Mirzə Xəzərin Səsi

“Sözün düzü, mən nəyəsə ümid edirdim. Amma görünür, mən ətraf mühiti yaxşı başa düşmürəm. Olmadı, nə edə bilərəm?.. Ədalətsizlik oldu”. Gənc bloqçu Adnan Hacızadənin atası Hikmət Hacızadə Bakı Apellyasiya Məhkəməsinin martın 10-da çıxardığı qərara münasibətini “Media forum” saytına açıqlayarkən belə deyib.

Bakı Apellyasiya Məhkəməsi 2009-cu il iyulunda paytaxtın “Livan” restoranında baş verən insidentdən sonra tutulan, qəsdən sağlamlığa az ağır zərər vurmada və xuliqanlıqda təqsirli bilinən, Səbail Rayon Məhkəməsinin 11 noyabr 2009-cu il tarixli hökmü ilə azadlıqdan məhrum edilən gənc bloqçular Emin Milli və Adnan Hacızadə barəsində çıxarılan hökmü qüvvədə saxlayıb. Səbail məhkəməsi E.Millini 2 il 6 ay, A.Hacızadəni 2 il müddətinə azadlıqdan məhrum edib.

“Media forum”a açıqlamasında H.Hacızadə deyib ki, apellyasiya instansiyasının qərarından Ali Məhkəməyə şikayət edəcəklər. Eyni zamanda gənclərin hüquqlarının müdafiəsi üçün bütün lazımı addımlar atılacaq: “Avropa İnsan Haqları Məhkəməsinə qədər müraciət edəcəyik”.

H.Hacızadə bloqçuların həbsinə etiraz edən yerli və xarici təşkilatların müraciətlərinin təsirsiz qalmasını belə izah edib: “O müraciətlərin heç bir real gücü yoxdur. Onların arxasında hər hansı sanksiya dayanmır. Sözdən ibarət olan o müraciətlərin yalnız insanların qəlbinə, vicdanına təsir etməyə iqtidarı çatır. Ona görə də təsiri yoxdur”.

H.Hacızadə təsir göstərə biləcək vacib işləri xalqdan gözləmək lazım olduğunu da vurğulayıb.

http://www.mediaforum.az/articles.php?lang=az&page=00&article_id=20100310055830966