Mirzə Xəzərin Səsi

10 avgust 2009-cu il., Baki şəhəri.
Azərbaycan CM-nin 274-ci (“Dövlətə Xəyanət”) maddəsiylə mühakimə edilmiş “Tolışi Sədo” (“Talışın Səsi”) qəzetinin baş redaktoru Novruzəli Məmmədovun Hüquqlarını Müdafiyə Komitəsi
Sədr: Hilal Məmmədov
Тел: + 99 450 559 40 63; +99 412 423 21 22.
e-mail: hilalmamedov@yandex.ru

Bu günlərdə Avropa Şurası baş katibinin Azərbaycandakı xüsusi nümayəndəsi xanım Veronika Kotek Ədliyyə Nazirliyinin nümayəndəliyi ilə birgə səhhəti kəskin şəkildə ağırlaşdığından 15 saylı ciddi rejimli cəzaçəkmə müəssəsindən Penitensiar Xidmtinin Mərkəzi Xəstəxanasına köçürülmiş Respublika Talış Mədəniyyət Mərkəzinin rəhbəri, “Tolişi Sədo” (“Talışın Səsi”) qəzetinin baş redaktoru lingvist -alim Novruzəli Məmmədovla görüşmüşlər.

Sonra onlar N.Məmmədovun iştirakıyla, xəstəxananın rəhbərliyi və N.Məmmədovu müayinə edən həkimlərlə birgə görüşmüşlər. Həkimlər onun səhhətini orta-ağır qiymətləndirmişlər. Xanim Veronika Kotekin – “bəlkə biz N.Məmmədovun səhhətiylə bağlı olaraq, bu xəstəxanaya Avropa Şurasının rəsmi xəttiylə məsləhətşi mütəxəssis- həkim dəvət edək?!”, sualına həmin xəstəxananın rəhbərliyi və dövlət rəsmiləri - “Azərbaycan Respublikasının qanunvericiliyində buna yer verilmir”, deyə cavab verilmişdir.

Növbəti gün xanim Veronika Kotek N.Məmmədovun həyat yoldaşı, biologiya elmləri namizədi, milliyətcə avar olan Məryəm Məmmədova ilə görüşmüşdir. Xanim Veronika Kotek tanınmış lingvist-alim, qocaman N.Məmmədovun həbsi, 10 il müddətinə azadlıqdan məhrum edilməsi, karserə salınması və hal-hazırda səhhətinin kəskin şəkildə ağirlaşması xəbərlərindən hədsiz dərəcədə məyus olduğunu bildirmişdir. O bildirmişdir ki, “N.Məmmədovla tanışlığı və əməkdaşlığı - hələ onun azadliqda olduğu vaxtlara təsadüf edir. Onda N.Məmmədov bizə Avropa Şurasının bir sıra rəsmi sənədlərinin azərbaycan türkcəsinə və talışcaya lingvistik tərcüməsində köməklik etmiş və bəzi məsləhətlər vermişdir. Onun qəfil həbs edilməsi xəbəri isə şəxsən bizim üçün cox gözlənilməz idi və Avropanın bir çox rəsmi və geyri-hökümət nümayəndələri bu işə münasibətlərində gözləmə mövgeyini seçmişdilər. Lakin sonralar istintaqın “ittiham aktı” və yerli məhkəmələrin qərarlarının mətni ilə tanışlıqdan sonra N.Məmmədova qarşı bir sıra əsaslandırılmamış iddiaların irəli sürüldüyünə təəccüb etdik... “İran xüsusi Xidmət orqanlarının tapşırığı” kimi qiymətləndirilən bir sıra iddialar Azərbaycan Respublikasının AŞPA qarşısında götürdiyi öhdəliklərdən ibarət idi. Hətta, tanınmış bir hüquqşünas alim tərəfindən “Tolışi Sədo” qəzetində dərc edilən “Milli Azlıqlar barədə Avropa Konvensiyası” barədəki şərhlər belə həmin “xüsusi xidmət orqanlarının sifarişi” hesab edilmişdi. Əminəm ki, İnsan Haqqları Üzrə Avropa Məhkəməsi bu barədə öz ədalətli qərarını verəcəkdir”.

Daha sonra xanim Veronika Kotek bildirmişdir: “Gizlətmirəm ki, bu məsələ artiq Avropa Şurasının diqqət mərkəzindədir və AŞPA-nın İnsan Haqqları üzrə komissarı cənab Tomas Hammerberg dəfələrlə bu xoşagəlməz hadisədən hədsiz dərəcədə narahatçılığını ölkənizin rəhbərliyinə də bildirmişdir”.

Xanim Veronika Kotek eyni zamanda N.Məmmədovun səhhətinin ağırlaşmasından xeyli dərəcədə narahat olduğunu bildirmişdir: “İndi o bir müddət öncə Cəzaçəkmə Müəssəsində gördüyümüz vəziyyətindən kəskin şəkildə fərqlənir. O vaxtlat çox gümrah gorünən N.Məmmədov bu gün praktik olaraq tərpənə və danışa bilmir və cox çətinliklə də nəfəs alır”.

Məryəm xanımla söhbətinin sonunda xanim Veronika Kotek ona vəd vermişdir ki, -“Avropa Şurası Novruzəli Məmmədovun müalicəsi və şəraitinin yaxşilaşdirılmasından ötrü əlindən gələni əsirgəməyəcəkdir”.
Məryəm Məmmədova xanim Veronika Kotekə onu səmimi qəbul etdiyinə və dünya şöhrətli məhkum alimin taleyinə biganə qalmadığına görə öz minnətdarlığını bildirmişdir.

N.Məmmədovun hüquqlarını müdafiə Komitəsi də N.Məmmədovun işinə göstərdiyi hədsiz diqqətinə, İnsan Haqqlarının qorunması və Ədalətin bərqərar olması yolundakı xeyirxah xidmətlərinə görə şəxsən xanim Veronika Kotekə öz dərin minnətdarlıqlarını bildirir.

Komitə N.Məmmədovla bağlı bu günə bəlli olan son məlumatı da ictimaiyyətin nəzərinə çatdirır: Hal-hazırda alimin səhhəti orta-ağır hesab edilirək sağlamlığında heç bir müsbət irəlləyiş nəzərə çarpmır.