Mirzə Xəzərin Səsi

"Media Hüququ İnstitutu"nun "Mirzə Xəzərin Səsi" internet qəzetinə göndərdiyi Press Relizə əsasən, Səbail və Yasamal rayon məhkəmələri işgəncəyə, qeyri insani və ya ləyaqəti alçaldan rəftara və ya cəzaya məruz qalmamaq hüquqlarının pozulduğunu iddia edən məhbus-jurnalistlər Yaşar Ağazadə və Rövşən Kəbirlinin şikayətinə baxmaqdan imtina edib.

“Müxalifət” qəzetinin baş və şöbə redaktoru Ədliyyə Nazirliyinin Penitensiar Xidmətinin 1 saylı istintaq təcridxanasının 85 saylı kamerasında saxlanılır. Azərbaycan prezidentinin əmisi, millət vəkili Cəlal Əliyevin şikayəti əsasında 2 il 6 ay müddətinə ən ağır cəzaya məhkum edilən məhbus-jurnalistlər iyul ayında Yasamal Məhkəməsinə göndərdikləri şikayətlərində qeyd ediblər ki, ümumi ərazisi 40 kv-metrə yaxın olan kameraya yerləşdiriliblər. Kamerada havanın dəyişməsi üçün heç bir avadanlıq quraşdırılmayıb, orda 24 çarpayı olsa, məhbusların sayı 30-a çatır, məhkumlar növbə ilə yatmağa məcbur olurlar. Havaların isti keçməsi, birmərtəbəli kameranın üstünün qırla örtülməsi, məhkumların sayının çoxluğu, onların əksəriyyətinin siqaret çəkməsi kameradakı atmosferi dözülməz edir. Tualet (unitaz) və yemək stolu normativlərə uyğun olmayan kamerada yaxınlıqda yerləşdirilib. Bundan əlavə jurnalistlərin vəkillərlə təklikdə və konfidensial görüşünə imkan verilmir.

Yasamal rayon Məhkəməsi Ədliyyə Nazirliyinə qarşı şikayət ərizəsini qərardadla geri qaytarıb. Məhkəmə istintaq təcridxanası müstəqil qurum olmasa da belə bir qənaətə gəlib ki, jurnalistlər Ədliyyə Nazirliyindən yox, təcridxana rəhbərliyinin hərəkətsizliyindən şikayət etməli idilər. Məhkəmə həmçinin arqument gətirmədən jurnalistlərin onlara vurulmuş mənəvi zərərlə bağlı mülki iddia qaldırmaq hüquqlarının olmadığıni deyib.
Qanunvericiliyə görə, məhkəmə cinayət prosesi iştirakçısının şikayətinə təxirə salmadan, şikayətin daxil olduğu 3 gün ərzində baxmalı, qərar çıxarmalıdır. Yasamal Məhkəməsi şikayətə uzun müddət ötdükdən sonra baxmaqla, qərar yox, qərardad çıxarmaqla ciddi prosessual pozuntulara yol verib.

Jurnalistlərin hüquqlarını Media Hüququ İnstitutunun vəkilləri müdafiə edir. Yasamal Məhkəməsinin qərardadından şikayət verilib. Eyni zamanda insan ləyaqətini alçaldan rəftara məruz qalmamaq hüququnun pozuntusu ilə bağlı Ədliyyə Nazirliyinin Penitensiar Xidmətinin 1 Saylı İstintaq Təcridxanasına qarşı Səbail rayon Məhkəməsində iddia qaldırılıb. Jurnalistlər məhkəmədən saxlanma şəraitinin, habelə vəkillə konfidensial görüşlərinin təmin edilməməsinin qanunsuz hesab edilməsini, şikayətçilərin həbsdən azad edilməsini və hərəkətlərindən şikayət edilən orqandan – Ədliyyə Nazirliyinin 1 Saylı Istintaq Təcridxanasından vurulmuş mənəvi zərərə görə 100.000 manat alınaraq şikayətçilərə ödənilməsini nəzərdə tutan qərar çıxarmağı xahiş ediblər. Şikayət geri qaytarılsa da jurnalistlərin müdafiəçiləri yenidən məhkəməyə müraciət ediblər. Jurnaslistlərin şikayətinə baxılacağı tarix hələ dəqiqləşməyib.

BİZİMLƏ ƏLAQƏ:
Media Hüququ İnstitutu
Xalid Ağaliyev
Tel: ofis (+9912) 596 06 23; 596 14 96
mob 050 372 71 16
E mail: xaled_yes@yahoo.com
Web-site: www.mediarights.az

NOVRUZƏLİ MƏMMƏDOVA AİLƏSİ İLƏ GÖRÜŞ VERİLƏ BİLƏR. MTN-də MƏHBUSUN MÜDAFİƏ KOMİTƏSİNİN SƏDRİNƏ İRAD TUTUBLAR
2007-08-27 - 13:35:00

Hazırda Milli Təhlükəsizlik Nazirliyinin təcridxanasında saxlanan «Tolişi sədo» qəzetinin baş redaktoru, Milli Elmlər Akademiyasının Dilçilik İnstitutunun bölmə müdiri Novruzəli Məmmədovun Hüquqlarını Müdafiə Komitəsinin sədri Hilal Məmmədov avqustun 24-də şahid qismində dindirilib. Bu barədə «Media forum» saytına məlumat verən H.Məmmədovun sözlərinə görə, dindirmə onun özü və rəhbərlik etdiyi müdafiə komitəsinin fəaliyyəti ilə bir növ tanışlıq məqsədi daşıyıb.

