Mirzə Xəzərin Səsi

“Azadlıq” blokunun aprelin 26-sı Bakı Şəhər İcra Hakimiyyətinin binası qarşısında keçirmək istədiyi aksiya başlamamış polis əməkdaşları AXCP sədrinin müavini Nurəddin Məmmədlini və “Bizim yol” qəzetinin müxbiri Əfqan Muxtarlını saxlayıb.

Xalq Cəbhəsi Partiyası Ali Məclisinin sədri Həsən Kərimov “Media forum” saytına bildirib ki, bu şəxslərin hara aparıldığı bəlli deyil: “Onların hər ikisini “İçərişəhər” metrostansiyasının qarşısında tutublar. Əldə olunan digər xəbər odur ki, daha dörd nəfər Nəsimi Rayon Polis İdarəsinə aparılıb. Onlardan biri cəbhəçi Ramiz Əhədovdur. O, mobil telefonla zəng vurub özünün və digərlərinin idarəyə gətirildiyini dedi. Digərlərinin adını deməyə polis imkan vermədi”.

H.Kərimov bu gün saat 11-də Bakı Şəhər Polis İdarəsinin rəis müavini Yaşar Əliyevlə görüşdüyünü deyib: “Söhbətimiz 15 dəqiqə çəkdi. Mənə bildirdi ki, Bakıda dünya dini liderlərinin sammiti keçirilir, aksiyanın keçirilməsindən imtina edək. Amma mən aksiya keçirməkdə israrlı olduğumuzu dedim. O da nəyin bahasına olur-olsun aksiyanın qarşısını alacağını dedi. Hər ikimiz mövqelərimizdə qaldıq və ayrıldıq”.

Xalq Cəbhəsi, Liberal, Vətəndaş və İnkişaf partiyalarının daxil olduğu “Azadlıq” blokunun piketinin əsas tələbi sərbəst toplaşmaq azadlığının təmin olunması və aksiyalara icazə verilməsidir.

«Media forum»