Mirzə Xəzərin Səsi

Cavidan

 

 

 

 

 

 

 

 

 

CAVİDANIN
SEVGİ,SEHR,SİRR DOLU ŞEİRLƏRİ…

 

 

 

SİRRİNİ BİLDİYİN QADIN...

 

 

 

ən kiçik sirrini bildiyin qadın
ən böyük nifrəti edəcək sənə
və
ən gözəl
sevgi sözləri
pıçıldayacaq
sığınıb da köksünə…
aldanma…
sirrini bildiyin qadın
sənin deyil…

 

 

 

YERLƏ GÖYÜN ARASINDA…

 

 

Nolar
çiçəkləri üzməyin,
onlar
balaca uşaq əlləridir
göylərə açılıb...

 

 

 

Nolar
uşaqları əzməyin,
onlar
xırdaca yaz çiçəkləridir
yerlərə səpilib...

 

 

 

Nolar
ürəkləri üzməyin,
sevgiləri əzməyin,
onlar
uşaq əllərində
tər çiçəklər kimidir
yerlə
göyün
arasında...

 

 

ÖZÜNÜQORUMA İNSTİNKTİ…

 

 

Sevilməyən qadınlar
kökələr
yekələr
dağ boyda olar
dağ boyda dərdini yeyir axı hər gün

dərd
yaman kalorilidir, bilirsiz...

 

 

 

və
özünü
sevgisiz kişidən
qorumaq instinkti
böyüdər onu
nəhəng
Div anası boyda edər.

 

 

 

ÖLÜM DOĞULANDA…

 

 

 

Çətiri olmayan uşaqlar
buludlarla dil taparlar,
yağışlara qarışacaq
göz yaşları.

 

 

 

Sevmədən ərə gedən qızlar
qandan başqa
bir şey verəmməzlər ərlərinə

və o qan
bir ömür boyu
laxtalanıb qalar ürəklərində.

 

 

 

İstəmədən hamilə olanlar
ölüm gəzdirər bətnində
hər ölüm doğulanda
ağlayacaq Tanrı
göz yaşları
süzüləcək buludlardan
çətiri olmayan
uşaqların başına...

 

 

 

 

 

 

GÖRƏK NOLUR...

 

 

 

Bir adını yüz dedilər,
Qalmadı o söz, dedilər,
Ürəyinə köz ələyib
Sənə elə “ Döz! dedilər...
Döz, ey xalqım...
Görək nolur...

 

 

 

Tarixə bir çön ümidlə,
Qüdrətinə dön ümidlə,
Qolundakı son zənciri
Uyutduğun son ümidlə
Üz, ey bağlım...
Görək nolur...

 

 

Sən ümmanda dağmı gəzdin?
Min dağınla sağmı gəzdin?
Sən özündə haqq görməyib
Yad əllərdə haqqmı gəzdin?
Gəz, ey haqlım...
Görək nolur...

 

 

 

* *

 

 

 

RƏSM DƏRSİ…

 

 

 

Çək,
öncə bu kahanın divarlarına
pəncərələr çək...
birində günəş,
birində ay, ulduzlar,
birində ağac budağı
və baharın ilk günü olsun...

 

 

 

sonra
boyun bərabərində
çiyinlər çək
başını qoymaq üçün

 

 

 

 

sonra
barmaqların qədər
şırımlar...
təkrar-təkrar,
dönə-dönə
saymaq üçün...
illərini,
günlərini,
anlarını
onca barmaq şırımında
sayıb bitir...

 

 

 

Sonda isə
bu zindanın
ən qaranlıq tərəfində
ən sonuncu
şedevrini yarat

 

 

 

açıq qapı çək orda...

ilk əsərin -
bu qaranlıq kahadan
qurtul
və get
üfüqlərdən
təzə boya almaq üçün...

 

 

 

* *

 

 

 

QÜRBƏT…

 

 

 

Sevdiklərin arasında
sevilə bilmədinsə,
və
sevə bilmədinsə
səni yalnız özlərinə
bənzədərək sevənləri...

 

 

 

demək doğulduğun yer də
sənə qürbətdir elə...
belədən elə...
elədən belə...

 

 

 

GƏLƏN DƏFƏ YAÇAMAQÇIN…

 

 

 

sol əlimin içində
ömür xətti
qırıq-qırıq,
haça-haça...

 

 

 

baş xəttinin sonundasa
ulduz yanır
tam
Saturn barmağının altındaca...

 

 

 

budur,
bu da ürək xətti-
iki yerə bölünmüş,
iki eşqin
biri Yerin,
biri isə Göyünmüş...

 

 

ah...
çeçələ barmağımı
büküncə də
bir dərin
və
iki zərif xətt görünür-
bir oğulun,
iki qızın işarəsi...

 

 

əl forması- fəlsəfi,
baş barmağım-
iradə və qürur rəmzi...

boşla görək zarafatı,
xürafatı,
Xiromant!..

 

 

mən
alnımda açılacaq
qırışları gözləyirəm-
o xətlərə
yeni tale yazacağam
gələn dəfə
yaşamaqçın...