Çoxmərtəbəli binadan özünü ataraq intihar etmək istəyən şəxslər aşağı endiriliblər
Bakıda “Təzə bazar” adlanan pərakəndə ticarət mərkəzinin yaxınlığındakı yeni tikilən binanın 7-ci mərtəbəsindən özünü ataraq, intihar edəcəyini bildirən 30-a yaxın Göyçay sakini aşağı endirilib.
APA-nın hadisə yerində olan əməkdaşının verdiyi məlumata görə, bu, hadisə yerinə gələn Fövqəladə Hallar Nazirliyinin və polis əməkdaşlarının səyi nəticəsində mümkün olub. Həmin şəxslərlə danışıqlar aparılıb, onların Nəsimi rayon Polis İdarəsinə aparılaraq, şikayətlərinin araşdırılacağı bildirilib.
Qeyd edək ki, etiraz edən şəxslər Göyçay rayonunda olan iş adamı Çingiz Mayılovun ailə üzvləri və yaxınlarıdır. Onlar Ç. Mayılovun həbsdən azad edilməsini və onlara qarşı polis təzyiqinə son qoyulmasını tələb edirlər.
Xatırladaq ki, həmin şəxslər bu gün saat 14.00 radələrində “Təzə bazar” adlanan pərakəndə ticarət mərkəzinin yaxınlığındakı yeni tikilən binanın 7-ci mərtəbəsinə çıxaraq, intihar edəcəklərini bildiriblər. Onların arasında azyaşlı uşaqlar və qadınlar da olub. Hadisə yerinə Fövqəladə Hallar Nazirliyinin əməkdaşları, xilasedicililər, nazirliyin mətbuat xidmətinin rəhbəri Tural Müseyibov, polis əməkdaşları gəliblər.
Bakı. Hafiz Heydərov - APA.
Əvvəlki məqalə: Çerkizov bazarı bağlanacaqmı? Şübhə edənlər çoxdur
Sonrakı məqalə: Bakıda kütləvi intihar cəhdi! Azərbaycan paytaxtında 30-a qədər şəxs çoxmərtəbəli binadan özünü atmaq istəyir
Geri izləmələr
Öz veb saytınızdan geri izləmək üçün aşağıdakı linkdən istifadə edin.
http://mirzexezerinsesi.net/articles/trackback/4328