Mirzə Xəzərin Səsi

Məlahət Ağacanqızı

19 il əvvəl ağlıma da gəlməzdi ki, ”AZADLIQ” radiosu ilə 20 YANVAR faciəsini dünyaya yayan, əfsanəvi Mirzə Xəzər müəllimə məktub yazacağam. 19 il əvvəl baş verən FACİƏ ilə bağlı danışmaq istəyən milyonlardan biri də mən idim. Amma mənə elə gəlirdi ki, mən hamıdan kiçiyəm və hamıdan az baş verən FACİƏni dərk edirəm. Ümid BÖYÜKLƏRə idi. Mən böyüklərin BÖYÜKLÜK edəcəyinə möhkəm inanırdım. Necə ki, atam rəhmətə gedəndə, ancaq böyüklər BÖYÜK olmağı bacarmışdı. Onlar kiçikləri yas yerindən uzaqlaşdırsalar da,qadınların hönkürtüsünü, ağı səslərini eşidirdik. Evin KİŞİSİ-ŞAHI ölmüşdü. Anam üzünü cırmaqlayıb,saçlarını yolurdu. Çünki, o üzə və saçlara dəyər verən ölmüşdü. Düz bir il televizora baxmadıq. Düz bir il televizorun üstündən qara şalı götürmədik. Anam özü ilə bərabər televizorun da başına QARA YAYLIQ bağlamışdı. Bir il ərzində başı qara yaylıqlı televizora baxa-baxa ATA yoxluğunun faciəsini dərk etdik. Və “YETİM” sözünün ağırlığını çiyinlərimizdə hiss etdik. Anam bizi televizordakı əyləncələrdən uzaqlaşdırmaqla GÜCLÜ etdi. AİLƏ -Allah əcəli ilə rəhmətə gedən bir KİŞİyə görə bir il yas saxladı.

20 YANVARDA VƏTƏNİN sap-sağlam yüzlərlə övladı ŞƏHİD olmuşdu. Yüzlərlə günahsız Allah bəndəsinin canını almağa kimin haqqı var idi? Uşaq, böyük, qadın, kişi – qanla yazılan bir İMZAnın qurbanı oldu!

Niyə böyüklər BÖYÜK olmağı bacarmadı? Niyə kiçiklər FACİƏNİ dərk etməmiş televiziya kanalları əyləncə yarışmasına başladı, milli yasdan çıxdı? Təkcə Zeynəb xanım Xanlarova bir il yas saxladı. Səhnəyə çıxmadı, televizorda görünmədi.
Millət YETİM olduğunu dərk etməmiş ÖGEY ATAlar VƏTƏN üçün elçiliyə başladılar. Azadlıq yolunda ŞƏHİD olan övladlar üçün heç olmasa bir il yas saxlanılsaydı , VƏTƏNİN sinəsində QARABAĞ yarası açılmazdı, XOCALI soyqırımı baş verməzdi. Təqvimlə YAS saxlayanların təqvimində qara tarixlər çox olar.

20 YANVAR faciəsindən 19 il keçir. Amma hələ də həqiqətlər bizə qırıq-qırıq deyilir. Bəlkə, QIRIQ-QIRIQ bir ömür yaşamağımız da o səbəbdəndir. Başqalarının bədbəxtlikləri üstündə qurulan taxt-taclı ömür qırıq-qırıq olar.

19 il əvvəl yazdığım gündəliyi vərəqləyirəm:” /17 .01. 90 /...XI Qızıl Ordu meydanında bir tank dayandı. Adamlar tanka tərəf qaçdılar. Tankın sanki gözləri var idi. Ona tərəf qaçan adamları görüb durduğu yerdə qəzəblə fırlanmağa başladı. Adamlar “vaayy” deyib geri çəkildilər. Kimsə dedi “Yəqin tankçı sərxoşdur,qorxmayın!” İçimizə, üzümüzə dolan qorxu yox oldu...”. İki gün sonra həmin murdar SƏS sahibləri yenidən iyrənc səsləri ilə deyəcəkdilər: ”Qorxmayın, yəqin tankçı sərxoşdur!” Hələ qanlı hadisələrə iki gün qalmış dəmir tanklar Bakının ortasında qəzəblə insanların kölgəsini tapdalayırdısa, bir-iki gün sonra insanların bədənini tapdalayacağını BÖYÜKLƏR başa düşüb təhlükəsizlik tədbirləri görməli idilər. 19 il əvvəlki BAKI dəyişdiyi kimi, 19 -il əvvəlki insanlar da dəyişib. Divarlardakı güllə izlərinin üstünü rəngləyənlər AZƏRBAYCAN TARİXİNİN üstünü rənglədilər. Rənglənmiş TARİXdən qan iyi gələr.

20 YANVAR faciəsində ölənlərin sayını hələ də dəqiq demirlər. O vaxtlar yaralıların da sayı-hesabını bilən yox idi. “Gənclik” jurnalının əməkdaşları ilə “Respublika” xəstəxanasında yerləşdirilən xəstələrin yanına getmişdik. Bir neçə palatada olduq. Bütün palatalarda olan gənclər bir-birinə bənzəyirdi. Çinar boylu, enlikürək, mehriban çöhrəli gənclərə, ancaq nakişilər güllə ata bilərdi. Sanki nağıllarda təsvir olunan igidlərə DİVlər hücum etmişdi. Kişilikdən soraq verən üz cizgilərini indiki gənclərin üzündə az-az görmək olar...

20 YANVAR haqqında nə qədər yazsaq da azdır!
20 YANVARda ŞƏHİD olanlar üçün nə qədər ağlasaq da azdır!
Biz ŞƏHİDLƏRin qisasını ala bilmədik!
Biz ŞƏHİDLƏRİN ruhunu sevindirə bilmədik!

Cənnətdə olan ŞƏHİDLƏRİN ruhu cənnət Qarabağ üçün ağlayır.
Görəsən, AZƏRBAYCAN millətinin özünü dərk etməsi üçün daha hansı qurbanlar verilməlidir?
Bu millətin yolunda Nəsiminin dərisini soyublar.
Babəki hissə-hissə doğrayıblar.
Yüzlərlə dahi, qeyrətli ziyalını güllələyiblər.
Əliyalın insanların üstündən tankla keçiblər.
Cənnət Qarabağ düşmən tapdağı altındadır...
Daha hansı itkiləri verəndən sonra millət ayılacaq?