Mirzə Xəzərin Səsi

ANKARA, STRASBURQ və TORONTODA XOCALI AKSİYALARI 2007-02-26 – 15:08:00

Dünyanın ayrı-ayrı yerlərində yaşayan azərbaycanlılar və onlara dəstək verən digər ölkə vətəndaşları Xocalı soyqırımının 15-ci ildönümü ilə əlaqədar həmrəylik nümayiş etdiriblər.

ANKARA. Türkiyə paytaxtının mərkəzində, Səhhiyə meydanında Azərbaycan Tələbə və Məzunlar Birliyinin təşkil etdiyi mitinqə Türkiyənin aparıcı siyasi partiyalarından, tanınmış ictimai təşkilatlardan, Türk Dünyası İnsan Haqları Dərnəyi, Türk Metal Sendikası, Dövlət Məmurları Sendikasından, Şərqi Türküstan, Kərkük Türkləri kimi qeyri-hökumət qurumlarından nümayəndələr qatılıb. Aksiyada 2000-dən çox insan iştirak edib.

Mitinqdə öz təsirli nitqləri ilə seçilən Hakim Əzizov, Toğrul Vəli Kamiloğlu, Zaur Bayramlı Xocalı soyqırımı, Azərbaycan xalqının uğradığı haqsızlıqlardan danışıb, bəzi böyük dövlətlərinin Ermənistanın xeyrinə apardığı birtərəfli siyasəti kəskin tənqid ediblər.

Türk Məmurları Həmkarlar İttifaqının sədri Bircan Akyıldız, Türkiyənin tanınmış siyasi xadimlərindən və keçmiş nazirlərdən Namiq Kamal Zeybək və Nəsən Cəlal Gözəl öz çıxışlarında Xocalı soyqırımının təsadüfi bir hadisə olmadığını, bunun ermənilərin türk dünyasına qarşı törətdiyi vəhşiliklərin davamı olduğunu vurğulayıblar. Çıxışlarda Türkiyənin bir dövlət olaraq bu hadisəyə biganə qalmamasının, Türkiyə Böyük Millət Məclisi tərəfindən Xocalı faciəsini bir soyqırımı olaraq tanınmasının vacibliyi qeyd edilib.

Tədbirin sonunda Türkiyə Böyük Millət Məclisinə və BMT-yə müraciət ünvanlanıb. Anma tədbiri imza toplanması kampaniyası, sərgi, cələng qoyma, konfranslar, matəm konserti və müxtəlif formatlarda bu gün də qədər davam edəcək.

(“Media Forum”)