Mirzə Xəzərin Səsi

ŞUŞADAN QAYITMIŞ ŞUŞALI İLHAMİ FƏTƏLİYEV: «ŞUŞAYA GİRƏNDƏ HİSS ETDİM Kİ, HARDASA BİR XARABAYA GƏLMİŞİK» 2007-06-29 – 20:48:00

Bugünkü mətbuat konfransında Bakı Slavyan Universitetinin rektoru Kamal Abdulla belə deyib. Onun sözlərinə görə, Qarabağda, eləcə də Şuşada vəziyyət çox ağırdır, yaşayış yoxdur: «Onlar bizi Ağdamdan aparmadılar. Yəqin Ağdamda hal qalmayıb bizə göstərsinlər. Ağdərə-Xankəndi yolu ilə apardılar. Şuşada da olduq. Şəhərdə şəhər nəfəsi yox idi, hansısa cizgiləri var idi. Çox az adam yaşayırdı».

K.Abdulla Şuşada ermənilərin gözlərində xiffət gördüyünü deyib. Onun sözlərinə görə, Şuşadakı məsciddə 4 divar qalıb, halbuki Bakıdakı erməni kilsəsi tam salamatdır: «Biz erməniləri Bakıya gətirəndə gördülər ki, erməni kilsəsi içindəki kitablarla birgə durur. Biz Şuşadakı məscidi və Bakıdakı kilsəni üzbəüz qoymağa çalışdıq».

K.Abdulla Qarabağda və Ermənistanda yaşayışa da toxunub: «Nə Ağdərədə, nə də Ağdərədən Xankəndiyə gedən 2 saatlıq yolda qabağıma bir dənə də olsun maşın çıxmadı. Mənə şəxsən maraqlı idi. Mən Yerevanda tikilən 4 bina gördüm, beşincini görmədim». K.Abdulla Yerevanın zəif inkişaf etdyini deyərək bunu Bakının inkişafı ilə müqayisə edib: «Onlar gəlib bizim Bakını gördülər. Bakının bugünkü vəziyyəti zəngin potensialdan xəbər verir. Mən onların gözündə çaşqınlıq gördüm».

Şuşalı məcburi köçkün, vaxtilə tarixi memarlıq abidələrinin öyrənilməsi və bərpası ilə məşğul olmuş İlhami Fətəliyev də Şuşanın ağır vəziyyətdə olduğunu deyib: «Mənim üçün çox maraqlı idi. Çox söz-söhbətlər vardı ki, ay Şuşada belə tikililər var, elə tikililər var. Mən hər şeyi öz gözümlə görmək istəyirdim. Şuşaya girəndə hiss etdim ki, hardasa bir xarabaya gəlmişik».

İ.Fətəliyev bildirib ki, Şuşanın küçələrini gəzərkən ermənilər ona yaxınlaşıb Azərbaycan dilində «İlhami müəllim xoş gəlmisiniz» deyə salamlayıblar. O, Şuşadakı mədəniyyət evinin, bütün tarixi mədəniyyət abidələrinin yandırılıb qarət olunduğunu deyib: «Torpaq meydana tərəf düşdük, gəzə-gəzə bütün tarixi-memarlıq abidələrinə baxır və görürdüm ki, onların hamısı qarət olunub. Bülbülün evində biz çox həyəcanlandıq, çünki onun büstünü eybəcər hala salmışdılar».

«Media forum»

DUSTAQLARIN AİLƏLƏRİ DƏ ACLIĞA BAŞLAYACAQLAR

Qobustan qapalı həbsxanasında məhbusların aclıq aksiyası davam edir. Xatırladaq ki, ölüm hökmünə məhkum edilmiş dustaqlar barələrindəki ömürlük həbs cəzasının 15 illə əvəzlənməsi tələbi ilə artıq bir neçə dəfə aksiya keçiriblər. İyunun 21-dən başlanan növbəti aksiyada iştirak edən məhkumların ailə üzvləri də yaxın günlərdə aclığa başlamaq barədə düşünürlər. Bu barədə redaksiyamıza müraciət edən dustaq qohumları məlumat veriblər.

