Mirzə Xəzərin Səsi

“Yazı-pozu adamları üçün sakit, işsiz dayanmaq çox çətindir. Xüsusən də beyində mövzular bir-birini qovursa... Amma öz yazılarımla oxucularımın görüşünə gələcəm”. “Azadlıq” və “Amerikanın səsi” radiolarının Azərbaycan bürolarının keçmiş rəhbəri Mirzə Xəzər “Media forum”a açıqlamasında 2009-cu ilin sonlarından səhhətində baş vermiş nasazlığın hələ də qaldığını, hazırda müalicəsini evdə davam etdirdiyini deyib.

Astma xəstəliyinin kəskinləşməsi səbəbindən 2009-cu il dekabrın 10-da Münhen xəstəxanasına yerləşdirilən M.Xəzər yanvarın 20-də burda əməliyyat olunub. Onun öd kisəsi götürülüb. Həmin gündən M.Xəzər süni tənəffüs aparatı vasitəsilə nəfəs alıb və yatılı vəziyyətdə olub. O, fevral ayında müalicəsini Almaniyada sanatoriyada davam etdirib.

M.Xəzər evdə fizioterapiya müalicəsi aldığını deyib: “Mütəxəssis evə gəlir. Yəqin ki, iki-üç həftəyə enerjimi tam bərpa edəcəyəm”.

O, fevral ayının sonlarında sanatoriyadan döndükdən sonra “Mirzexezerinsesi.net” ünvanlı saytının işləmədiyini bildirib: “Sayt tamamilə açılmırdı. Bunu araşdırmaq məqsədilə server xidmətinə müraciət elədim. Bundan sonra saytın fəaliyyəti bərpa olundu”.

M.Xəzər saytla bağlı texniki problemin hələ ona izah edilmədiyini deyib: “Mən bilmirəm, bu müddət ərzində sayt niyə işləməyib. Amma arxivə heç bir ziyan dəyməyib. Martın 5-dən yenidən saytın fəaliyyətini bərpa edə bildim”.

Mirzə Xəzər (Mikayılov Mirzə Kərim oğlu) 1947-ci il noyabrın 29-da Göyçay şəhərində doğulub. 1974-cü ildə SSRİ-dən İsrailə mühacirət edib. 1985-87-ci illərdə “Amerikanın səsi” radiosunun, 1987-2003-cü illərdə “Azadlıq” radiosunun Azərbaycan redaksiyasına rəhbərlik edib. Hazırda Almaniyada yaşayır.

«Media forum»