Mirzə Xəzərin Səsi

I yazı

Qadın alverçilərinin tutulması ilə bağlı tez-tez soraqlar yayılır. Bu günlərdə yenə belə informasiya yayıldı: “Daxili Işlər Nazirliyinin Insan Alverinə Qarşı Mübarizə Idarəsi əməkdaşlarının keçirdikləri əməliyyat tədbirləri nəticəsində insan alveri ilə məşğul olmaqda təqsirləndirilən dörd nəfər həbs edilib”. Bu indi hamının eşitməyə öyrəşdiyi statik statistikadır. Informasiyada göstərildiyinə görə, tutulan dörd adamdan biri bizim Sabirabaddandır. “Gəlir əldə etmək məqsədilə bir qrup şəxslə cinayət əlaqəsinə girərək qadınları Dubay Əmirliyinə aparıb cinsi istismara məruz qoyması faktları ilə əlaqədar”... Illər dəyişir, sosial-siyasi formasiyalar dəyişir, bunlarla birlikdə dilimiz dəyişir, yeniləşir, ancaq Azərbaycan hüquq sisteminin dili dəyişməz qalır. Bu, əski düşüncənin, ona uyğun əski davranış stereotiplərinin dəyişməz qalmasının parlaq görsənişlərindəndir. Azərbaycan milisi nə idisə, Azərbaycan polisi də odur: hər cür qanunçuluqdan uzaq, ayrıca qanunsuzluq elementi! Iş, başqa ağır cinayələr kimi, məhkəmə araşdırması üçün “Ağır Cinayətlərə Dair Işlər üzrə Məhkəmə”yə göndəriləcək. Nəyə görə bu məhkəmənin adını dırnaqda yazıram? Addakı böyük yanlışlığa görə. Görünür, ölkə ağır cinayətlərlə dolu olduğundan hansı qəzetə baxırsan, ən çox bu məhkəmənin adını görürsən. Bu adı hamı görür: Prezident Aparatından “Milli Elmlər” Akademiyasına, onun Nəsimi adına Dilçilik Institutunadək. Kimsə qımıldanmır. Çoxları biliksizlikdən, oturduqları yerə dəymədiklərindən. Kimlərsə də “nəyimə gərək” prinsipsizliyindən. “Dair” ərəb sözüdür, bizim dildə üzrə anlamındadır. Bu iki sözün ad olaraq bir arada işlənməyi dövlət statusunda anormallıq, gülünc günə qalmış dövlətçilik görsənişidir! Belə olmalıdır: Ağır Cinayət Işləri üzrə Məhkəmə. “Milli Elmlər”i dırnaqda yazmağın da öz nədəni var. Qabaqlar yazmışam, bir də yazıram: milli elm olmur, ola bilməz. Gerçək elm daşıyıcıları olaraq özünüzü doğrulda bilməsəniz də, adınızı doğru göstərə bilin, yoldaş akademiya... bilikçiləri! Sabirabadlı qadın alverçisini tanımasam da, Sabirabadı tanıyıram - rayonumuz kimi. 70-80-ci illərdə Sabirabad respublikanın ən böyük pambıqçılıq rayonlarından idi. Sabirabad özünün böyük əməkçi bazası ilə birlikdə amansız milis sistemi ilə tanınırdı. Hər cür qanunsuzluq, xırda bir iş üstündə adamları döyə-döyə öldürmək - Sabirabad milisi belə idi. Günlərin bir günü bütün ölkədə olduğu kimi Sabirabadda da milis özünün bütün kompleksi (başlıcası, qanunsuzluq kompleksi) ilə birlikdə polisə çevrildi. Seçki önü Sabirabadın polis rəisi ilə üz-üzə gələsi olmuşduq. Rəis məni bir xeyli öyəndən sonra başlıca deyəcəyini dedi: “Görün siz kimlərə qoşulmusuz - Sabirabad cəbhəçilərinə! Onların çoxu narkomandır”. “Doğrudan?”- ayrıca maraqla soruşdum. Rəis sevincək dilləndi: “Vicdanım haqqı!” “Elədirsə, onları indiyədək niyə cəzalandırmamısız?” Çiyinlərini dik tutmuş yekəpər rəisin birdən-birə çiyinləri salxdı, özüsə yerinə düşən balaca bir sorunun qarşısında balacalaşdı, başladı baş-ayaq vurmağa. Hakimiyyətin qanunsuzluq yoluyla yolsuzluğa yönəltdiyi Sabirabad Qarabağ savaşında ən çox şəhid verən rayonlarımızdan oldu. Xalq Hərəkatında da Sabirabad öncül olub. Bunları gərəyincə dəyərləndirəcək MILLI HÖKUMƏT olmalıdır. Ortada belə bir hökumət yoxdur. Ortada “Regionların sosial-iqtisadi inkişaf proqramı” adına yalançı bir propaqanda var. Ölkənin başqa rayonları kimi Sabirabada da hansısa yalançı proqram deyil, güzəştli kredit yolu ilə aqrar sektora dövlətin yardımı gərəkdir. Ölkəni bürümüş pozğunluğun, qadın alveri kimi Azərbaycan üçün tipik olmayan neqativ görsənişlərin kökündə hakimiyyətin KORRUPSIONER xarakteri, total korrupsiyanın doğurduğu sosial problemlər dayanır!

