Mirzə Xəzərin Səsi

2008-04-18 - 15:42:00

Parisdə aprelin 17-də başlayan demokratik medianın inkişafı üzrə Avrasiya regional forumu davam edir. Yüzdən çox jurnalist, ekspert və beynəlxalq təşkilat nümayəndəsinin qatıldığı tədbirdə ATƏT-in mətbuat azadlığı üzrə xüsusi nümayəndəsi Mikloş Haraşti «Avrasiya regionunda mediaya qarşı gözlənilən təhlükələr» mövzusunda məruzə ilə çıxış edib.

Avrasiya məkanında KİV sahəsində vəziyyəti qeyri-kafi adlandıran M.Haraşti deyib ki, bir çox postsovet ölkələrində jurnalistlərin təqibi dəbə çevrilib: «İlk baxışdan zorakılıq kortəbii görünür, amma əslində bu zorakılığın kökləri hökumətlərin jurnalistlərə qarşı münasibətinə gedib çıxır. Xalq düşmənlərinin və xoşagəlməz ünsürlərin damğaları sonunculara vurulur. Biz hesab edirik ki, jurnalistlərə qarşı bu və digər hərəkətlər ayrı-seçkilik xarakteri daşıyır».

Xüsusi nümayəndə bildirib ki, yeni demokratiyalarda plüralizmi müdafiə edən orqan yoxdur və informasiya mənbələrinə təhdidlər, jurnalistlərin guya professional fəaliyyətləri ilə əlaqədar olmayan həbsi kimi səciyyəvi təhlükələr var. M.Haraşti nümunə kimi Azərbaycanı göstərib: «Burada hakimiyyət sovet üsullarından istifadə edərək arzuolunmaz jurnalistləri narkotik maddə saxlanması, terrorla hədələmə və xuliqanlıq kimi uydurma ittihamlarla həbs edir».

Sabah başa çatacaq forumda Azərbaycanı «Media forum» saytının baş redaktoru Azər Qaraçənli, «İnternyus Azərbaycan» İctimai Birliyinin rəhbəri İlham Səfər, «Zerkalo» qəzetinin baş redaktoru Elçin Şıxlı, «Turan» İnformasiya Agentliyinin direktoru Mehman Əliyev, Media Hüquqları İnstitutunun başçısı Rəşid Hacılı, «Yeni Nəsil» Jurnalistlər Birliyinin sədri Arif Əliyev və başqaları təmsil edir.

«Turan»