Mirzə Xəzərin Səsi

QARABAĞ AZADLIQ TƏŞKİLATI İSRAİL SƏFİRLİYİNİ HƏDƏLƏDİ 2008-05-01 – 16:56:00

Qarabağ Azadlıq Təşkilatı ilə İsrailin Azərbaycandakı səfirliyi arasında narazılıq böyüyür. «Media forum» xatırladır ki, dünən QAT sədri Akif Nağı xarici işlər nazirinə məktubla müraciət edib. Müraciətdə deyilir ki, İsrail səfirliyinin təşəbbüsü ilə may ayının 8-də, Şuşanın işğal günündə Bakıda «Azərbaycan-İsrail dostluq parkı»nın açılış mərasiminin keçirilməsi şəhidlərimizin ruhuna təhqir, Azərbaycan xalqına qarşı hörmətsizlikdir. QAT sədri qeyd edib ki, İsrailin Azərbaycandakı səfirliyi tədbirin keçirilməsi tarixinin Xarici İşlər Nazirliyi ilə razılaşdırıldığını bildirir. O, naziri bu məsələ ilə bağlı təcili araşdırma apararaq «rüsvayçı hadisənin baş verməməsi üçün ciddi tədbirlər görməyə» çağırıb.

İsrailin Azərbaycandakı səfiri Artur Lenk həmin gün açıqlama yayaraq mayın 8-də – Şuşanın işğalının ildönümü günü Bakıda «Azərbaycan-İsrail dostluq parkı»nın açılış mərasiminin keçirilməsi məsələsinə aydınlıq gətirib.

«Mayın 8-i İsrailin müstəqillik günüdür, buna görə dostluq parkının açılışının həmin günə təyin olunması məqsədəuyğun hesab edilib. Həmçinin mayın 8-də Azərbaycanda rəsmi səviyyədə matəm günü deyil» deyə səfir «Trend Nyus»a açıqlamasında bildirib.

İsrail səfiri bildirib ki, tədbirin tarixi Azərbaycan Xarici İşlər Nazirliyi ilə razılaşdırılıb, çünki mayın 8-i rəsmən iş günüdür və matəm günü sayılmır. Həmçinin İsrail səfirliyi Azərbaycan ictimaiyyətinin narazılığını da başa düşür və şəhidlərimizin xatirəsinə ehtiram əlaməti olaraq parkın açılış mərasimində şəhidlərin yad edilməsi də nəzərdə tutulur: «Səfirlik Qarabağ Azadlıq Təşkilatına təklif edib ki, Şuşada, Qarabağ uğrunda döyüşlərdə həlak olmuş şəhidlərin xatirəsinə həmin parkda ağac əkilsin. Lakin QAT bu təklifimizi qəbul etməyib» deyə diplomat vurğulayıb.

Bu gün QAT Artur Lenkin açıqlamasına bəyanatla cavab verib. Bəyanatda deyilir ki, A.Lenkin «dostluq xiyabanı»nın məhz mayın 8-də açılacağı ilə bağlı son açıqlaması qəzəb və nifrət hissi doğurur: «Səfir Azərbaycan xalqının mövqeyi və heysiyyatı ilə heç bir halda hesablaşmaq istəmədiyini açıq şəkildə bildirir. Onun açıqlamasından aydın olur ki, həmin gün Azərbaycan xalqının hüzn və kədər içərisində olacağının ona heç bir təsiri yoxdur, o, çox asanlıqla xalqın hissləri ilə oynaya bilər və heç nə olmamış kimi öz ölkəsinin bayram günündə şənliklər təşkil edə, xiyaban aça, milli düşüncəsi olmayan bəzi məmurları da həmin mərasimlərə dəvət edə bilər».

QAT bir daha bildirir ki, Şuşanın işğal günündə hər hansı bayram mərasiminin keçirilməsinə imkan verməyəcək: «İsrail səfiri özlərinin bayramını həmin gün qeyd etməkdə israrlıdırsa, biz də həmin tədbirin baş tutmaması üçün bütün vasitələrdən istifadə edəcəyimizi bildiririk».

«Media forum»