Mirzə Xəzərin Səsi

2007-09-07 – 17:33:00

«Sənət» qəzetinin baş redaktoru Samir Sədaqətoğlu və yazıçı Rafiq Tağının işə ilə bağlı Ali Məhkəməyə kassasiya şikayəti təqdim edilib. Bu barədə «Media forum» saytına vəkil İsaxan Aşurov məlumat verib.

Vəkilin sözlərinə görə, hələ ki, məhkəməyə baxış günü təyin olunmayıb.

İyunun 7-də Apellyasiya Məhkəməsi Səbail Rayon Məhkəməsinin S.Sədaqətoğlu və R.Tağı barəsində çıxardığı hökmü qüvvədə saxlamışdı.

R.Tağının qardaşı Alim Tağıyev «Media forum» saytının əməkdaşı ilə söhbətində bildirib ki, 16 saylı təcridxanaya köçürüləndən bəri ailəsi bir dəfə R.Tağı ilə görüşüb: «O özünü normal hiss etdiyini, heç bir şeydən şikayət etmədiyini bildirdi. Onunla görüş üçün heç bir problem yoxdur. Bu həftə də onunla görüşmək niyyətindəyik».

S.Sədaqətoğlu və R.Tağının həbsinə «Sənət» qəzetinin 1 noyabr 2006-cı il tarixli sayında getmiş, R.Tağının yazıdığı «Avropa və biz» məqaləsi səbəb olub. Səbail məhkəməsi bu il mayın 4-də Cinayət Məcəlləsinin 283.2.2 (milli, dini və irqi ayrı-seçkilik) maddəsinə əsasən S.Sədaqətoğlunu 4 il, R.Tağını isə 283.1 ( milli, dini və irqi ayrı-seçkilik yaymaqda) maddəsinə əsasən 3 il azadlıqdan məhrum edib.

«Media forum»

2007-09-07 – 16:02:00

«Azərbaycan hakimiyyəti bir sıra siyasi ittihamlarla həbs edilən «Realnı Azerbaydjan» və «Gündəlik Azərbaycan» qəzetlərinin baş redaktoru Eynulla Fətullayevin təqibinə son qoymalıdır». «Turan» xəbər verir ki, Milli Təhlükəsizlik Nazirliyinin təcridxanasında saxlanan E.Fətullayevə qarşı vergidən yayınmaya dair yeni ittihamın irəli sürülməsinə Beynəlxalq Jurnalistləri Müdafiə Komitəsinin reaksiyası belə olub.

Təşkilatın bəyanatında deyilir ki, vergidən yayınma ittihamı il ərzində MTN-in baş redaktora qarşı irəli sürdüyü üçüncü ittihamdır: «İyulda o, terrorizmdə ittiham olunmuşdu, buna qədər onu milli və dini ədavətin qızışdırılmasında, bundan da əvvəl azərbaycanlılara qarşı böhtanda ittiham etmişdilər».

Komitənin icraçı direktoru Coel Saymon bildirib ki, Azərbaycan hakimiyyəti E.Fətullayevə qarşı siyasi əsaslandırılmış ittihamlar irəli sürmək istəyir: «Bu dəhşətli təqibə son qoyulmalıdır. Hakimiyyət onu dərhal azad etməlidir. Biz hakimiyyəti həmçinin həbsxanada səhhətləri pisləşmiş jurnalistlər Sakit Zahidovu və Fərəməz Allahverdiyevi də dərhal azad etməyə çağırırıq».

(“Media Forum”)

2007-09-05 – 17:25:00

Güney Azərbaycan Tələbə Hərəkatı Əhər məhkəməsinin Qaradağ bölgəsindən olan 25 azərbaycanlı fəala hökm oxunduğu haqda məlumat yayıb. Fəallar 2006-cı ilin may-iyun etiraz aksiyalarında iştirakda, asayişi pozmaqda, dövlət əmlakına ziyan vurmaqda günahlandırılaraq həbs və şərti şallaq zərbəsinə məhkum ediliblər.

Güney mənbələrindən «Media forum»a verilən məlumata görə, Əhər məhkəməsi milli fəallardan 4-nü (Əfşin Bəzzaz Qədim, Kərim Kargər, Murtuza Şükri Sərqini, Əvəz Həsənpur) 6 ay həbsə və 70 şərti şallaq zərbəsinə, 1-ni isə (Fərhad Heydəri) iki il yarım həbsə və 70 şərti şallağa məhkum edib.

Məlumatda həmçinin bildirilir ki, barələrində hökm oxunan digər 20 milli fəalın hər biri ayrı-ayrılıqda 6 ay həbs və 50 şərti şallaq cəzası alıblar.

«Media forum» onların siyahısını təqdim edir:Ənuşirəvan Təhmasibi, Ramin Elğəmi, Ramin Bəxşi, Hüseyn Səfərniya, Fərid (Vəhid) Bərzigər, Mehrdad Heydərpur, Məhəmməd Cəfəri, Mehdi Süleymani, Əbülfəzl Əsədzadə, Pərviz Baqiri, Calal İsfəndiyari, Rza Salmanzadə, Nar Axşi, Əbülfəzl Dost Məhəmmədi, Rza Süleymani, Pərviz Qane, İbrahim Zülfi, Ümid Seyfi, Muctaba Camlu, Əmir Məhəmmədi.

Məlumatda o da vurğulanır ki, cəza alan milli fəalların bəziləri ötən il də müxtəlif bəhanələrlə həbs edilərək bir müddət zindanlarda saxlanıb və cürbəcür işgəncələrə məruz qalıblar.

«Media forum»