Aclıq edənlərin yaxınları həmçinin əvvəllər ölüm hökmü almış ömürlük məhbusların cəzalarının 15 illik həbslə əvəzlənməsi ilə bağlı ölkə başçısı İlham Əliyevə və Heydər Əliyev Fondunun prezidenti Mehriban Əliyevaya müraciət etmək qərarına gəliblər. Xatırladaq ki, məhbuslar aksiyanın ilk günündən hüquq müdafiəçilərilə görüşdən imtina ediblər. Bunu isə əvvəllər keçirdikləri aclıq aksiyaları zamanı hüquq müdafiəçilərinin onları aldatmaları ilə əlaqələndiriblər. Aksiya iştirakçıları parlamentin Hüquq siyasəti və dövlət quruculuğu komissiyasının sədri Əli Hüseynovun, beynəlxalq təşkilatların nümayəndələrinin onlarla görüşməsini xahiş edirlər.

Bu arada isə Ədliyyə Nazirliyinin Penitensiar xidmətinin sosial müdafiə şöbəsinin rəisi Rafiq Ramazanovun APA-ya verdiyi məlumata görə, aksiyaya başlamış 38 məhbusdan 9-u aclığı dayandırıb. R.Ramazanovun sözlərinə görə, aclığı dayandıran məhbuslar bu barədə həbsxana rəhbərliyinə ərizə ilə müraciət ediblər.

“Qobustan qapalı həbsxanasında aclıq edən məhbuslara aksiyanı dayandırmaq üçün təzyiqlər edilir. Həbsxana rəhbərliyi onlara deyib ki, aclıq dayanmasa, cəzaçəkmə müəssisəsinə qoşun yeridiləcək. Aclıq edən məhbusların sayı da ictimaiyyətdən gizlədilir. Həbsxanada 54 məhbus aclıq etdiyi halda onların sayı azaldılır”. Bu sözləri APA-ya açıqlamalarında adlarının çəkilməsini istəməyən məhbus yaxınları deyiblər. Qobustan həbsxanasının rəis müavini Şahkişi Bağırov isə bu məlumatları təkzib edib. Rəis müavini deyib ki, məhbusların saxlanma şəraiti ilə bağlı heç bir şikayəti yoxdur, onlara ömürlük cəzalarının 15 illik həbslə əvəzlənməsi tələbi ilə aclıq etməyə görə hər hansı təzyiq edilə bilməz: “Biz nəyə görə təzyiq etməliyik? Məhbuslara aclıq etmək hüquqlarını təmin etmək üçün şərait yaradılıb. Onlar həkim nəzarəti altındadırlar”.

ŞƏMS

(“Yeni Musavat” qəzeti)

2007-06-29 – 18:01:00

Azərbaycanın Rusiyadakı səfiri Polad Bülbüloğlunun və onun 28 iyun səfərində rəhbərlik etdiyi nümayəndə heyəti üzvlərinin bu gün Bakıda, Beynəlxalq Mətbuat Mərkəzində (BMM) keçirdikləri mətbuat konfransı qalmaqalla başlayıb.

«Media forum» əməkdaşının konfrans zalından verdiyi məlumata görə, P.Bülbüloğlu tədbiri giriş sözü ilə açmaq istərkən, elə ilk kəlmələri – «bu gün sizə Qarabağa, oradan isə Yerevana etdiyimiz səfər haqqında məlumat vermək istəyirəm» dediyi vaxt Qarabağ Azadlıq Təşkilatının (QAT) üzvü Manaf Kərimov yerdən onun sözünü kəsərək kobud ifadələrlə bu səfərin səhv addım olduğunu bəyan edib.

P.Bülbüloğlu BMM-in işçilərinə M.Kərimovu zaldan çıxarmağı tapşırıb. Bakı Slavyan Universitetinin rektoru Kamal Abdulla isə özünü saxlaya bilməyərək eyni təhqiramiz sözlərlə QAT üzvünə cavab verib.

Hətta M.Kərimov zaldan çıxarılandan sonra da xeyli əsəbi görünən rektor öz çıxışı zamanı emosiyalarına sahib ola bilmədiyinə görə tədbir iştirakçılarından üzr istəyib.

Hələ mətbuat konfransı başlamazdan əvvəl QAT sədri Akif Nağı rəhbərlik etdiyi təşkilatın bir neçə üzvü ilə BMM-ə gəlibmiş. Bu nüans jurnalistlərin diqqətindən qaçmayıb. Media təmsilçiləri nümayəndə heyəti ilə QAT-çılar arasında nəsə münaqişənin olacağını ehtimal edirmişlər.

Tədbirə qədər BMM-in yerləşdiyi binanın nə içində, nə də qapısı ağzında polis olub. İnsident baş verəndən sonra isə istər içəridə, istərsə də qapı ağzında çoxlu polis toplaşıb.

«Media forum»