Mirzə Xəzərin Səsi

foto: Yeni Musavat

Emin Milli və Adnan Hacızadəyə dəstək aksiyasında saxlanılanlar oldu

Dünən saat 14:00-da “Dalğa” Gənclər Hərəkatının üzvləri məhbus bloggerlər Adnan Hacızadə və Emin Millinin həbsinin bir ilinin tamam olması ilə bağlı aksiya keçirdilər. Gənclər “Filarmoniya bağı”nda bəyanatlarını səsləndirdilər.

Əllərində Emin Milli və Adnan Hacızadənin şəkilləri, üstündə “Azad edin, gələcək qursunlar!”, “Adnan və Eminə azadlıq!”, “Qanunsuz məhkəmə qərarını ləğv edin!”, “Gənclərə təzyiqlərə son qoyun!” şüarları yazılmış plakat və rəngli şarlarla Prezident Administrasiyasının qarşısına yürüş etdilər.

Yolda aksiyaya müdaxilə edən polis üstündə şüarlar yazılmış plakatların yarısını alıb cırsalar da aksiyaçılar yürüşlərinə davam etdilər. Prezident Administrasiyası önündə “Emin, Adnan” qışqıran gəncləri həbs etdilər. Həbs olunan aksiyaçılar elə oradaca rəngli şarları göyə uçurtdular. Daha sonra aksiya barəsində jurnalistlərə məlumat vermək istəyən “Poliqon” İnformasiya Agentliyinin əməkdaşı, eyni zamanda “Dalğa” GH-nin üzvü Pərviz Əzimov da polis müdaxiləsinə məruz qalaraq ərazidən kənarlaşdırıldı.
Polislər jurnalistlərlə təhqiramiz formada davranır, onların ərazidən uzaqlaşmasını tələb edirdilər.

Aksiyada saxlanılan 5 gənc Səbayel Rayon Polis İdarəsinin 9-cu polis bölməsinə aparıldılar və bir müddətdən sonra sərbəst buraxıldılar.

Dünən “Dalğa” GH üzvləri Gürcüstanın paytaxtı Tiflisdə də aksiya keçiriblər. Onlar Azərbaycanın Gürcüstandakı səfirliyi önündən “Rustavelli” metrostansiyasına gedən yolla yürüş ediliblər. Emin Milli və Adnan Hacızadənin müdafiəsinə həsr olunmuş aksiyada “Adnana və Eminə azadlıq!”, “Mənə azadlıq ver!”, “Bloq açmaq cinayət deyil!”, “Give me freedom,give me fire!”, “Freedom for Adnan and Emin!” və “Vesti bloq ne prestuplenie!” şüarları səsləndirilib. Gürcüstanda yaşayanlara bloggerlər haqqında geniş məlumat verilib, onların həbsi barədə ətraflı məlumatlar yazılmış vərəqələr paylanıb. Gənclər Gürcüstanda polisin onlarla normal davrandığını deyirlər.

Qeyd edək ki, Emin Milli və Adnan Hacızadə 2009-cu il iyulun 8-də Bakının “Livan” restoranında baş verən insidentdən sonra şərlənərək tutulub, daha sonra məhkum ediliblər. Səbayel Rayon Məhkəməsinin 11 noyabr 2009-cu il tarixli hökmü ilə Emin Milli 2 il 6 ay, Adnan Hacızadə isə 2 il müddətinə azadlıqdan məhrum edilib. Onlar artıq bir ildir ki, ədalətsiz şəkildə həbsdədirlər.

“Sərhədsiz Reportyorlar” bloggerlərə dərhal azadlıq tələb etdi

Bloggerlər Adnan Hacızadə və Emin Millinin həbsinin ildönümündə “Sərhədsiz reportyorlar” rəsmi Bakının inadkarlığına etirazını bildirərək onları dərhal azad etməyə çağırıb. “Turan”ın məlumatına görə, bəyanatda bildirilib ki, “saxta ittihamla həbs olunan bloggerlər Azərbaycanın korrupsiyaya uğramış hakimiyyətinin videoparodiyasına görə cəzalandırılıblar”.
Beynəlxalq birlik onların azaldığa buraxılmasını tələb edir, lakin hakimiyyət özünü elə aparır ki, guya bu tələbləri eşitmir, fikir azadlığı hüququnu açıq şəkildə pozur. “Lakin bu təzyiq onlar azad olunana kimi davam edəcək”, - sənəddə qeyd olunur.

