RAFİQ TAĞI İLƏ SAMİR SƏDAQƏTOĞLU BARƏSİNDƏ ÇIXARILMIŞ QƏRAR QÜVVƏDƏ QALDI
2007-07-06 – 13:00:00
Bu gün Apellyasiya Məhkəməsi Səbail Rayon Məhkəməsinin «Sənət» qəzetinin baş redaktoru Samir Sədaqətoğlu və yazıçı Rafiq Tağı barəsində çıxardığı hökmü qüvvədə saxlayıb. Bu barədə «Media forum» saytına R.Tağının qardaşı Amil Tağıyev məlumat verib.
A.Tağıyevin sözlərinə görə, R.Tağı və S.Sədaqətoğlu bugünkü məhkəmə prosesinə gətirilməyiblər. Vəkil İsaxan Aşurov müttəhimlərin məhkəməyə gətirilməsini tələb etsə də, hakim bunu nəzərə almayıb.
A.Tağıyevin dediyinə görə, bir neçə dəqiqə çəkən məhkəmə prosesində hakim Səbail məhkəməsinin qərarının qüvvədə saxlanıldığını deyib.
Xatırladaq ki, jurnalistlərin həbsinə «Sənət» qəzetinin 1 noyabr 2006-cı il tarixli sayında R.Tağının «Avropa və biz» məqaləsi səbəb olub. Səbail məhkəməsinin bu il mayın 4-də çıxardığı qərarla S.Sədaqətoğlu 283.2.2 (milli, dini və irqi ayrı-seçkilik) maddəsinə əsasən 4 il, R.Tağı 283.1 ( milli, dini və irqi ayrı-seçkilik yaymaqda) maddəsinə əsasən 3 il azadlıqdan məhrum ediliblər.
«Media forum»
Əvvəlki məqalə: «SƏRHƏDSİZ REPORTYORLAR» HƏBSDƏ OLAN İRAN JURNALİSTLƏRİNİN ADLARINI AÇIQLAYIB
Sonrakı məqalə: Qobustan həbsxanasında aclıq aksiyası dayanıb