoşbəxtik ki, Azərbaycan tarixində Elçibəy olub. Allah
Elçibəyə rəhmət eləsin, yeri behişt olsun!
Sonda AXCP sədri Əli Kərimli elan etdi ki, bu gün saat 12.00-da Əbülfəz Elçibəyin məzarı ziyarət olunacaq və bütün Elçibəysevərlər bu mərasimdə iştirak edə bilər.

Gültəkin Knyazqızı

("Azadlıq" qəzeti)

Mirzə Xəzərin Səsi: Elçibəy Azərbaycan siyasətinə ilk növbədə milləti təmənnasız sevmək örnəyini gətirdi

Elçibəy Azərbaycan siyasətinə ilk növbədə milləti təmənnasız sevmək örnəyini gətirdi