DÜNYA AZƏRBAYCAN AYDINLARI BİRLİYİ MAHİR CAVADOVUN QURUMA ÜZVLÜYÜNƏ YOX DEYİB
2008-04-09 - 19:58:00
Xaricdə yaşayan azərbaycanlı ziyalıların yaratdığı Dünya Azərbaycan Aydınları Birliyi (DAAB) Təşəbbüs Qrupundan «Media forum» saytına bildiriblər ki, Xətai rayonunun keçmiş prokuroru, Avstriyada mühacirətdə olan Mahir Cavadovun bu quruma üzvlüyü səs çoxluğu qazanmayıb. Belə bir səsvermə M.Cavadovun DAAB Təşəbbüs Qrupuna müraciəti mübahisə doğurduğundan keçirilib.
32 nəfər üzvü olan DAAB Təşəbbüs Qrupunun sədri İsveçrədə yaşayan keçmiş sovet diplomatı Valeh İbrahimovdur. İsa Sadıqov (Norveç), Fəxrəddin Hacıbəyli, Orxan Aras (hər ikisi Almaniya), Elman Mustafazadə (Hollandiya) kimi tanınmış mühacirlər DAAB-ın qurucuları arasında yer alıb.
Mahir Cavadov Azərbaycanı 1995-ci ilin martında Xüsusi Təyinatlı Polis Dəstəsinin qiyamı yatırılandan sonra tərk edib. Həmin hadisələrdə onlarla adam, o cümlədən M.Cavadovun qardaşı, daxili işlər nazirinin sabiq müavini Rövşən Cavadov həlak olub, yüzlərlə XTPD üzvü həbs edilib. Azərbaycanın hüquq-mühafizə orqanları M.Cavadovu mart hadisələrinin təşkilatçılığında ittiham edir və o axtarışdadır.
«Media forum»
Sonrakı məqalə: Azərbaycanın sabiq xarici işlər naziri Tofiq Qasımovun 70 yaşı tamam oldu
Geri izləmələr
Öz veb saytınızdan geri izləmək üçün aşağıdakı linkdən istifadə edin.
http://mirzexezerinsesi.net/articles/trackback/3294