Almaniya hökuməti: Əgər İlham Əliyev „Eurovision“ mahnı müsabiqəsindən qabaq siyasi məhbusları azad etməzsə, ona çox güclü təzyiq göstəriləcək
Almaniya hökumətinin insan hüquqları üzrə nümyəndəsi Markus Löninq Münxendə çıxan „Züddoyçe Saytunq“ (Sueddeutsche Zeitung) qəzetinə verdiyi müsahibədə Bakıda keçiriləcək „Avroviziya“ mahnı müsabiqəsinə sadəlölhcəsinə yanaşmamağa çağırmışdır. Onun sözlərinə görə, Bakə müsabiqəsi üçün alman təmsilçisini axtararkən, telekanallar yalnız musiqi sədalarına bənd olub qalmasınlar. Onların vəzifəsi Azərbaycandakı real vəziyyət haqqında ictimaiyyətə düzgün məlumat verməkdən ibarətdir. Löninq demişdir: „Mənim fikrimcə, Bakıda mahnı müsabiqəsinin qüsursuz keçməsi üçün bütün siyasi məhbuslar azadlığa çıxmalıdır. Konsert salonundan bir neçə kilometr məsafədə insanlar həbsxanada əzab çəkdiyi bir zamanda səhnədə şənlənib vicdan əzabı çəkmədən mahnı ifa etmək çox çətindir. Azərbaycan azad ölkə deyil. Müxalifət əzilir, azad seçkilərə yol verilmir.
Bəs Almaniya nə etməlidir? Bakı mahnı müsabiqəsini boyqot etməlidirmi? Hökumətin nümayəndəsininsözlərinə görə, prezident İlham Əliyevə çatdırmaq lazımdır ki, bizim Bakıya müsabiqəyə gəlməyimizi istəyirsə, bütün siyasi məhbusları azad etməlidir.
Mirzə Xəzər
05.12.2012
Neft və qaz məmləkətindən xəbər var. Bakı kəndləri ayağa qalxdı
Bakı kəndlərində artıq iki sutkaya yaxındır ki, elektrik və qaz problemi yaranıb.
Sakinlərin “Qafqazifo”ya verdikləri məlumata görə, Məhəmmədi kəndində yaşayan bir qrup sakin etiraz əlaməti olaraq Pirşağı yolunu bağlayıb. Aksiya iştirakçıları şaxtalı havalarda istilik sistemi olmadığı üçün evlərini qızdırmağın mümkün olmadığını bildiriblər. Yolu bağlayan kənd sakinləri evlərə elektrik enerjisinin verilməsini tələb edən şüarlar səsləndiriblər. Etiraz aksiyası baş verən əraziyə polis əməkdaşları da gəliblər. Buna baxmayaraq, aksiya hələ də davam edir.
Mirzə Xəzərin kitabı yaxında nəşr ediləcək
Mirzə Xəzərin kitabı üzərində iş son mərhələdədir. „Mirzə Xəzərin Səsi və Sözü“ adı ilə işıq üzü görəcək kitabda müəllifin son səkkiz ildə yazdığı məqalələr, şərhlər, esselər toplanıb. Bununla yanaşı, rus və ingilis dillərində yazılan məqalə və şərhlər, müəllifin verdiyi müsahibələr, ona gələn məktublar da kitaba daxil edilib. Kitab üzərində son redaktə işləri artıq sona çatır və bir ay ərzində nəşriyyata göndəriləcəyi gözlənilir. „Mirzə Xəzərin Səsi və Sözü“ kitabının harada nəşr ediləcəyi barədə hələ qəti qərar verilməyib. Azərbaycanla yanaşı Almaniya və Türkiyənin də adı çəkilir. Kitabın nəşri başa çatan kimi oxuculara məlumat veriləcəkdir.
„Mirzə Xəzərin Səsi“ qəzeti
27.01.2012