Mirzə Xəzərin Səsi

Foto: APA

APA: “AST”-nin vitse-prezidenti Abbas Abbasov Telman İsmayılov və şirkət haqqında yayılmış məlumatlara münasibət bildirib

11 İyun 2009 16:28

“Telman İsmayılov sağ-salamatdır və işlərini adi qaydada davam etdirir. Onun qardaşının həbs olunması, eləcə də digər ailə üzvlərinə təzyiqlər edilməsi barədə məlumatlar uydurmadır və həqiqətə uyğun deyil”.

Bu sözləri APA-nın Moskva müxbirinə eksklüziv açıqlamasında Azərbaycan baş nazirin sabiq 1-ci müavini, İşgüzar Birlik Fondunun prezidenti, “AST” Şirkətlər Qrupunun vitse-prezidenti Abbas Abbasov Şirkətlər Qrupunun prezidenti Telman İsmayılova qarşı Rusiyada təzyiqlərin başlanması və qardaşının həbs olunması barədə yayılmış məlumatlara münasibət bildirərkən deyib. Bu cür məlumatların təxribat xarakterli olduğunu qeyd edən A. Abbasov kimlərinsə sensasiya xatirinə buna əl atdığını vurğulayıb: “Sensasiya axtaranlar, ilk növbədə, məlumatın dəqiqliyini yoxlamalı, məlumatı yalnız onun həqiqiliyinə əmin olduqdan sonra yaymalı, yaxud hansısa nəticələr çıxarmalıdırlar. Mən şayiələr əsasında yaranan və yanlış təxəyyülün nəticəsi olan bu cür əsassız məlumatları qətiyyətlə təkzib edirəm. Bir daha bildirirəm ki, Telman İsmayılov və ailə üzvləri hər hansı təzyiqə məruz qalmayıblar, adi qaydada işləri ilə məşğuldurlar”.

Qeyd edək ki, son vaxtlar “AST” Şirkətlər Qrupunun prezidenti Telman İsmayılova qarşı Rusiyada təzyiqlərə başlandığı, bu günlərdə isə qardaşının saxlandığı barədə məlumatlar yayılıb.

Moskva. R. Mətləboğlu - APA