Mirzə Xəzərin Səsi

Bu gün bir sıra ali təhsil məktəblərinin, o cümlədən, Azərbaycan Dövlət Neft Akademiyası (ADNA), Bakı Dövlət Universitetinin tələbələri etiraz aksiyası keçirməyə cəhd ediblər.

Lent.az-ın hadisə yerində olan əməkdaşının verdiyi məlumata görə, əllərində Azərbaycan bayrağı və qərənfillər tutan tələbələr ADNA-da baş verən terror hadisəsinə kütləvi etirazlarını bildirmək istəyiblər.

Onlar “28 may” metro stansiyasının qarşısındakı Cəfər Cabbarlının abidəsi önündən Azadlıq prospekti boyunca irəliləyiblər. Aksiya iştirakçıları “Terrora yox!” şüarı səsləndiriblər. Bir qədər irəlilədikdən sonra onların qarşısını polislər kəsib. Bu zaman tələbələrlə asayiş keşikçiləri arasında bir müddət mübahisə yaşanıb. Aksiyaçılar bir neçə dəfə “Terrora yox!” qışqırdıqdan sonra sakitləşiblər. Ardından onlar ADNA-nın pilləkənləri önünə qərənfillər düzərək, dağılışıblar. Bununla da aksiya başa çatıb.

Pərvin ABBASOV

LENT.

********************************************

“Hadisənin arxasında maraqlı qüvvələr ola bilər”

Millət vəkili Zahid Oruc belə hesab edir

Azərbaycan Dövlət Neft Akademiyasında (ADNA) aprelin 30-da törədilən silahlı terror basqını nəticəsində həlak olanları məktəbdə keçirilən anım mərasiminə millət vəkilləri də qatılıblar.

Lent.az-ın əməkdaşının məlumatına görə, hadisə yerinə gedən millət vəkili Zahid Oruc jurnalistlərə açıqlamasında hadisənin terror aktı olduğunu deyib: “Bu hadisənin arxasında maraqlı qüvvələrin olması mümkündür. Həmin qüvvələr qətlə yetirilən tələbələrlə yanaşı, hadisəni törədən şəxsi də öz qurbanına çevirib. Terrorun milləti yoxdur. Bu qanlı hadisənin təfərrüatları açıqlanacaq. Hesab edirəm ki, Neft Akademiyasının hədəf götürülməsi təsadüfi deyil".

LENT.AZ