Mirzə Xəzərin Səsi

Azərbaycan Milli Məclisinin İqtisadi siyasət daimi komissiyasının bu gün keçirilən iclasında Türkiyənin Ermənistanla sərhədləri açacağına dair yayılan məlumatlar müzakirə olunub.

APA-nın məlumatına görə, komissiya sədri Ziyad Səmədzadə və komissiya üzvləri Türkiyənin atmaq istədiyi bu addımın yanlış olduğunu vurğulayaraq, məsələnin Milli Məclis səviyyəsində müzakirə olunması, bununla bağlı parlamentin xüsusi bəyanatla çıxış etməsinin vacibliyini qeyd ediblər.

Millət vəkili Vahid Əhmədov deyib ki, Milli Məclis bu məsələyə rəsmi münasibət bildirməlidir: «AKP iqtidarının apardığı siyasət Azərbaycana arxadan zərbə vurur. Bununla Ermənistan daha da güclənəcək».

Millət vəkili Xanhüseyn Kazımlı da həmkarları ilə həmfikir olduğunu qeyd edib. Millət vəkilləri təklif ediblər ki, məsələ Milli Məclisin gündəliyinə salınsın və parlamentin bu məsələyə həsr olunmuş xüsusi iclası keçirilsin.

Bu arada Trend.News xəbər portalı Avropa Birliyinin adının çəkilməsini istəməyən bir yüksək vəzifəli rəsmisinə istinadən Türkiyə-Ermənistan sərhədinin aprel ayında açılacağına ümid bəsləndiyini qeyd edir. Trend-News bu xəbərin Türkiyənin "Sabah" qəzetində dərc edildiyini yazır.