Mirzə Xəzərin Səsi

Azərbaycan dövlətçiliyinə zidd olan və ölkə ziyalılarını təhqir edən İran İslam Respublikasının «Səhər» kanalına etiraz əlaməti olaraq VHP Gənclər Təşkilatı fevralın 17-də, saat 14:00-a İİR ölkəmizdəki səfirliyi qarşısında piket keçirmək qərarı vermiş və bu barədə qanunauyğun olaraq Bakı şəhər İcra Hakimiyyətinə xəbərdarlıq məktubunu göndərmişdi.

Bu gün Bakı şəhər İcra Hakimiyyəti ictimai təşkilatlar və siyasi partiyalarla iş şöbəsinin müdiri Zaur Ramazanovun imzası ilə xəbərdarlıq məktubuna cavab verilmişdir. Cavabda bildirilir:

«Bildiririk ki, məktubda qaldırdığınız məsələ ilə bağlı aksiya keçirmək deyil, mövqeyinizi sivil qaydada kütləvi informasiya vasitələri ilə bildirməniz daha faydalı olardı. Bu səbəbdən, planlaşdırdığınız piketin keçirilməsi məqsədəuyğun hesab edilmir».

Hər şeydən öncə, öz dəyərli tövsiyyəsini bizdən əsirgəməyən Zaur Ramazanova təşəkkürlərimizi bildirməklə, hörmətli şöbə müdirinin nəzərinə çatdırmaq istərdik ki, onun VHP Siyasi Şurasının üzvü olduğunu bilmirdik. Xatırladırıq ki, VHP Gənclər Təşkilatına tövsiyyə xarakterli müraciət etmək səlahiyyəti Nizamnaməyə əsasən yalnız VHP Siyasi Şurasına aiddir.

İkincisi, piket nə vaxtdan «antisivil qayda» hesab olunur ki, Zaur Ramazanov mövqeyimizi sivil qaydada bildirməmiz üçün mətbuatı məsləhət bilir.

Üçüncüsü, deyəsən, Azərbaycan dövlətçiliyinin təhqir edilməsi, milli təhlükəsizliklə bağlı məsələ Bakı şəhər İcra Hakimiyyətini qətiyyən qayğılandırmır. Belə olmasaydı, İİR-nın «Səhər» kanalında Azərbaycanın Cənub bölgəsinin «tarixi İran torpaqları» olmasıyla bağlı aparılan təbliğata, bir neçə rayonda bəslədikləri adamlar vasitəsilə kanala zəng etdirib «biz İranın tərkibinə qatılmaq istəyirik» kimi torpaq iddiasına və Azərbaycan vətəndaşlarının dövlətə qarşı çıxması yönündə aparılan təşviqata reaksiya verər, ölkə ziyalılarının, dövlət və ictimai xadimlərin təhqir olunmasına etiraz edilməsinə qarşı çıxmazdılar.

Dördüncüsü, «Səhər» kanalının az qala müdafiəçisi qismində çıxış edən Bakı şəhər İcra Hakimiyyəti heç onu da nəzərə almaq istəmir ki, bu kanalda Azərbaycan ziyalılarıyla yanaşı, ölkə prezidenti İlham Əliyev də təhqir olunur.

VHP Gənclər Təşkilatı olaraq bəyan edirik ki, Bakı şəhər İcra Hakimiyyətinin bu məktubu Konstitusiyaya və Azərbaycan Respublikasının qanunlarına ziddir. Biz Konstitusiyanı rəhbər tutaraq, Bakı şəhər İcra Hakimiyyətinə aksiya barədə xəbərdarlıq məktubu göndərmişik – meriyanın aksiyaya icazə verməmək hüququ yoxdur.