Elmin BƏDƏLOV Yeni Musavat: http://www.musavat.com/new/Gündəm/80354-GƏNCLƏR_PREZİDENT_ADMİNİSTRASİYASINA_YÜRÜŞ_ETDİLƏR

Həbsdə olan gənc bloqçu Emin Millinin atası Paşa Abdullayev vəfat edib. Emin Millinin vəkili Elton Quliyev “Media forum” saytına bildirib ki, bir sıra xəstəlikdən əziyyət çəkən 75 yaşlı Paşa Abdullayevin vəziyyəti iyunun 29-u gecə pisləşib və bir neçə saat sonra o, dünyasını dəyişib.

Emin Milli (Abdullayev Emin Paşa oğlu) 1979-cu ildə Bakıda doğulub. Bakı Dövlət Universitetinin beynəlxalq hüquq fakültəsini bitirib. 1999-2000-ci illərdə Beynəlxalq Respublikaçılar İnstitutunda koordinator işləyib. 2001-2002-ci illərdə Almaniyada oxuyub. 2002-ci ildən 2004-cü ilə qədər Fridrix Ebert Fondunun Azərbaycanda rəhbəri olub. 2005-ci ildən ictimai fəaliyyətlə məşğul olan Emin Milli 2009-cu il iyulun 8-də Bakının “Livan” restoranında davadan sonra digər gənc fəal Adnan Hacızadə ilə birgə tutulub. Cinayət Məcəlləsinin 127.2.3 (qəsdən sağlamlığa az ağır zərər vurma) və 221.2.1 (xuliqanlıq) maddələri ilə təqsirli bilinən Emin Milli Səbail Rayon Məhkəməsinin 11 noyabr 2009-cu il tarixli hökmü ilə 2 il 6 ay müddətinə azadlıqdan məhrum edilib. Salyanda yerləşən 5 saylı Cəzaçəkmə Müəssisəsində cəza çəkir.

Əsəb xəstəliyi, yüksək qan təzyiqi və böyrək çatışmazlığından əziyyət çəkən Paşa Abdullayev oğlunun həbsindən bir müddət sonra Sabunçu rayonundakı 3 saylı Şəhər Klinik Xəstəxanasının reanimasiya şöbəsinə yerləşdirilmiş və müalicəsini paytaxtdakı 1 saylı Klinik Xəstəxanada davam etdirmişdi.

Allah rəhmət eləsin!

"Media forum"

foto: musavat.com

Xalq Cəbhəsi, Liberal, Vətəndaş və İnkişaf partiyalarının daxil olduğu “Azadlıq” bloku iyunun 5-i Bakıda mitinq keçirməyə cəhd göstərib. Aksiyaçılar əvvəlcədən elan olunmuş məkana - “Nərimanov” kinoteatrının qarşısına deyil, paytaxt meriyasının binası qarşısına toplaşmaq istəyiblər.

“Media forum” saytı xəbər verir ki, metronun “İçərişəhər” stansiyasından çıxıb Bakı Şəhər İcra Hakimiyyətinin binasına sarı yürüş etmək istəyən 50-yə yaxın aksiyaçı polisin müqaviməti ilə üzləşib. Saxlanılanlar var. AXCP üzvü Vaqif Xalıqov xəsarət alıb, burnu zədələnib.

Aksiyanı beynəlxalq təşkilatların - Avropa Şurasının, ATƏT-in təmsilçiləri də izləyir. Əraziyə paytaxt polisinin və Çevik Polis Alayının qüvvələri cəlb olunub.

Bakı Şəhər İcra Hakimiyyəti “Azadlıq” blokunun iyunun 5-də mitinq keçirməklə bağlı müraciətinə iyunun 2-də cavab verib. Meriya aksiyanı Binəqədi qəsəbəsinin İdman-Sağlamlıq Kompleksinin stadionu, 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydança və ya Zığ yolu küçəsi, 29/22-ci məhəllə ilə üzbəüzdəki meydançada keçirməyi məsləhət görüb.

Meriyaya müraciətdə aksiyanın şəhərin mərkəzi meydanlarında keçirilməsinə şərait yaradılmasını istədiyindən “Azadlıq” bloku iyunun 5-i saat 15.00-da “Nərimanov” kinoteatrının qarşısına sanksiyalaşdırılmamış aksiya təyin etmişdi.

"Media forum"