("Azadlıq" qəzeti)

Həsən Hüseyn oğlu Quliyev 1941-ci il avqustun 1-də Tovuz rayonunda anadan olub.1958-ci ldə İsmayıllı rayon İvanovka kənd orta məktəbini, 1964-cü ildə indiki Bakı Dövlət Universitetinin fizika fakültəsini bitirib. 1967-70-ci illərdə Moskvada SSRİ Elmlər Akademiyası Fəlsəfə İnstitutunun aspiranturasında təhsil alıb.1971-ci ildə Moskvada namizədlik dissertasiyası müdafiə edib.Bundan sonra o, Azərbaycan Elmlər Akademiyasının Fəlsəfə və Hüquq İnstitutunda aparıcı elmi mütəxəssis, şöbə müdiri vəzifələrində çalışıb, müəyyən müddət ərzində institutun direktoru səlahiyyətlərini yerinə yetirib.1987-ci ildə fəlsəfə üzrə doktorluq dissertasiyası müdafiə edib. Fəlsəfi dərketmənin problemləri, etnopsixologiya və Azərbaycan xalqının mentaliteti üzrə 10-a qədər monoqrafiyanın, elmin müxtəlif sahələrinə dair yüzlərlə məqalənin müəllifidir.1992-93-cü illərdə Prezident Aparatında analitik xidmətin rəhbəri olub.Son 15 ildə professor Həsən Quliyev «Turan» İnformasiya Agentliyinin analitik xidmətinə rəhbərlik edib, eyni zamanda fəal müəllimlik və ictimai-siyasi fəaliyyətlə məşğul olub.2008-ci il fevralın 24-də dünyasını dəyişib.

Allah rəhmət eləsin!

"Mirzə Xəzərin Səsi" qəzeti

P.S. Həsən Quliyevin həyat yolu barədə məlumat "Media Forum" saytından götürülüb

2008-02-28 – 13:04:00

Fevralın 27-də aylardan bəri Tehranın Evin həbsxanasında saxlanan üç məşhur Güney Azərbaycan milli fəalı – Səid Mətinpur, Cəlil Qənilu, Əlirza Mətinpur ağır mülk girovu müqabilində azadlığa buraxılıb. «Media forum» saytı güney mənbələrinə istinadla xəbər verir ki, S.Mətinpur 500 milyon tümən (1000 tümən – 1 dollar), C.Qənilu 80 milyon tümən, Ə.Mətinpur 100 milyon tümən həcmində mülk girovu qoyublar.

Məlumatda bildirilir ki, məhbusları qarşılamağa gələn milli fəalların coşğusuna yol verməmək üçün onları əsas qapıdan yox, gizli bir qapıdan çıxararaq şəhər küçələrinin birində maşından düşürüblər.

Ötən ilin iyun və avqust aylarında ETTELAAT-ın Zəncanda həbs etdiyi milli fəalların heç birinə indiyədək vəkilləri ilə görüş icazəsi verilməmişdi.

«Media forum»