H.Məmmədov MTN-də ona bəzi iradlar tutulduğunu bildirir: «İrad tutuldu ki, Novruzəli Məmmədovun işiylə bağlı KİV-ə təqdim etdiyimiz və beynəlxalq ictimaiyyət arasında yaydığımız bir sira məlumat, müraciət və bəyanatlarda şişirtmələrə, emosiyalara, kifayət qədər əsaslandırılmamış məlumatların yayılmasına yer verirəm. Müstəntiqin fikrincə, bu, istintaq prosesinin real nəticələrinə uyğun gəlmir».

Müdafiə komitəsinin sədri müstəntiqlərə istintaq işinə müdaxilə etmək niyyətlərinin olmadığını deyib: «Bildirdim ki, hüquqlarını müdafiə etdiyimiz şəxsin polisə müqavimət adı ilə 15 sutkalıq ilk həbsi kimi xoşagəlməz macərasından tutmuş saxlanma vaxtının uzadılmasıyla bağlı məhkəmə proseslərinə qədər hüquq pozuntularına qarşı çıxmışıq, öz mülahizələrimizi söyləmişik».

H.Məmmədovun sözlərinə görə, sorğu-suala və müvafiq protokulun tərtibinə təxminən 4 saat vaxt sərf olunub: «Müstəntiqdən ayrılarkən yarı ciddi-yarı zarafat bildirdim ki, təcridxanada saxlanması uçün heç bir ciddi əsas olmadığından yaxın günlərdə Novruzəli müəllimin azad edilməsi barədə müvafiq qərar verəcəksiniz və bununla da ölkəmizin imicinə zərbə vuran bir məsələdən xilas ola biləcəyik».

Müdafiə komitəsi sədrinin bildirdiyinə görə, müstəntiq N.Məmmədovla ailəsinin görüşünə şərait yaradıla biləcəyini də vurğulayıb: «Məhkəmədə bizim iştirakımıza isə imkan verilməyəcəyi bildirildi».

Xatırladaq ki, Novruzəli Məmmədov və «Tolışi sədo» qəzetinin məsul katibi Elman Quliyev barəsində bu il fevralın ikinci ongünlüyündə həbs-qətimkan tədbiri seçilib. Sonradan iki dəfə - may və avuqust aylarında hər iki şəxs barəsində istintaq müddəti üç ay uzadılıb.

Rəsmən bəyan olunmamış məlumatlara görə, MTN-in təcridxanasında saxlanılan hər iki şəxsə qarşı Cinayət Məcəlləsinin 274-cü (dövlətə xəyanət) maddəsi ilə ittiham irəli sürülüb.

«Media forum»

FƏRƏMƏZ NOVRUZOĞLUNUN MÜALİCƏ MÜƏSSİSƏSİNƏ KÖÇÜRÜLÜB-KÖÇÜRÜLMƏYƏCƏYİ BİLİNMİR
2007-08-24 - 18:24:00

Hazırda 14 saylı cəzaçəkmə muəssisəsində saxlanılan «Nota-Bene» qəzetinin əməkdaşı Fərəməz Novruzoğlu avqustun 25-də yenidən əməliyyat olunmaq üçün Ədliyyə Nazirliyinin Baş Tibb İdarəsinin Müalicə Müəssisəsinə köçürülməlidir. F.Novruzoğlunun həyat yoldaşı Tahirə Abdullayeva avqustun 24-də «Media forum»a açıqlamasında deyib ki, bu məsəlnin həlli Ədliyyə Nazirliyinin Penitensiar Xidmətindən asılıdır.

Penitensiar Xidmətin ictimaiyyətlə əlaqələr şöbəsinin rəisi Mehman Sadıqov isə «Media forum»a F.Novruzoğlunun müalicə müəssisəsinə köçürülüb-köçürülməyəcəyi haqda hər hansı məlumatı olmadığını bildirib: «Əgər əməliyyat olunması vacibdirsə, köçürülmə mütləq olacaq. Amma onun müalicə müəssisəsinə sabah köçürülməsinə nə qədər ehtiyac olduğu barədə məndə məlumat yoxdur».

M.Sadıqov «Nota-Bene» əməkdaşının müalicə müəssisəsinə köçürülüb-köçürülməməsi barədə yalnız sabah dəqiq məlumat verə biləcəyini söyləyib.

F.Novruzoğlu bu ilin yanvarında 2 il 6 ay muddətinə azadlıqdan məhrum edilib. Ona qarşı daxili işlər naziri Ramil Usubov və Xaricdə Yaşayan Azərbaycanlılarla İş uzrə Dovlət Komitəsinin sədri Nazim İbarahimov şərəf və ləyaqətin təhqir olunması ilə bağlı məhkəmə iddiası qaldıriblar.

Həyat yoldaşının bildirdiyinə görə, F.Novruzoğlu hələ həbs edilməzdən iki ay əvvəl bağırsağındankı problemlə bağlı əməliyyat olunub. Həbsxanada onun səhhətində yenidən problemlər yaranıb. Ötən həftə o, həbsxananın mualicə mərkəzində əməliyyat olunub. Xanımının dediyinə görə, həkimlər F.Novruzoğlunun yenidən, bu dəfə Ədliyyə Nazirliyinin Baş Tibb İdarəsinin Müalicə Müəssisəsində cərrahiyyə əməliyyatından keçməsinə ehtiyac olduğunu bildiriblər.

«Media forum